1, 2. Paonan-o iginhayag ni Jehova an iya katuyoan para ha katawohan?

IGIN-UUPOD han mahigugmaon nga mga kag-anak an ira mga anak ha paghisgot may kalabotan han ira pamilya. Kondi maaramon nga gintatagad nira kon ano kadamu nga impormasyon an ira isusumat; adton mahisasabtan la han ira mga anak.

² Ha pariho nga paagi, hinay-hinay nga iginhahayag ni Jehova an iya katuyoan ha mga tawo. Kondi, iya la ginbubuhat ito kon para ha iya ito an husto nga panahon. Tagdon naton kon paonan-o niya iginhahayag an mga kamatuoran mahitungod han Ginhadian ha paglabay han panahon.

3, 4. Itinanda ba nga daan ni Jehova an mahitatabo ha mga tawo? Isaysay.

³ Ha tinikangan, an Mesianiko nga Ginhadian diri bahin han katuyoan ni Jehova. Kay ano? Kay waray ni Jehova itanda nga daan an dalagan han kasaysayan han tawo. Ngani, iya ginlarang an tawo nga may kagawasan ha pagdesisyon. Salit iya ginsumatan hira Adan ngan Eva han iya katuyoan: “Magmabungahon kamo ngan magdamu ngan pun-on niyo an tuna.” (Gen. 1:28) Ginsugo liwat niya hira nga tahuron an iya suruklan han maopay ngan maraot. (Gen. 2:16, 17) Posible unta nira pilion nga magin maunungon. Kon nagin maunungon hira pati an ira mga anak, diri naton pagkikinahanglanon an Ginhadian nga mamandoan han Kristo ha pagtuman han katuyoan han Dios. An kalibotan unta yana puno hin hingpit nga tawo nga nagsisingba kan Jehova.

⁴ Bisan kon nagrebelde hira Satanas, Adan, ngan Eva, waray magbag-o an katuyoan ni Jehova ha pagpuno han tuna hin hingpit nga katawohan. Lugod, ginamit hiya hin iba nga paagi ha pagtuman hito. An iya katuyoan diri pariho hin tren nga nasubay la ha riles basi makadangat ha destinasyon hito, ngan diri ito nadidiskaril tungod han mga buhat han iba. Kon ipahayag na ni Jehova an iya katuyoan, waray bisan ano ha uniberso an makakapugong han katumanan hito. (Basaha an Isaias 55:11.) Kon may mag-ulang han usa nga paagi ni Jehova, magamit hiya hin iba. * (Eks. 3:14, 15) Ngan kon para ha iya angayan, iya igpapahibaro  ha iya maunungon nga mga surugoon an bag-o nga paagi nga iya gagamiton ha pagtuman han iya katuyoan.

5. Ano an ginbuhat ni Jehova tungod han pagrebelde ha Eden?

⁵ Tungod han pagrebelde ha Eden, nagin katuyoan ni Jehova an pag-establisar han Ginhadian. (Mat. 25:34) Han baga hin waray na paglaom an mga tawo, iginhayag ni Jehova an iya instrumento ha pagpahiuli han katawohan ngan ha pagwara han karaotan tungod han pakyas nga pag-agaw ni Satanas hin gahum. (Gen. 3:14-19) Kondi, waray ihatag ni Jehova an ngatanan nga detalye mahitungod han Ginhadian ha usa la ka higayon.

6. Ano an iginsaad ni Jehova, kondi ano nga detalye an waray niya ihayag?

⁶ Ha siyahan mismo nga tagna ni Jehova, nagsaad hiya nga may usa nga ‘tulin’ nga magdudugmok han serpyente. (Basaha an Genesis 3:15.) Kondi hito nga takna, waray ihayag kon hin-o ito nga tulin ngan kon hin-o an tulin han serpyente. Ngani, waray maghatag hi Jehova hin dugang nga impormasyon mahitungod hito ha sulod hin mga 2,000 ka tuig. *

7. Kay ano nga hi Abraham an ginpili ni Jehova, ngan ano an aton mahibabaroan tikang hini?

⁷ Ha urhi, ginpili ni Jehova hi Abraham sugad nga pagtitikangan han iginsaad nga tulin. Napili hi Abraham kay hiya “nagtuman han [kan Jehova] tingog.” (Gen. 22:18) Ano an iginpapakita hini? Iginhahayag ni Jehova an iya katuyoan ngadto la ha mga tawo nga may kahadlok ha iya.—Basaha an Salmo 25:14.

