AN NGATANAN apektado han kabaraka, bisan an katawohan han Dios. “Nababaraka, nagugupong ako,” nagsurat an salmista. (Salmo 94:19, Maupay nga Sumat) Ngan hi Jesus nagsiring nga durante han panahon han kataposan, an “mga kabaraka ha kinabuhi” mas magpapakuri ha pag-alagad kan Jehova. (Lucas 21:34) Kumusta ka man? Nabubug-atan ka ba tungod han mga problema ha kwarta, pamilya, o kahimsog? Paonan-o ka mabubuligan ni Jehova?

Kon ha aton la pangalimbasog, diri naton maaatubang an aton mga kabaraka. “Gin-iipit kami ha ngatanan nga paagi,” siring ni apostol Pablo. “Ginsasamok kami . . . ; gintutumba kami.” Kondi nagsiring liwat hiya nga “diri [kami] naiipit nga diri na nakakagios,” “diri nga waray na gud magagawsan,” ngan “diri nabubungkag.” Ano an nabulig ha aton nga makailob? “An diri-ordinaryo nga gahum”​—an gahum nga nagtitikang ha aton makagarahum-ha-ngatanan nga Dios, hi Jehova.​—2 Corinto 4:7-9.

Pamalandonga kon paonan-o ka hadto nakakarawat hin “diri-ordinaryo nga gahum.” May nahinunumdoman ka ba nga makapadasig nga pahayag nga nagpahilarom han imo apresasyon ha maunungon nga gugma ni Jehova? Mas nagrig-on ba an imo pagtoo ha mga saad ni Jehova han gintutdoan mo an iba mahitungod han paglaom nga Paraiso? Kon natambong kita ha Kristiano nga mga katirok ngan iginsusumat ha iba an aton gintotoohan, napaparig-on kita nga magpadayon bisan pa han mga kabaraka ha kinabuhi ngan nagkakaada kita kamurayawan ha hunahuna, salit nakakag-alagad kita kan Jehova nga malipayon.

Ha pagkatinuod, bangin nawuwurok ka kon ano an imo sadang unahon. Pananglitan, ginhahangyo kita ni Jehova nga unahon an pagpamiling han Ginhadian ngan tipigan an aton espirituwal nga rutina. (Mateo 6:33; Lucas 13:24) Kondi ano man kon nalilimitahan an imo nahihimo tungod han pagkontra, maluya nga kahimsog, o problema ha pamilya? O ano man kon nauubos na han imo sekular nga trabaho an imo oras ngan kusog nga para unta ha kongregasyon? Tungod han damu hinduro nga buruhaton, kondi gutiay la an imo oras ngan kusog, bangin mabug-atan ka. Bangin maghunahuna ka pa ngani nga daku hinduro an ginlalaoman ha imo ni Jehova.

Masinabuton hi Jehova. Diri gud hiya naglalaom hin sobra kay han aton mahihimo. Ngan maaram hiya nga ginkikinahanglan an panahon basi malamposan naton an istres ha pisikal ngan ha emosyon.​—Salmo 103:13, 14.

Tagda pananglitan kon paonan-o ginbuligan ni Jehova hi propeta Elias. Han hi Elias nasubo hinduro ngan nahadlok nga tungod hito pinalagiw hiya ngadto ha kamingawan, gin-isgan ba hiya ni Jehova ngan ginsugo nga bumalik ha iya toka? Waray. Duha ka beses nga nagsugo hi Jehova hin anghel basi hinay-hinay nga pukawon hi Elias ngan tagan hin pagkaon. Bisan pa hito, paglabay hin 40 ka adlaw, nababaraka ngan nahahadlok la gihapon hi Elias. Ano pa an ginbuhat ni Jehova  basi buligan hiya? Siyahan, iginpakita ni Jehova nga mapuproteksyonan niya hi Elias. Ikaduha, ginliaw niya hi Elias pinaagi hin kalmado ngan “gutiay nga tingog.” Ikatulo, ginsumatan niya hi Elias nga may yinukot nga iba pa nga matinumanon nga nagsisingba ha Dios. Waray pag-iha, nagin madasigon utro hi Elias. (1 Hadi 19:1-19) Ano an aton mahibabaroan hini? Han nabug-atan hi Elias han mga kabaraka, nagin mapailubon ngan mapinairon hi Jehova ha iya. Hi Jehova diri nagbabag-o. Ginmamangnoan kita niya ha pariho nga paagi.

Kon ginhuhunahuna mo kon ano an imo maihahatag kan Jehova, magin reyalistiko. Ayaw itanding an imo nahihimo yana ha imo nahihimo hadto. Ha pag-ilustrar: An atleta nga inundang ha iya training ha sulod hin pipira ka bulan o tuig diri dayon makakabalik ha iya rutina hadto. Lugod, ginkukondisyon anay niya an iya lawas basi magin marig-on ngan makailob. An mga Kristiano pariho hin mga paradalagan. Nagbabansay hira nga may matin-aw nga tumong. (1 Corinto 9:24-27) Kay ano nga diri magkab-ot hin espirituwal nga tumong nga posible mo makab-ot yana? Pananglitan, puydi mo himoon nga tumong nga tumambong hin katirok ha kongregasyon. Pangaro hin bulig kan Jehova nga makab-ot ito. Samtang naibabalik an imo kadasig ha pag-alagad, imo ‘matitilawan ngan makikita nga hi Jehova maopay.’ (Salmo 34:8) Hinumdumi nga bisan ano nga imo ginbubuhat nga nagpapakita han imo gugma kan Jehova​—bisan kon baga hin gutiay la ito—​ginpapabilhan gud niya.​—Lucas 21:1-4.

Paonan-o ginpakusog ni Jehova hi June nga bumalik ha iya? Hi June nagsiring: “Nag-inampo ako kan Jehova ngan nangaro hin bulig ha iya. Katapos, ginsumatan ako han akon umagad nga may asembleya ha amon bungto. Nagdesisyon ako nga tumambong hin usa ka adlaw. Makalilipay gud nga makaupod utro an katawohan ni Jehova! Ito nga asembleya amo an pagparig-on nga maiha ko na nga ginhihinulat. Yana, malipayon nga nag-aalagad na ako utro kan Jehova. Mas may katuyoan na gud an akon kinabuhi. Labaw ha ngatanan, nasantop ko nga kinahanglan ko an kabugtoan ngan an ira bulig. Maopay na la nga may panahon pa ako ha pagbalik.”