Hinigugma nga igkasi-tumuroo:

Sugad han imo hinbabaroan, an Biblia usa nga libro nga kadak-an naghihisgot mahitungod ha mga tawo. Mababasa dida hito an mahitungod ha damu nga matinumanon nga kalalakin-an ngan kababayin-an nga inatubang hin mga problema nga pariho han aton naieksperyensyahan. “May mga pagbati [hira] nga pariho ha aton.” (Santiago 5:17) An pipira nabug-atan han mga problema ngan mga kabaraka. An iba nasakitan gud han ira kapamilya o igkasi-magsiringba. Ngan may-ada liwat duro nga nakonsensya tungod han ira nabuhat nga sala.

Ini ba nga mga indibiduwal bug-os nga binaya na kan Jehova? Waray. Damu ha ira an pariho han salmista nga nag-ampo: “Sinimang ako sugad hin nawara nga karnero; pagbilnga an imo surugoon; Kay diri ko hingangalimtan an imo mga sugo.” (Salmo 119:176) Sugad ba liwat hito an imo inaabat?

Diri gud nahingangalimtan ni Jehova an iya mga magsiringba nga nahibulag ha toril. Ha kabaliktaran, ginbubuligan niya hira—kasagaran pinaagi han ira mga igkasi-tumuroo. Tagda pananglitan kon paonan-o ginbuligan ni Jehova an iya surugoon nga hi Job nga nakaeksperyensya hin damu nga kakurian—problema ha pinansyal, kamatyi hin mga hinigugma, ngan pagkaada grabe nga sakit. Nag-antos liwat hi Job hin nakakasakit nga mga pulong tikang ha mga tawo nga sadang unta sumuporta ha iya. Kondi waray gud hiya bumaya kan Jehova bisan kon may panahon nga nagkaada hiya sayop nga panhunahuna. (Job 1:22; 2:10) Paonan-o hiya ginbuligan ni Jehova?

Gin-gamit ni Jehova an igkasi-tumuroo ni Job nga hi Elihu basi buligan hiya. Han iginpahayag ni Job an iya mga ginkakabarak-an, namati hi Elihu ngan napagios nga magyakan. Ano an iya isisiring? Iya ba bubusaan hi Job o kukonsensyahon o papakaalohan? Gintagad ba ni Elihu an iya kalugaringon nga mas labaw kan Job? Waray gud! Tungod kay ginpagios han espiritu han Dios, hi Elihu nagsiring: “Ikaw ug ako waray kalainan ha atubangan han Dyos, kita nga duha ginhimo tikang hin lapok.” Katapos, iya ginpasarig hi Job: “Diri ka angay mahadlok ha akon; diri ko ikaw pagraraogdaogon.” (Job 33:6, 7, Maupay nga Sumat) Imbes nga dugangan an problema ni Job, mahigugmaon nga iginhatag ni Elihu an sagdon ngan pagdasig nga ginkikinahanglan ni Job.

Karuyag namon ipahibaro ha imo nga ito liwat an amon paagi han igin-andam namon ini nga brosyur. Siyahan, namati anay kami ngan ginkonsiderar namon hin maopay an mga kahimtang ngan mga ginsiring hadton mga nahibulag. (Proberbios 18:13) Sunod, gin-usisa namon an Kasuratan, mainampoon nga gin-adman an mga asoy kon paonan-o ginbuligan ni Jehova an iya mga surugoon ha naglabay han inatubang hira hin pariho nga sitwasyon. Katapos, ito nga mga asoy ha Kasuratan igintampo namon ha mga eksperyensya yana basi maipublikar ini nga brosyur. Mahigugmaon nga gin-aaghat ka namon nga basahon ini. Alayon karawata an amon sinsero nga gugma ha imo.

Nagmamando nga Lawas han mga Saksi ni Jehova