Makaagi hin Kasigurohan Dida ha Katawohan han Dios
Kapitulo 17
Makaagi hin Kasigurohan Dida ha Katawohan han Dios
1, 2. Paonan-o an kahimtang han katawohan pariho han kahimtang han mga tawo ha lugar nga nabungkag han bagyo?
HUNAHUNAA nga an makusog nga bagyo nagbungkag ha lugar nga imo inuukyan. Nabungkag an imo balay, ngan nawara an ngatanan mo nga mga panag-iya. Kulang hin pagkaon. Baga in waray paglaom an kahimtang. Ngan, diri linalaoman inabot an mga suplay han bulig. An pagkaon ngan panapton hura nga igintatagana. Usa ka bag-o nga balay an gintutukod para ha imo. Sigurado mapasalamaton ka ha tawo nga naghimo hini nga mga tagana.
2 Usa ka butang nga pariho hito an nahitatabu yana nga adlaw. Pariho hiton nga bagyo, an pagrebelde ni Adan ngan Eva nakahimo hin daku nga kadaot ha tawhanon nga rasa. Nawara an Paraiso nga panimalay han katawohan. Tikang hadto, an mga gobyerno han tawo napapakyas ha paghatag hin katalwasan ha mga tawo tikang ha girra, krimen, ngan kawaray-hustisya. Ginpagutom han buwa nga relihiyon an damu hinduro nga mga tawo ha maopay espirituwal nga pagkaon. Kondi, ha espirituwal nga paagi, hi Jehova nga Dios nagtatagana yana han pagkaon, panapton ngan urukyan. Paonan-o niya ginbubuhat iton?
“AN MATINUMANON NGAN MAARAMON NGA URIPON”
3. Paonan-o iginhahatag ni Jehova an mga tagana para ha katawohan, sugad han ipinapakita han ano nga mga ehemplo?
3 An mga suplay han bulig kasagaran na nga iginhahatag pinaagi han organisado nga agianan, ngan sugad man nga paagi igintatagana ni Jehova an espirituwal nga tagana para ha iya katawohan. Pananglitan, an mga Israelita amo an “kongregasyon ni Jehova” hin mga 1,500 ka mga tuig. An iba ha ira nag-alagad sugad nga agianan han Dios ha pagtutdo han iya Balaud. (1 Kronikas 28:8; 2 Kronikas 17:7-9) Han siyahan nga siglo K.P., ginhimo ni Jehova an Kristiano nga organisasyon. Gintukod an mga kongregasyon, ngan nagios hira ilarum han pagtugway han nagmamando nga lawas nga nagkokompuwesto han mga apostol ngan han katigurangan nga kalalakin-an. (Buhat 15:22-31) Sugad man yana nga adlaw, hi Jehova nakikig-upod ha iya katawohan pinaagi han usa ka organisado nga grupo. Paonan-o kita nahibabaro hini?
4. Hin-o an napamatud-an nga amo “an matinumanon ngan maaramon nga uripon” ha moderno nga mga panahon, ngan paonan-o ginhihimo an espirituwal nga mga tagana han Dios?
4 Hi Jesus nagsiring nga ha panahon han iya presensia ha gahum han Ginhadian, “an matinumanon ngan maaramon nga uripon” hiaagian nga naghahatag hin “pagkaon ha igo nga panahon” para ha Iya mga sumuronod. (Mateo 24:45-47) Han ginpalingkod hi Jesus sugad nga langitnon nga Hadi han 1914, hin-o an napamatud-an nga amo an “uripon”? Sigurado nga diri an mga klero han Kakristianohan. Kay ha kadak-an nga bahin, ira ginpapakaon an ira mga panon han propaganda nga nasuporta ha ira kalugaringon nga mga gobyerno han nasud han Girra ha Kalibotan I. Kondi an husto ngan napapanahon espirituwal nga pagkaon iginhahatag han grupo han totoo nga mga Kristiano nga dinihogan han baraan nga espiritu han Dios ngan bahin han tinatawag ni Jesus nga “gutiay nga panon.” (Lukas 12:32) Iginwali hinin dinihogan nga mga Kristiano an Ginhadian han Dios imbes nga an mga gobyerno han tawo. Sugad nga resulta, ha naglabay nga mga tuig minilyon han magtadong nga “iba nga mga karnero” an inupod ha dinihogan nga “uripon” ha pagbuhat han totoo nga relihiyon. (Juan 10:16) Pinaagi ha paggamit han pagtugway han ‘matinumanon nga uripon’ ngan han Nagmamando nga Lawas hito yana, gintutugwayan han Dios an iya organisado nga katawohan ha paghimo han espirituwal nga pagkaon, panapton, ngan urukyan nga makakarawat han ngatanan nga karuyag magkaada hini nga mga tagana.
