INAABAT mo ba an inabat ni Linda nga nasakitan gud han ginbuhat han iya igkasi-tumuroo? Makasurubo, may pipira nga nahipapakdol tungod han panggawi han iba, ngan naaapektohan hito an ira espirituwalidad. Nahitabo na ba ito ha imo?

Ha pagkatinuod, bangin makurian gud kita ha pagpasaylo ha usa nga igkasi-tumuroo nga nakasakit ha aton. Kondi an mga Kristiano sadang maghigugmaay ha usa kag usa. (Juan 13:34, 35) Kon may igkasi-tumuroo nga makabuhat ha aton hin sayop, an kasubo ngan kasakit nga resulta hito mahimo makapaluya gud ha aton.—Salmo 55:12.

Syempre, may mababasa kita ha Biblia nga usahay an mga Kristiano ‘may hinungdan ha pagreklamo kontra ha iba.’ (Colosas 3:13) Kondi kon mahitabo ito ha aton, bangin makurian kita ha pag-atubang hito. Ano an makakabulig ha aton? Tagda an tulo nga prinsipyo ha Biblia:

An aton langitnon nga Amay maaram han ngatanan. Nakikita ni Jehova an ngatanan nga nahitatabo, pati na an kawaray-hustisya nga aton naieksperyensyahan ngan an pag-antos nga resulta hito. (Hebreo 4:13) Dugang pa, naaabat ni Jehova an aton kasakit kon nag-aantos kita. (Isaias 63:9) Diri gud niya tutugotan an ‘kakurian o kasakitan’ o an bisan ano​—bisan pa an iya mga surugoon—​nga ‘makagbulag ha aton ha gugma han Dios.’ (Roma 8:35, 38, 39) Diri ba kita napapagios nga diri liwat tugotan an bisan ano o bisan hin-o nga makagbulag ha aton tikang kan Jehova?

An pagpasaylo diri pagkonsinter. Kon nagpapasaylo kita hadton nakasala ha aton, diri karuyag sidngon nga ginpapagaan naton, ginpapakamatadong, ginbabalewaray, o ginkukonsinter an ira nabuhat. Hinumdumi nga hi Jehova diri gud nagkukonsinter hin sala, lugod nagpapasaylo hiya kon may basihan ha pagbuhat hito. (Salmo 103:12, 13; Habakuk 1:13) Kon gin-aaghat kita ni Jehova nga pasayloon an iba, ginhahangyo kita niya nga subaron hiya. ‘Diri hiya nagtitipig hin kasina ha waray kataposan.’​—Salmo 103:9; Mateo 6:14.

Kon diri kita magtitipig hin pagdumot, magpapahimulos kita hito. Ha ano nga paagi? Handurawa ini: Pananglitan, may ginpurot ka nga bato nga mga usa ka kilo an kabug-aton ngan gin-alsa mo ito nga nakaunat an imo kamot. Kon diri la maiha an imo pag-alsa, bangin diri ka kapuyon. Kondi kumusta man kon mag-iha ito? Tubtob san-o mo ito maiilob​—mga pipira ka minuto, usa ka oras, o mas maiha pa? Sigurado nga kakapuyon gud an imo kamot! Syempre, waray magbag-o an kabug-aton han bato. Pero samtang nag-iiha an imo pag-inalsa hito, pag-abat mo nagtitikabug-at ito. Sugad liwat hito an pagdumot. Kon mas maiha nga nagtitipig kita hin pagdumot​—bisan kon gutiay la ito—​mas ginpapakurian naton an aton kalugaringon. Salit diri  urusahon nga gin-aaghat kita ni Jehova nga diri magdumot. Oo, kita mismo an magpapahimulos kon diri kita magtitipig hin pagdumot.​—Proberbios 11:17.

Ano an nakabulig kan Linda nga diri magtipig hin pagdumot bisan pa han ginbuhat han iya igkasi-tumuroo? Iya ginpamalandong an Kasuratanhon nga mga hinungdan ha pagpasaylo. (Salmo 130:3, 4) Labi nga napagios hiya ha pagpasaylo han hinbaroan niya nga kon nagpapasaylo kita, papasayloon liwat kita ni Jehova. (Efeso 4:32–5:2) Nabantad gud hiya hini salit hiya nagsiring: “Baga hin hi Jehova mismo an nakikiistorya ha akon.”

Inabot an panahon, waray na magdumot hi Linda. Kinasingkasing nga napasaylo niya an bugto, ngan yana duok na hira nga magsangkay. Nagpadayon hi Linda ha pag-alagad kan Jehova. Sarig nga bubuligan ka liwat ni Jehova nga mabuhat mo an pariho.