MAKAKASIGURO ka nga kakarawaton ka ni Jehova kon bumalik ka ha iya. Bubuligan ka niya nga maatubang an kabaraka, matambal an nasakitan nga emosyon, ngan magkaada kamurayawan ha hunahuna ngan kasingkasing tungod han pagkaada limpyo nga konsensya. Katapos, bangin mapagios ka utro nga mag-alagad kan Jehova kaupod han imo mga igkasi-magsiringba. An imo kahimtang magigin pariho ha pipira nga Kristiano ha siyahan nga siglo nga ginsuratan ni apostol Pedro: “Pariho kamo hin nanhisimang nga mga karnero; kondi yana binalik na kamo ha paraataman ngan paramangno han iyo mga kalag.”​—1 Pedro 2:25.

An pagbalik kan Jehova amo an pinakamaopay nga imo mahihimo. Kay ano? Kay mapapalipay mo an iya kasingkasing. (Proberbios 27:11) Sugad han imo hinbabaroan, may pagbati hi Jehova, salit naaapektohan hiya han aton mga ginbubuhat. Syempre, diri kita niya ginpipirit nga higugmaon hiya ngan mag-alagad ha iya. (Deuteronomio 30:19, 20) Usa nga eskolar ha Biblia an nagsiring: “Waray arabrihan ha gawas han purtahan han kasingkasing han tawo. Kinahanglan ito abrihan ha sulod.” Kon sisingbahon naton hi Jehova nga may kasingkasing nga puno hin gugma, maaabrihan naton ito nga purtahan. Kon bubuhaton naton ito, iginhahatag naton ha iya an pinakapresyoso nga regalo​—an aton pagkamaunungon—​ngan mapapalipay gud naton hiya. Oo, waray gud kapariho an kalipay nga aton naieksperyensyahan ha paghatag kan Jehova han pagsingba nga takos ha iya.​—Buhat 20:35; Pahayag 4:11.

Dugang pa, kon mabalik ka ha imo pag-alagad kan Jehova, matatagbaw an imo espirituwal nga panginahanglan. (Mateo 5:3) Ha ano nga paagi? An mga tawo ha bug-os nga kalibotan naghuhunahuna, ‘Kay ano nga aanhi kita?’ Karuyag gud nira hibaroan an mga baton ha mga pakiana mahitungod ha katuyoan han kinabuhi. An mga tawo may-ada hito nga espirituwal nga panginahanglan tungod kay ginlarang hira ni Jehova nga may-ada hito. Gindisenyo kita niya nga malipay ha pag-alagad ha iya. Waray na makakahatag ha aton hin mas daku nga kalipay kay ha paghibaro nga ginsisingba naton hi Jehova tungod kay hinigugma naton hiya.​—Salmo 63:1-5.

Alayon hinumdumi nga karuyag ni Jehova nga bumalik ka ha iya. Paonan-o ka makakasiguro hito? Tagda ini: Ini nga brosyur igin-andam hin maopay upod an damu nga pag-ampo. Iginpabasa ini ha imo bangin han usa nga tigurang o igkasi-tumuroo. Katapos, ginbasa mo ini ngan napagios ka han mensahe hini. Ito ngatanan ebidensya nga diri ka gud hinngangalimtan ni Jehova. Lugod, mahigugmaon nga gin-aaghat ka niya nga bumalik ha iya.​—Juan 6:44.

Maliliaw kita ha paghibaro nga diri gud hinngangalimtan ni Jehova an iya nanhisimang nga mga surugoon. Ito an napamatud-an han bugto nga hi Donna. Hiya nagsiring: “Hinay-hinay nga naipahirayo ako ha kamatuoran, pero ginhinunahuna ko pirme an Salmo 139:23, 24, nga nasiring: ‘Pagsusiha ako, O Dios, ngan hibaroi an akon kasingkasing: Suraya ako, ngan hibaroi an akon mga hunahuna; Ngan kitaa kon may-ada ba ha akon in maraot nga agian, ngan igsulsog ako dida han agian nga waray kataposan.’ Maaram ako nga diri ako bahin han kalibotan, ngan diri gud ako para dida hito, ngan maaram ako nga ha organisasyon ni Jehova ako sadang magpabilin. Nasantop ko nga waray gud ako bayai ni Jehova; kinahanglan ko la mabilngan an dalan tipabalik ha iya. Ngan nalipay gud ako nga nabilngan ko ito!”

Kinasingkasing nga igin-aampo namon nga maeksperyensyahan mo liwat utro ‘an kalipay kan Jehova.’ (Nehemia 8:10) Diri mo gud pagbabasolan an pagbalik ha iya.