“PAGKAON HA IGO NGA PANAHON”
5. Ano nga espirituwal nga kahimtang an naeksister ha kalibotan yana nga adlaw, kondi ano an ginbubuhat ni Jehova mahitungod hini?
5 Hi Jesus nagsiring: “An tawo nabubuhi, diri la ha tinapay, kondi ha tagsa nga pulong nga nagawas ha baba ni Jehova.” (Mateo 4:4) Kondi, makasurubo, an kadam-an han katawohan diri namamati ha mga pulong han Dios. Sugad han igintagna han propeta ni Jehova nga hi Amos, mayada “usa nga kagutoman, diri ha tinapay, ngan kauhaw, diri ha tubig, kondi ha pamati ha mga pulong ni Jehova.” (Amos 8:11) Bisan an relihiyoso hinduro nga mga tawo nagugutom ha espirituwal. Kondi, kaburut-on ni Jehova nga “an ngatanan nga klase han mga tawo sadang maluwas ngan magkaada husto nga kahibaro han kamatuoran.” (1 Timoteo 2:3, 4) Tungod hito, nagtatagana hiya hin hura espirituwal nga pagkaon. Kondi diin ito makukuha?
6. Paonan-o ginpapakaon ni Jehova ha espirituwal an iya katawohan ha naglabay nga mga panahon?
6 Ha bug-os nga kasaysayan, iginhahatag ni Jehova an espirituwal nga pagkaon ha iya katawohan sugad nga grupo. (Isaias 65:13) Pananglitan, gintirok han Israelita nga mga saserdote an kalalakin-an, kababayin-an, ngan kabataan basi tutdoan sugad nga grupo ha Balaud han Dios. (Deuteronomio 31:9, 12) Ilarum han pagtugway han nagmamando nga lawas, an siyahan-siglo nga mga Kristiano nag-organisa hin mga kongregasyon ngan naghimo hin mga katirok para ha pagtutdo ngan pagdasig ha ngatanan. (Roma 16:5; Filemon 1, 2) Ginsusunod han mga Saksi ni Jehova ini nga susbaranan. Malipayon nga gindadapit ka nga tumambong ha ngatanan nga ira mga katirok.
7. Paonan-o an regular nga pagtambong ha Kristiano nga mga katirok may kalabutan ha kahibaro ngan pagtoo?
7 Siyempre, bangin damu na an imo hinbabaroan ha imo personal nga pag-aram ha Biblia. Bangin usa nga Saksi an nabulig ha imo. (Buhat 8:30-35) Kondi an imo pagtoo mahimo igpariho ha usa nga tanom nga malalaya ngan mamamatay kon diri ito tagan hin husto nga pagmangno. Salit, kinahanglan karawaton mo an husto espirituwal nga pagkaon. (1 Timoteo 4:6) An Kristiano nga mga katirok naghahatag hin padayon nga programa han pagtutdo nga gindisenyo ha pagpakaon ha imo ha espirituwal ngan pagbulig ha imo nga magpadayon nga nagtutubo ha pagtoo samtang nag-uuswag ka ha kahibaro mahitungod han Dios.—Kolosas 1:9, 10.