8, 9. Ano nga impormasyon mahitungod han iginsaad nga tulin an iginhayag ni Jehova kanda Abraham ngan Jacob?

⁸ Han nakiistorya hi Jehova ha iya sangkay nga hi Abraham pinaagi hin anghel, ito an siyahan nga higayon nga iginsumat niya inin importante nga impormasyon mahitungod han iginsaad nga tulin: Usa hiya nga tawo. (Gen. 22:15-17; San. 2:23) Kondi paonan-o dudugmukon hini nga tawo an serpyente? Hin-o an serpyente? An dugang nga kahayag an magbabaton hito.

⁹ Nagdesisyon hi Jehova nga an iginsaad nga tulin magtitikang ha apo ni Abraham nga hi Jacob, usa nga nagpakita hin daku nga pagtoo ha Dios. (Gen. 28:13-22) Pinaagi kan Jacob, iginhayag ni Jehova nga an Usa nga Iginsaad magtitikang kan Juda, an anak ni Jacob. Nagtagna hi Jacob nga ini nga tulin makakakarawat hin “setro,” usa nga tungkod nga nagsisimbolo han awtoridad hin hadi, ngan an “pagsugot han mga katawohan aadto” hini nga tulin. (Gen. 49:1, 10) Pinaagi hito nga deklarasyon, iginpahibaro ni Jehova nga an Usa nga Iginsaad magigin magmarando, usa nga hadi.

10, 11. Kay ano nga iginhayag ni Jehova an iya katuyoan kanda David ngan Daniel?

¹⁰ Mga 650 ka tuig kamatay ni Juda, hi Jehova dugang nga naghayag mahitungod han iya katuyoan ngadto kan Hadi David nga tulin ni Juda. Hi Jehova nagsiring nga hi David tawo nga iya nalilipayan. (1 Sam. 13:14; 17:12; Buh. 13:22) Tungod kay hi David may kahadlok ha Dios, hi Jehova naghimo hin kauyonan ha iya ngan nagsaad nga usa han iya katulinan an magmamando ha kadayonan.—2 Sam. 7:8, 12-16.

 ¹¹ Paglabay hin mga 500 ka tuig, ginsugo ni Jehova hi propeta Daniel ha paghayag han eksakto nga tuig han pag-abot han Usa nga Dinihogan, o Mesias, dinhi ha tuna. (Dan. 9:25) ‘Hinigugma gud’ ni Jehova hi Daniel. Kay ano? Tungod kay hi Daniel nagtahod gud ngan padayon nga nag-alagad kan Jehova.—Dan. 6:16; 9:22, 23.

12. Ano an iginsugo kan Daniel, ngan kay ano?

¹² Bisan kon ginamit ni Jehova an matinumanon nga mga propeta sugad kan Daniel ha pagrekord han detalye mahitungod han iginsaad nga tulin, an Mesias, diri pa adto an iya itinanda nga panahon basi masabtan han iya mga surugoon an bug-os nga kahulogan han iya iginpasurat ha ira. Pananglitan, katapos makarawat ni Daniel an bisyon may kalabotan han kaestablisar han Ginhadian han Dios, ginsugo hiya nga selyohan an tagna tubtob ha itinanda nga panahon ni Jehova. Hiton tiarabot nga panahon, an tinuod nga kahibaro “magdudugang.”—Dan. 12:4.

13. (a) Hin-o an iginsaad nga tulin? (b) Ano an ginklaro ni Jesus may kalabotan ha tagna han Genesis 3:15?

