Mahimo Ka Magkaada Malipayon nga Tidaraon!
Kapitulo 1
Mahimo Ka Magkaada Malipayon nga Tidaraon!
1, 2. Ano an karuyag han imo Maglalarang nga magkaada ka?
USA ka mapaso nga hangkop tikang ha usa nga imo hinigugma. Kinasingkasing nga pagtawa durante han marasa nga panihapon upod han minahal nga mga sangkay. An kalipay ha pagtan-aw ha imo kabataan nga malipayon nga nag-uuyag. An mga panahon nga sugad hini amo an makalilipay nga mga takna ha kinabuhi. Kondi, para ha damu, an kinabuhi baga in naghahatag hin makuri nga mga problema. Kon iton an imo naieksperiensiahan, magin marig-on.
2 Kaburut-on han Dios nga magpahimulos ka han nagpapadayon nga kalipayan ilarum han gimaopayi nga mga kahimtang ha urosahon nga mga palibot. Diri kay inup la ini, kay tinuod nga igintatanyag ha imo han Dios an yawi ha sugad malipayon nga tidaraon. Iton nga yawi amo an kahibaro.
3. Ano nga kahibaro an yawi ha kalipayan, ngan kay ano nga makakasiguro kita nga an Dios makakahatag hiton nga kahibaro?
3 Ginhihisgutan naton an mahitungod han usa ka espesyal nga klase han kahibaro nga labaw gud kay han tawhanon nga kinaadman. Ito “an kahibaro han Dios mismo.” (Proberbios 2:5) Haros 2,000 ka tuig na an naglabay, usa nga parasurat han Biblia an nagsiring: “An tagsatagsa nga balay gintukod han usa, kondi hiya nga nagtukod han ngatanan nga mga butang amo an Dios.” (Hebreo 3:4) Hunahunaa la an kahibaro nga gintatag-iya han Magburuhat han ngatanan nga mga butang! An Biblia nasiring nga iniihap ngan ginngangaranan han Dios an ngatanan nga mga bitoon. Makatingala nga hunahuna, tungod kay ginatus ka bilyon nga mga bitoon an aada mismo ha aton galaksi, ngan an mga astronomo nasiring nga mayada mga usa ka gatus ka bilyon iba pa nga mga galaksi! (Salmo 147:4) Maaram liwat an Dios han ngatanan mahitungod ha aton, salit hin-o pa an makakahatag han maoroopay nga mga baton ha importante nga mga pakiana han kinabuhi?—Mateo 10:30.
4. Kay ano nga sadang laoman naton an Dios nga maghahatag hin mga instruksion ha paggiya ha aton, ngan ano nga libro an naghahatag hini nga panginahanglan?
4 Hunahunaa an duha nga lalaki nga nangangalimbasug ha pag-ayad han ira kotse. Tungod kay napakyas, iginlabug han usa nga lalaki an iya mga garamiton ha pag-ayad. An usa naman kalmado nga ginsulbad an problema, ginbirik an yawi ha pagpaandar, ngan nahiyum samtang nagtitikang umandar an makina ngan nagbiyahe hin maopay. Diri ka makukurian ha pagtigo kon hain han duha nga lalaki an mayada han libro han instruksion tikang ha parahimo. Diri ba makatadonganon la nga an Dios maghahatag hin mga instruksion nga maggigiya ha aton ha kinabuhi? Sugad han hinbabaroan mo, sugad gud hiton an pag-angkon han Biblia—usa ka libro han instruksion ngan giya tikang ha aton Maglalarang, nga gindisenyo ha paghatag han kahibaro han Dios.—2 Timoteo 3:16.