8. Kay ano nga nadadasig kita nga tumambong ha mga katirok han mga Saksi ni Jehova?
8 An mga katirok nag-aalagad hin usa pa importante nga katuyoan. Hi Pablo nagsurat: “Magpinalandonganay an usa kag usa ha aton ha pag-ahat ha gugma ngan magopay nga buhat, diri binabayaan an aton pagturotarampo.” (Hebreo 10:24, 25) An Griego nga pulong nga iginhubad nga “ha pag-aghat” mahimo liwat mangahulogan hin “ha pagpatarum.” An proberbio han Biblia nasiring: “An puthaw, nakakapatarum han puthaw. Sugad man an tawo nakakapatarum han nawong han iba.” (Proberbios 27:17) Ginkikinahanglan naton ngatanan an padayon nga ‘pagpatarum.’ An adlaw-adlaw nga mga pag-ipit tikang ha kalibotan makakapaluya han aton pagtoo. Kon natambong kita ha Kristiano nga mga katirok, mayada pagbayloay han pagdasig. (Roma 1:11, 12) Ginsusunod han mga membro han kongregasyon an sagdon ni apostol Pablo nga “padayon nga liawon an usa kag usa ngan parig-onon an usa kag usa,” ngan an sugad nga mga butang nagpapatarum han aton pagtoo. (1 Tesalonika 5:11) An regular nga pagtambong ha Kristiano nga mga katirok nagpapasabot liwat nga nahigugma kita ha Dios ngan naghahatag ha aton hin mga higayon ha pagdayaw ha iya.—Salmo 35:18.
“MANUL-OT KAMO HAN GUGMA”
9. Paonan-o ipinapakita ni Jehova an susbaranan ha pagpakita hin gugma?
9 Hi Pablo nagsurat: “Manul-ot kamo han gugma, kay amo ito an hingpit nga bugkos han pagkaurosa.” (Kolosas 3:14) Malipayon nga iginhahatag ni Jehova ini nga panapton para ha aton. Ha ano nga paagi? Maipapakita han mga Kristiano an gugma tungod kay amo ito an usa han hatag-han-Dios nga mga bunga han baraan nga espiritu ni Jehova. (Galasia 5:22, 23) Ipinapakita ni Jehova mismo an gidadakui nga gugma pinaagi ha pagsugo ha iya bugtong nga Anak basi magkaada kita kinabuhi nga waray kataposan. (Juan 3:16) Inin supremo nga pagpakita han gugma naghatag han modelo para ha aton ha pagpahayag hini nga kalidad. “Kon ha sugad hini ginhigugma kita han Dios,” an iginsurat ni apostol Juan, “kon sugad ilarum kita mismo ha obligasyon nga maghigugmaay ha usa kag usa.”—1 Juan 4:11.
10. Paonan-o naton makakarawat an kapulsanan tikang ha “bug-os nga katig-uban han kabugtoan”?
10 An imo pagtambong ha mga katirok ha Kingdom Hall naghahatag ha imo hin gimaopayi nga higayon ha pagpakita han gugma. Didto igkikita ka han damu magkalainlain nga mga tawo. Sigurado nga madadani ka dayon ha damu ha ira. Siyempre, nagkakaibaiba an mga personalidad bisan ha butnga hadton nag-aalagad kan Jehova. Bangin hadto ginlilikyan mo an mga tawo nga diri kapariho han imo mga interes o mga kinaiya. Kondi, an mga Kristiano, kinahanglan “magkaada gugma para ha bug-os nga katig-uban han kabugtoan.” (1 Pedro 2:17) Salit, himoa nga imo tumong nga makilala adton aada ha Kingdom Hall—bisan adton mga indibiduwal nga an edad, personalidad, rasa, o edukasyon bangin kaiba han imo. Sigurado makikita mo nga an tagsa nalabaw ha pipira makaruruyag nga kalidad.
