PAUROUTRO nga iginpapariho ni Jehova an iya kalugaringon hito nga paraataman hin karnero. Pinaagi han iya Pulong, ginpapasarig kita niya: “Ako ngahaw an mamimiling han akon mga karnero ngan magmamangno ako ha ira.”​—Ezequiel 34:11, 12, Maupay nga Sumat.

Hin-o an mga karnero ni Jehova? Hira amo adton mga tawo nga nahigugma ngan nagsisingba ha iya. An Biblia nasiring: “Pagsingba kita ngan dumukó; Pagluhod kita ha atubangan ni Jehova nga aton Magburuhat. Kay hiya amo an aton Dios, ngan hi kita an mga tawo han iya panabsaban, ngan an mga karnero han iya mga kamot.” (Salmo 95:6, 7) Pariho ha literal nga karnero nga nasunod ha paraataman, an mga magsiringba ni Jehova andam sumunod ha ira Paraataman. Pero pirme ba hira nakakasunod? Diri. Usahay, an mga surugoon han Dios nagigin sugad hin “kakarnerohan nga nagsasarang ha gawas,” ‘nagkakawawara nga mga karnero,’ ngan ‘nahisisimang nga mga karnero.’ (Esekiel  34:12; Mateo 15:24; 1 Pedro 2:25) Bisan pa hito, naglalaom pa gihapon hi Jehova nga mabalik an usa nga nahibulag.

Ginkukonsiderar mo pa ba gihapon hi Jehova sugad nga imo Paraataman? Paonan-o ginpapamatud-an ni Jehova nga hiya an Paraataman yana? Tagda inin tulo nga paagi:

Ginpapakaon kita niya ha espirituwal. “Akon hira tutubongan hin maopay nga sarabsabon,” siring ni Jehova. “Didto hira manluluob ha sakob han maopay nga toril; ngan ha marabong nga sarabsabon hira manginginaon.” (Esekiel 34:14) Hi Jehova diri gud napapakyas ha paghatag ha aton hin makarepresko ngan magkalain-lain nga espirituwal nga pagkaon ha husto nga panahon. May nahuhunahuna ka ba nga usa nga artikulo, pahayag, o video nga nagin baton han imo pag-ampo? Waray ba ito makakombinse ha imo nga nagmamangno ha imo hi Jehova?

Ginpapanalipdan ngan ginbubuligan kita niya. Hi Jehova nagsasaad: “Akon dadad-on pagbalik adton gintabog ha gawas, ngan pagbubugkosan adton napiol, ngan paririg-unon adton masakit.” (Esekiel 34:16) Ginpaparig-on ni Jehova adton nanluluya o nabubug-atan tungod han kabaraka. Sugad hin ginbibendahan niya hira ngan ginbubuligan kon nasasakitan, bangin tungod han ginbuhat han ira mga igkasi-tumuroo. Ngan iginbabalik niya adton nagpapatlaag ngan adton bangin nangangalimbasog pag-ato ha negatibo nga mga pagbati.

Para ha iya, responsabilidad kita niya. “Tatalwason ko hira tikang han mga dapit nga ginsarangan nira,” siring ni Jehova. “Akon pamimilngon adton nawara.” (Ezekiel 34:12, 16; Baraan nga Biblia) Para kan Jehova, may paglaom pa nga bumalik an usa nga nawawara. Maaram hiya kon may nawawara nga karnero, ginbibiling niya ito, ngan nalilipay hiya kon nabibilngan ito. (Mateo 18:12-14) Ngani, gintatawag niya an iya tinuod nga mga magsiringba nga “akon panon, . . . an kakarnerohan nga akon ginmamangnoan.” (Ezekiel 34:31, Baraan nga Biblia) Usa ka hito nga mga karnero.

Kay ano nga ginbibiling ka ni Jehova ngan gin-aaghat nga bumalik ha iya? Kay karuyag niya nga magin malipayon ka. Nagsasaad hiya ha iya mga karnero nga an iya mga bendisyon magigin hura sugad hin uran. (Esekiel 34:26) Masasarigan gud ito nga saad. Napamatud-an mo na mismo ito.

Hinumdumi an imo mga eksperyensya han makilala mo hi Jehova. Pananglitan, ano an imo gin-abat han siyahan mo nga hinbaroan an makaruruyag nga mga kamatuoran mahitungod han ngaran han Dios ngan han iya katuyoan para ha katawohan? Nahinunumdoman mo ba an kalipay han makaupod mo an mga igkasi-Kristiano ha asembleya ngan kombensyon? Han may nasangyawan ka nga nagpakita hin sinsero nga interes, diri ba malipayon ka gud han imo pag-uli?

Mahimo mo abaton utro ito nga kalipay. “Pabalikon mo kami ngada ha imo, O Jehova,” nag-ampo an mga surugoon han Dios ha kadaan nga panahon, “ngan kami mahibabalik; Bag-oha an amon mga adlaw sugad han kadaan.” (Pagtangis 5:21) Ginbaton ito ni Jehova, ngan an iya katawohan binalik ha pag-alagad ha iya nga malipayon. (Nehemia 8:17) Ito liwat an bubuhaton ni Jehova ha imo.

Pero diri masayon an pagbalik kan Jehova sugad han aton ginhuhunahuna. Tagda an pipira nga hinungdan nga nagpapakuri ha pagbalik kan Jehova ngan kon paonan-o ito malalamposan.