5. Mationan-o kabirilhon an kahibaro nga sulud han Biblia?
5 Kon totoo an pag-angkon han Biblia, hunahunaa la an mga bahandi nga sulud hiton nga libro! Ha Proberbios 2:1-5, ginsasagda kita hito nga bilngon an kinaadman, magsaliksik hito sugad la han aton pagbubuhaton ha tinago nga bahandi—diri ha tuna han tawhanon nga panhunahuna, kondi ha Pulong han Dios mismo. Kon magbiling kita didto, aton “hiaagian an kahibaro han Dios.” Tungod kay hinsasabtan han Dios an aton mga limitasyon ngan mga panginahanglan, naghahatag hiya ha aton hin instruksion nga mabulig ha aton ha pagkaada mamurayawon, malipayon nga kinabuhi. (Salmo 103:14; Isaias 48:17) Dugang pa, an kahibaro han Dios nagtatanyag ha aton hin makalilipay maopay nga sumat.
KINABUHI NGA WARAY KATAPOSAN!
6. Ano nga pasarig an iginhatag ni Jesu-Kristo mahitungod han kahibaro han Dios?
6 An pinakabantug nga tawo ha kasaysayan hi Jesu-Kristo matin-aw nga nagsaysay hini nga bahin han kahibaro han Dios. Hiya nagsiring: “Ini nangangahulogan hin kinabuhi nga waray kataposan, an ira pagkuha hin kahibaro ha imo, an amola matuod nga Dios, ngan ha usa nga imo sinugo, hi Jesu-Kristo.” (Juan 17:3) Hunahunaa la—kahibaro nga nagtutugway ngadto ha kinabuhi nga waray kataposan!
7. Ano an ebidensia nga waray tuyoa han Dios nga kita mamatay?
7 Ayaw dayon igbalewaray an kinabuhi nga waray kataposan sugad nga inup la. Lugod, kitaa an pagkahimo han lawas han tawo. Matahum nga gindisenyo ito basi makatilaw, makabati, makaamyon, makakita, ngan makaabat. Damu hinduro an mga butang dida ha tuna nga nakakalipay han aton mga sentido—marasa nga pagkaon, matahum nga huni han tamsi, mahamot nga mga bukad, matahum nga mga taran-awon, makalilipay nga pakig-upod! Ngan an aton urosahon nga utok nalabaw pa gud kay han supercomputer, kay nakakahimo ito ha aton nga apresyaron ngan pahimulosan an ngatanan han sugad nga mga butang. Naghuhunahuna ka ba nga naruruyag an aton Maglalarang nga kita mamatay ngan mawad-an hini ngatanan? Diri ba labaw nga makatadonganon an pagsiring nga karuyag niya nga kita mabuhi nga malipayon ngan magpahimulos han kinabuhi nga waray kataposan? Bueno, iton an mahimo magin kahulogan para ha imo han kahibaro han Dios.
KINABUHI HA PARAISO
8. Ano an ginsisiring han Biblia mahitungod han tidaraon han katawohan?
8 An ginsisiring han Biblia mahitungod han tidaraon han tuna ngan katawohan mahimo sumahon ha usa nga pulong—Paraiso! Hi Jesu-Kristo nagyakan hito han ginsumatan niya an tikamatay na nga tawo: “Makakaupod ko ikaw ha Paraiso.” (Lukas 23:43) An pag-unabi han Paraiso sigurado nga nagpahinumdum ha tawo han malipayon nga kahimtang han aton siyahan nga mga ginikanan, hi Adan ngan Eva. Han ginlarang hira han Dios, hingpit hira ngan nag-ukoy ha sugad-tanaman nga parke nga dinisenyo ngan igintanom han Maglalarang. Angayan ito nga tawagon an hardin ha Eden, nga an ngaran nagpapasabot hin kalipay.
9. Ano an kahimtang han pag-ukoy ha orihinal nga Paraiso?
9 Makalilipay gud adto nga hardin! Totoo adto nga paraiso. An iba han magtahom nga kakahoyan hito amo adton namumunga hin magrasa nga mga bunga. Samtang gin-uusisa ni Adan ngan Eva an ira nasasakopan, nainom tikang ha limpyo nga tubig, ngan nagtitirok han mga bunga tikang ha kakahoyan hito, waray hinungdan nga hira mabaraka o mahadluk. Bisan an mga hayop diri gud tarhug, kay iginbutang han Dios an lalaki ngan an iya asawa ha mahigugmaon nga pagmando ha ira ngatanan. Dugang pa, an siyahan tawhanon nga mag-asawa mayada hingpit nga kahimsug. Tubtub nga nagpapabilin hira nga masinugtanon ha Dios, an dayon, makalilipay nga tidaraon aada ha ira atubangan. Tinagan hira han makapatagbaw nga buruhaton ha pagmangno ha ira urosahon Paraiso nga urukyan. Dugang pa, an Dios naghatag kan Adan ngan Eva han sugo nga “pun-on an tuna ngan pagtag-iyahon ito.” Pauursahon nira ngan han ira mga anak an mga tubtuban han Paraiso tubtub nga an aton bug-os nga planeta magin usa ka lugar nga matahum ngan makalilipay.—Genesis 1:28.