11. Kay ano nga diri ka sadang maguol ha magkalainlain nga personalidad ha butnga han katawohan ni Jehova?
11 An pagkaibaiba han mga personalidad ha kongregasyon kinahanglan diri makaguol ha imo. Ha pag-ilustrar, hunahunaa an damu nga mga sarakyan nga nagbibiyahe katupad mo ha dalan. Diri an ngatanan nalarga ha pariho nga kalaksi, diri man an ngatanan ha pariho nga kahimtang. An iba nagbibiyahe ha damu na ka milya, kondi pariho ha imo, an iba nagtitikang pa la ha pagbiyahe. Kondi, bisan pa hini nga mga kaibahan, an ngatanan nagbibiyahe dida ha dalan. Pariho man ito ha mga indibiduwal nga nagkokompuwesto han usa nga kongregasyon. Diri an ngatanan nakakapatubo han Kristiano nga mga kalidad ha pariho nga kalaksi. Dugang pa, diri an ngatanan aada ha pariho pisikal o emosyonal nga kahimtang. An iba nagsisingba na kan Jehova ha damu ka mga tuig; an iba nagtitikang pa la. Kondi, an ngatanan nagbibiyahe dida ha dalan ngadto ha kinabuhi nga waray kataposan, “nagkakaurosa ha pariho nga hunahuna ngan pariho nga panhunahuna.” (1 Korinto 1:10) Salit, pamilnga an magopay nga mga kalidad imbes an mga kaluyahan hadton aada ha kongregasyon. An pagbuhat hiton magpapalipay han imo kasingkasing, kay hisasabtan mo nga an Dios tinuod nga aada ha butnga hini nga katawohan. Ngan sigurado ini an lugar nga kuruyag mo nga aada ka.—1 Korinto 14:25.
12, 13. (a) Kon an usa dida ha kongregasyon nakasala ha imo, ano an mahihimo mo? (b) Kay ano nga importante an diri pagtipig hin kasina?
12 Tungod kay an ngatanan nga mga tawo diri-hingpit, usahay usa ha kongregasyon an bangin magyakan o magbuhat hin usa ka butang nga nakakapasina ha imo. (Roma 3:23) An disipulo nga hi Jakobo maminatud-on nga nagsurat: “Nahipapakdol kita ha damu ka beses. Kon an bisan hin-o diri nahipapakdol ha pulong, ini nga usa amo an hingpit nga tawo.” (Jakobo 3:2) Mationan-o ka magios kon an usa nakasala ha imo? An proberbio han Biblia nasiring: “An pagsabot han tawo nakakapahinay han iya kasina, ngan an iya himaya amo an pagpasaylo han pagtalapas.” (Proberbios 19:11) An pagkaada hin pagsabot nangangahulogan nga nakikita an aada ha luyo han kahimtang, hinsasabtan an aada ha ilarum nga mga hinungdan kon kay ano nga an usa nga tawo nakagyakan o nakagbuhat hin sugad. Kadam-an ha aton an nagamit hin daku nga pagsabot basi mapasaylo an aton kalugaringon nga mga sayop. Kay ano nga diri liwat gamiton ito basi hisabtan ngan tabonan an pagkadiri-hingpit han iba?—Mateo 7:1-5; Kolosas 3:13.
13 Ayaw gud hingalimti nga kinahanglan pasayloon naton an iba kon karuyag naton nga makarawat an pagpasaylo ni Jehova. (Mateo 6:9, 12, 14, 15) Kon ginbubuhat naton an kamatuoran, aton tatratohon an iba ha mahigugmaon nga paagi. (1 Juan 1:6, 7; 3:14-16; 4:20, 21) Salit, kon mayada ka problema ha usa nga indibiduwal ha kongregasyon, atohi an pagtipig hin kasina. Kon nagsusul-ot ka han gugma, mangangalimbasug ka ha pagsulbad han problema, ngan diri ka mag-aalang ha pangaro hin pasaylo kon ikaw an nakapasina.—Mateo 5:23, 24; 18:15-17.
