NAKITA mo an kalipay han imo gindudumarahan hin pag-aram ha Biblia han hisabtan niya an kahulogan han teksto nga iyo ginbasa. Katapos hiya siniring, “Karuyag sidngon ba nga an Biblia nagtututdo nga puydi kita mabuhi ha waray kataposan ha Paraiso—dinhi mismo ha tuna?” An imo partner hiniyom ngan siniring, “Aw, ano an imo nabasa ha Biblia?” An imo estudyante nagpilingpiling ha kahipausa ngan siniring, “Diri ako makatoo nga waray ako matutdoi hini!” Nahinumdoman mo nga sugad gihap hito an iya ginyakan ha naglabay nga semana han hibaroan niya nga Jehova an ngaran han Dios.

Nakaeksperyensya ka na ba hin sugad hini? Damu han katawohan han Dios an nakaeksperyensya na hin pariho. Klaro nga nagpapahinumdom ini han aton nakarawat nga presyoso nga regalo—an kahibaro ha kamatuoran! Kondi hunahunaa anay: Paonan-o mo nakarawat ito nga regalo? Dinhi hini nga seksyon uusisahon naton ito nga pakiana. An hinay-hinay nga pakakarawat han katawohan han Dios han espirituwal nga kahayag nagpapamatuod nga tinuod an Ginhadian. Ha sulod hin usa ka siglo, ginsisiguro han Hadi hito nga Ginhadian, hi Jesu-Kristo, nga natututdoan han kamatuoran an katawohan han Dios.