10. Han nagyakan hi Jesus han Paraiso, ano an iya karuyag sidngon?
10 Kondi, han gin-unabi ni Jesus an Paraiso, diri hiya naghahangyo ha tikamatay nga tawo nga maghunahuna mahitungod han maiha na nga naglabay. Diri, hi Jesus nagyayakan mahitungod han tidaraon! Maaram hiya nga an aton bug-os tunan-on nga urukyan magigin usa ka paraiso. Tutumanon kon sugad han Dios an iya orihinal nga katuyoan para han katawohan ngan ha aton tuna. (Isaias 55:10, 11) Oo, ibabalik an Paraiso! Ngan ano an magigin kahimtang didto? Tugotan naton an Pulong han Dios, an Baraan nga Biblia, nga bumaton.
KINABUHI HA NAHIBALIK NGA PARAISO
11. Ha nahibalik nga Paraiso, ano an mahitatabu ha sakit, kalagas, ngan kamatayon?
11 Mawawaray na an sakit, kalagas, ngan kamatayon. “Hiton nga panahon an mga mata han mga buta pangangabrihon, ngan an mga talinga han mga bungol pangunguhaan han sarop. Hiton nga panahon an piol malukso sugad hin bugsok, ngan an dila han ngula magkakanta ha kalipay.” (Isaias 35:5, 6) “An Dios mismo makakaupod han [katawohan]. Ngan iya papahiron an ngatanan nga luha tikang ha ira mga mata, ngan mawawaray na an kamatayon, bisan kabidoan, bisan pagtangis bisan kasakit pa gud. An siyahan nga mga butang nag-agi na.”—Pahayag 21:3, 4.
12. Kay ano nga makakasiguro kita nga mawawaray na an krimen, kamadarahog, ngan karautan ha tidaraon nga Paraiso?
12 Mawawaray na ha kadayonan an krimen, kamadarahog, ngan karautan. “Pag-uutdon an mga magburuhat hin maraut . . . Diri na mag-iiha, ngan an magraut mawawaray na . . . Hiya waray na. Kondi an mga maaghup makakapanunod han tuna.” (Salmo 37:9-11) “Mahitungod han mga magraut, uutdon hira tikang ha tuna; ngan para han mga malingoon, pagrarabuton hira tikang hito.”—Proberbios 2:22.
13. Paonan-o hihimoon han Dios an kamurayawan?
13 An kamurayawan maglulukop ha bug-os nga tuna. “Napapaukoy niya [Dios] an mga girra tubtub ha kataposan han tuna. Iya nababari an pana ngan nauutod an bangkaw.” (Salmo 46:9) “An matadong maburak, ngan an kahuraan han kamurayawan tubtub ha diri na pagsirang han bulan.”—Salmo 72:7.
14, 15. Ano an ginsisiring han Biblia mahitungod han balay, buruhaton, ngan pagkaon hinin nahibalik nga Paraiso?
14 Magigin sigurado na an mga balay ngan makapatagbaw an buruhaton. “Hira magtutukod hin mga balay ngan hira an maukoy . . . Hira diri magtutukod ngan iba an maukoy; diri hira magtatanom ngan iba an makaon. Kay sugad han mga adlaw han usa nga kahoy masusugad an mga adlaw han akon katawohan; ngan an akon mga pinili magpapahimulos hin bug-os han buhat han ira mga kamot. Diri hira magbubudlay hin kawang la, diri man hira manganganak para han kaguol.”—Isaias 65:21-23.