14. Ano nga mga kalidad an sadang igsul-ot naton?
14 An aton espirituwal nga panapton sadang mag-upod han iba nga mga kalidad nga duok nga may kalabutan ha gugma. Hi Pablo nagsurat: “Manul-ot kamo han mahumok nga pagbati han pagpaid, kalooy, pagpaubos, kaaghop, ngan pagkamainantuson.” Ini nga mga kalidad, nga nalabaw hito an gugma, bahin han diosnon “bag-o nga personalidad.” (Kolosas 3:10, 12) Mangangalimbasug ka daw ha pagsul-ot hini nga paagi? Labi na kon iginsusul-ot mo an minagburugto nga gugma nga magkakaada ka nagpapakilala nga tigaman han mga disipulo ni Jesus, kay hiya nagsiring: “Tungod hini an ngatanan makilala nga kamo an akon mga disipulo, kon kamo naghihigugmaay ha usa kag usa.”—Juan 13:35.
USA NGA LUGAR HAN KASIGUROHAN
15. Paonan-o nga an kongregasyon pariho han usa nga urukyan?
15 An kongregasyon nag-aalagad liwat sugad nga usa nga urukyan, usa nga nagpapanalipod nga arayupan diin maabat ka hin kasigurohan. Dida hito makikita mo an mga tangkod-an-kasingkasing nga nagbubuhat han husto ha mga mata han Dios. Damu ha ira an nagkuha na han pariho maraut nga mga buhat ngan mga paggios nga bangin pinangalimbasugan mo nga malamposan. (Tito 3:3) Makakabulig hira ha imo, kay ginsumatan kita nga “padayon nga magdinaraay han mga pinas-an han usa kag usa.” (Galasia 6:2) Natural, an pagpadayon ha kurso nga nagtutugway ngadto ha kinabuhi nga waray kataposan imo kalugaringon nga responsabilidad. (Galasia 6:5; Filipos 2:12) Kondi, igintatagana ni Jehova an Kristiano nga kongregasyon sugad nga urosahon nga paagi han bulig ngan suporta. Bisan kon nakakaguol an imo mga problema, mayada ka birilhon nga suporta nga makakarawat mo—usa ka mahigugmaon nga kongregasyon nga andam ha pagbulig ha imo ha mga panahon han kasakitan o kawara han kinahanglanon nga mga butang.—Itanding an Lukas 10:29-37; Buhat 20:35.
16. Ano nga bulig an iginhahatag han mga tigurang ha kongregasyon?
16 Kaupod hadton andam ha pagbulig ha imo amo an “mga regalo nga kalalakin-an”—an pinili nga mga tigurang ha kongregasyon, o mga paramangno, nga nagbabantay han panon nga kinaburut-on ngan madasigon. (Efeso 4:8, 11, 12; Buhat 20:28; 1 Pedro 5:2, 3) Mahitungod ha ira, hi Isaias nagtagna: “An kada usa masusugad han lugar nga luluk-an tikang ha hangin ngan usa nga sirongan tikang ha bagyo, sugad han nag-aawas nga tubig ha lugar nga mamara, sugad han lambong han daku nga bato dida ha tuna nga guol.”—Isaias 32:2.
17. (a) Ano nga klase hin bulig an labi na nga karuyag ihatag ni Jesus? (b) Ano nga tagana an iginsaad han Dios nga hihimoon para ha iya katawohan?
17 Han nakanhi pa ha tuna hi Jesus, makasurubo nga waray han mahigugmaon nga pagbantay an relihiyoso nga mga lider. An kahimtang han mga tawo nagpagios gud ha iya, ngan karuyag niya makabulig ha ira labi na ha espirituwal. Nalooy hi Jesus ha ira tungod kay “hira nanluluya ngan nagpapatlaag sugad hin mga karnero nga waray magbarantay.” (Mateo 9:36) Angayan gud ini nga pagsaysay ha kahimtang han damu nga mga tawo yana nga adlaw nga nag-iilub han nakakaguol nga mga problema nga waray usa nga makakadtoan para han espirituwal nga bulig ngan pagliaw! Kondi an katawohan ni Jehova mayada espirituwal nga bulig, kay hiya nagsaad: “Ako magbubutang ha ira hin mga magbarantay nga magmamangno ha ira; ngan diri na hira mahahadluk, diri na man hira mahuhulop, ngan waray usa nga mawawara.”—Jeremias 23:4.
