AN PAG-ABAT hin pagin salaan mahimo magin mabug-at nga pinas-an. “An akon mga karat-an inagi ha bawbaw han akon ulo,” siring ni Hadi David. “Sugad hin mabug-at nga dinara namumug-at ha bawbaw nakon.” (Salmo 38:4) An pipira nga Kristiano nabubug-atan tungod han duro nga kasubo; pag-abat nira diri na gud hira mapapasaylo ni Jehova. (2 Corinto 2:7) Husto ba ito? Kon nakabuhat ka hin seryoso nga mga sala, hirayo ka na gud ba kan Jehova nga tungod hito diri ka na niya mapapasaylo? Diri!

Diri iginsasalikway ni Jehova an mabinasulon nga nakabuhat hin sala. Hiya pa ngani an nahirani ha ira! Ha parabola mahitungod han makaragon nga anak, iginpariho ni Jesus hi Jehova ha mahigugmaon nga amay nga may anak nga nagrebelde ngan nagpili hin maraot nga pagkinabuhi. Inabot an panahon, nagdesisyon an anak nga umuli. “Han hirayo pa [an anak], nakit-an hiya han iya tatay ngan nalooy ha iya. Dinalagan an iya tatay ngan mahigugmaon nga ginhangkopan ngan ginharokan hiya.” (Lucas 15:11-20) Karuyag mo ba magin duok kan Jehova kondi inaabat mo nga “hirayo” ka la gihapon ha iya? Pariho ha amay ha ilustrasyon ni Jesus, hi Jehova nahigugma ngan nalolooy ha imo. Karuyag gud niya nga bumalik ka ha iya.

Kondi ano man kon para ha imo seryoso gud o damu hinduro an imo sala basi pasayloon ni Jehova? Alayon tagda an imbitasyon ni Jehova ha Isaiyas 1:18 (Baraan nga Biblia): “Pakadi kamo, tuhayon ta ini ngatanan, nasiring an Ginoo: Bisan an iyo mga kasal-anan daw sugad na an kolor hin dugo, magmamabusag ini daw sugad hin yelo.” Oo, bisan an mga sala nga sugad hin dugo o eskarlata dida ha busag nga panapton nga baga hin imposible mapara, mapapasaylo ito ni Jehova.

Diri karuyag ni Jehova nga padayon ka nga mag-antos tungod ha pag-abat hin pagin salaan. Kon sugad, paonan-o ka magkakaada kamurayawan nga resulta han kapasayloan han Dios ngan pagkaada limpyo nga konsensya? Tagda an duha nga paagi nga ginbuhat ni Hadi David. Siyahan, hiya nagsiring: “Ig-aasoy ko an akon mga pagsupak kan Jehova.” (Salmo 32:5) Hinumdumi, maiha ka na nga gin-iimbitar ni Jehova nga humirani ha iya pinaagi ha pag-ampo ngan ‘tuhayon niyo an ngatanan.’ Karawata ito nga imbitasyon. Isumat kan Jehova an imo mga sala ngan an imo inaabat. Tungod han naeksperyensyahan ni David, may pagsarig hiya nga nakag-ampo: ‘Hamisi ako han akon sala. An ruba nga kasingkasing, O Dios, diri mo pagtatamayon.’​—Salmo 51:2, 17.

Ikaduha, ginkarawat ni David an bulig tikang ha pinili nga representante han Dios, hi propeta Natan. (2 Samuel 12:13) Yana, nagtatagana hi Jehova hin mga tigurang ha kongregasyon nga ginbansay basi buligan an nagbabasol nga mga nakasala nga maibalik an ira maopay nga relasyon kan Jehova. Kon magpapabulig ka ha mga tigurang, gagamiton nira an Kasuratan ngan sinsero nga mag-aampo  para ha imo basi magkaada kamurayawan an imo kasingkasing, maibanan o mawara an imo negatibo nga mga pagbati, ngan mabuligan ka nga matambal ha espirituwal.​—Santiago 5:14-16.

Oo, bangin umabat ka nga an pagsumat han imo mga sala kan Jehova nga Dios ngan an pagdaop ha mga tigurang usa han pinakamakuri nga butang nga imo bubuhaton. Sugad liwat hito an gin-abat ni David. ‘Nagmingaw’ o waray niya igsumat an iya mga sala ha sulod hin pipira ka panahon. (Salmo 32:3) Kondi, nakita niya an kapulsanan ha pagsumat han iya mga sala ngan pagtadong han iya pagkinabuhi.

Usa han pinakadaku nga kapulsanan han pagsumat ni David han iya mga sala amo an kahibalik han iya kalipay. Hiya nagsurat: “Bulahan adto hiya nga an iya pagsupak ginpasaylo; Adto nga an iya sala gintabonan.” (Salmo 32:1) Nag-ampo liwat hiya: “O Ginoo, imo buk-on an akon mga im-im; Ngan an akon baba magpapahayag han imo dayaw.” (Salmo 51:15) Tungod kay diri na nag-aantos hi David ha pag-abat hin pagin salaan ngan tungod kay mapasalamaton hiya ha kapasayloan han Dios, napagios hiya nga isumat ha iba an mahitungod kan Jehova.

Karuyag ni Jehova nga maeksperyensyahan mo an kamurayawan nga resulta han limpyo nga konsensya. Ngan karuyag niya isumat mo ha iba an mahitungod ha iya ngan han iya katuyoan nga diri naabat hin pagin salaan, kondi kinasingkasing ngan may daku nga kalipay. (Salmo 65:1-4) Hinumdumi nga nagtatanyag hiya ha imo nga ‘papasayloon an imo mga sala, basi umabot ha imo an panahon han pagrepresko tikang kan Jehova.’​—Buhat 3:19.

Ito an nahitabo kan Martha. Hiya nagsiring: “Ginpapadad-an ako pirme han akon anak hin Barantayan ngan Pagpamata! nga mga magasin. Hinay-hinay nga nagin duok ako utro kan Jehova. An pinakamakuri nga bahin ha pagbalik amo an pangaro hin pasaylo han ngatanan nga sala nga akon nahimo. Kondi ha urhi, dinaop ako ha Dios pinaagi ha pag-ampo ngan naghangyo ha iya nga pasayloon ako. Diri ako makatoo nga naglabay anay an 40 ka tuig antes ako bumalik kan Jehova. An akon eksperyensya nagpapamatuod nga bisan kon lumabay an damu ka tuig, mahimo pa gihapon magkaada higayon an usa nga mag-alagad ngan higugmaon utro han Dios.”