15 Hura na an makapahimsug nga pagkaon. “Magkakaada kahuraan han lugas ha tuna; ha bawbaw han nga bukid an mga bunga hito magsasap-ay.” (Salmo 72:16) “An tuna mismo maghahatag han bunga hito; an Dios, an aton Dios, magbibendisyon ha aton.”—Salmo 67:6.
16. Kay ano nga an kinabuhi ha Paraiso magigin makalilipay?
16 Magigin makalilipay an kinabuhi nga waray kataposan ha paraiso nga tuna. “An mga magtadong makakapanunod han tuna, ngan hira maukoy dida ha waray kataposan.” (Salmo 37:29) “An kamingawan ngan an mamara nga tuna magmamalipayon, ngan an kabadsan maglilipay ngan mabukad sugad han rosas.”—Isaias 35:1.
AN KAHIBARO NGAN AN IMO TIDARAON
17. (a) Ano an sadang mo pagbuhaton kon an kinabuhi ha Paraiso makaruruyag ha imo? (b) Paonan-o kita nahibaro nga bubuhaton han Dios an dagku nga mga pagbag-o ha tuna?
17 Kon an kinabuhi ha Paraiso makaruruyag ha imo, ayaw tugoti an bisan ano nga butang nga magpugong ha imo ha pagkaada han kahibaro han Dios. Nahigugma hiya ha katawohan ngan bubuhaton niya an mga pagbag-o nga ginkikinahanglan basi mahimo an tuna nga usa ka paraiso. Aw, kon mayada ka gahum ha pagtapos han kasakitan ngan kawaray-hustisya nga nagsasarang ha kalibotan, diri mo ba bubuhaton ito? Lalaoman mo ba an Dios nga magbubuhat hin gutiay? Ha tinuod, an Biblia nagyayakan hin matin-aw han usa ka panahon kon kuhaon na han Dios inin masamok nga sistema ngan saliwnan ito han usa ka hingpit, matadong nga pagmando. (Daniel 2:44) Kondi an Biblia nagsusumat ha aton hin damu pa mahitungod hini ngatanan. Ipinapakita hito kon paonan-o kita maluluwas nga buhi ngadto ha iginsaad han Dios nga bag-o nga kalibotan.—2 Pedro 3:13; 1 Juan 2:17.
18. Ano an mahihimo han kahibaro han Dios para ha imo yana?
18 An kahibaro han Dios makakahatag liwat hin daku nga kapulsanan ha imo yana mismo. An gikukurii ngan nakakaguol gud nga mga pakiana han kinabuhi binabaton ha Biblia. An pagkarawat han giya hito mabulig ha imo ha pagpatubo han pakigsangkay ha Dios. Pagkaurosahon nga pribilehiyo! Ngan makakahimo ini ha imo nga magpahimulos han kamurayawan nga an Dios la an makakahatag. (Roma 15:13, 33) Samtang nagtitikang ka ha pagkuha hinin importante nga kahibaro, nagtitikang ka ha pagbuhat han pinaka importante ngan may balos nga buruhaton ha imo kinabuhi. Diri ka gud magbabasol ha pagkaada han kahibaro han Dios nga nagtutugway ngadto ha kinabuhi nga waray kataposan.
19. Ano nga pakiana an paghihisgutan naton ha masunod nga kapitulo?
19 Tinatawag naton an Biblia sugad nga libro nga nagsusulud han kahibaro han Dios. Kondi, paonan-o kita nahibaro nga sugad ito, diri usa ka libro han tawhanon nga kinaadman, kondi usa ka butang nga nalabaw pa gud? Aton paghihisgutan ini nga pakiana ha masunod nga kapitulo.
SARIHI AN IMO KAHIBARO
Kay ano nga an kahibaro han Dios nagtutugway ha imo ngadto ha dayon nga kalipayan?
Ano an magigin kahimtang han kinabuhi ha tiarabut tunan-on nga Paraiso?
Kay ano nga makakarawat mo an kapulsanan yana tikang ha pagkuha hin kahibaro han Dios?
[Mga Pakiana]