18. Kay ano nga sadang dumaop kita ha usa nga tigurang kon kinahanglanon naton an espirituwal nga bulig?
18 Kilalaha an pinili nga mga tigurang ha kongregasyon. Mayada hira daku nga eksperiensia ha pag-aplikar han kahibaro han Dios, kay nadadangat nira an mga kalipikasyon para han mga paramangno nga iginsasaysay ha Biblia. (1 Timoteo 3:1-7; Tito 1:5-9) Ayaw pag-alang ha pagdaop ha usa ha ira kon kinahanglan mo an espirituwal nga bulig basi malamposan an usa nga batasan o kinaiya nga nakontra ha mga kinahanglanon han Dios. Makikita mo nga ginsusunod han mga tigurang an sagdon ni Pablo: “Magyakan hin nakakaliaw ha mga kalag nga naguguol, parig-ona an maluya, magin mainantuson ha ngatanan.”—1 Tesalonika 2:7, 8; 5:14.
PAHIMULOSI AN KASIGUROHAN UPOD HAN KATAWOHAN NI JEHOVA
19. Ano nga mga bendisyon an iginhahatag ni Jehova ngada hadton namimiling hin kasigurohan ha sulod han iya organisasyon?
19 Bisan kon nag-uukoy kita yana ha butnga han diri-hingpit nga mga kahimtang, hi Jehova nagtatagana ha aton hin espirituwal nga pagkaon, panapton, ngan urukyan. Siyempre, kinahanglan maghulat kita han iginsaad han Dios nga bag-o nga kalibotan basi makaeksperiensia han mga kapulsanan han pisikal nga paraiso. Kondi adton bahin han organisasyon ni Jehova nagpapahimulos na yana han kasigurohan han usa ka espirituwal nga paraiso. Mahitungod ha ira, hi Esekiel nagtagna: “Hira mag-uukoy ha kasigurohan, nga waray usa nga maghahadluk ha ira.”—Esekiel 34:28; Salmo 4:8.
20. Paonan-o babalusan ni Jehova an bisan ano nga butang nga iginsakripisyo mo tungod ha pagsingba ha iya?
20 Mapasalamaton gud kita nga hi Jehova naghihimo hin mahigugmaon espirituwal nga mga tagana pinaagi han iya Pulong ngan organisasyon! Magin duok ha katawohan han Dios. Ayaw paglikay ha pagbuhat hito tungod ha kahadluk ha kon ano an bangin hunahunaon han imo mga sangkay o mga paryente mahitungod han imo pagkarawat han kahibaro han Dios. Bangin an iba diri nauyon tungod kay nakikig-upod ka ha mga Saksi ni Jehova ngan natambong ha mga katirok ha Kingdom Hall. Kondi labaw nga babalusan han Dios an bisan ano nga butang nga iginsakripisyo mo tungod ha pagsingba ha iya. (Malakias 3:10) Dugang pa, hi Jesus nagsiring: “Waray usa nga binaya ha balay o kabugtoan nga kalalakin-an o kababayin-an o iroy o amay o mga anak o kaumhan tungod ha akon ngan tungod han maopay nga sumat nga diri makarawat hini nga panahon hin usa ka gatos ka pilo, nga mga balay ngan kabugtoan nga kalalakin-an ngan kababayin-an ngan mga iroy ngan mga anak ngan kaumhan, upod an mga pagtimaraut, ngan ha maabot nga sistema han mga butang kinabuhi nga waray kataposan.” (Markos 10:29, 30) Oo, bisan ano nga imo binayaan o kinahanglan ilubon, malilipay ka ha pakig-upod ngan ha espirituwal nga kasigurohan ha butnga han katawohan han Dios.
SARIHI AN IMO KAHIBARO
Hin-o “an matinumanon ngan maaramon nga uripon”?
Ano nga tagana an ginhihimo ni Jehova ha pagpakaon ha aton ha espirituwal?
Paonan-o makakabulig ha aton adton aada ha Kristiano nga kongregasyon?
[Mga Pakiana]
[Bug-os-pahina nga piktyur ha pahina 165]