¹³ Klaro nga iginpakilala ni Jehova hi Jesus sugad nga an iginsaad nga tulin tikang kan David nga magmamando sugad nga Hadi. (Luc. 1:30-33; 3:21, 22) Han tikangan ni Jesus an iya ministeryo, sugad hin sumanag an kahibaro mahitungod han katuyoan han Dios. (Mat. 4:13-17) Pananglitan, ginklaro ni Jesus kon hin-o an “halas” nga gin-unabi ha Genesis 3:14, 15, han iya gintawag an Yawa nga “parapamatay” ngan “amay han kabuwaan.” (Juan 8:44) Ha pahayag nga iya iginhatag kan Juan, iya iginpakilala “an orihinal nga halas” sugad nga “an gintatawag nga Yawa ngan Satanas.” * (Basaha an Pahayag 1:1; 12:9.) Hito liwat nga pahayag, iginpakita ni Jesus kon paonan-o niya (an iginsaad nga tulin) tutumanon an tagna nga iginpahayag ha Eden ngan kon paonan-o niya dudugmukon hi Satanas.—Pah. 20:7-10.

14-16. Hinsasabtan ba pirme han mga disipulo han siyahan nga siglo an bug-os nga kahulogan han kamatuoran nga iginhayag ni Jesus? Isaysay.

¹⁴ Sugad han aton hinbaroan ha Kapitulo 1 hini nga libro, damu an iginbuhayhag ni Jesus mahitungod han Ginhadian. Kondi, waray niya isumat an ngatanan nga karuyag hibaroan han iya mga disipulo. Bisan han naghatag hiya hin mga detalye, usahay nalabay pa an damu ka siglo antes masabtan han iya mga sumurunod an bug-os nga kahulogan han mga kamatuoran nga iginpahayag han ira Agaron. Tagda an pipira nga ehemplo.

¹⁵ Han 33 C.E., ginklaro ni Jesus nga an mga magmarando nga makakaupod han Hadi ha Ginhadian han Dios kukuhaon tikang ha tuna ngan babanhawon sugad nga espiritu ha langit. Kondi, waray dayon ini hisabti han iya mga disipulo. (Dan. 7:18; Juan 14:2-5) Hito gihap nga tuig, gumamit hi Jesus hin mga ilustrasyon basi ipatin-aw nga an Ginhadian diri maiestablisar tubtob nga lumabay anay an hilawig nga panahon pagsaka niya ha langit. (Mat. 25:14, 19; Luc. 19:11, 12) Waray ini hisabti han  mga disipulo, salit ha urhi ginpakianhan nira an binanhaw nga hi Jesus: “Igpapahiuli mo ba an Ginhadian ha Israel hini nga panahon?” Kondi hito nga higayon, waray hi Jesus maghatag hin dugang nga detalye. (Buh. 1:6, 7) Igintutdo liwat ni Jesus nga may-ada “iba nga mga karnero” nga diri bahin han “gutiay nga panon” han iya mga igkasi-magmarando. (Juan 10:16; Luc. 12:32) Dida la han maestablisar an Ginhadian han 1914 nga husto nga hinsabtan han mga sumurunod han Kristo kon hin-o inin duha nga grupo.

¹⁶ Damu pa unta an maisusumat ni Jesus ha iya mga disipulo han magkaupod pa hira dinhi ha tuna, kondi maaram hiya nga diri pa nira ito masasabtan. (Juan 16:12) Waray ruhaduha, kadak-an han kahibaro mahitungod han Ginhadian an nahayag han siyahan nga siglo. Kondi, diri pa ito an panahon nga magin hura an sugad nga kahibaro.

17. Basi masabtan an kamatuoran mahitungod han Ginhadian, ano an sadang naton buhaton, kondi ano pa an ginkikinahanglan?

¹⁷ Hi Jehova nagsaad kan Daniel nga ha “panahon ha kataposan,” damu an “madalagan ngadto nganhi, ngan an hibaro” ha katuyoan han Dios magigin hura. (Dan. 12:4) Adton naruruyag hito nga kahibaro sadang mangalimbasog basi makarawat ito. Usa nga reperensya an nasiring nga an Hebreo nga pulong nga “madalagan ngadto nganhi” naghahatag hin ideya mahitungod hin usa nga nag-uusisa hin maopay hin usa nga libro. Kondi bisan pa usisahon hin maopay an Biblia, diri naton bug-os nga masasabtan an mga kamatuoran mahitungod han Ginhadian gawas la kon itugot ito ni Jehova ha aton.—Basaha an Mateo 13:11.

18. Paonan-o nagpakita hin pagtoo ngan pagpaubos an mga may kahadlok kan Jehova?

¹⁸ Hi Jehova hinay-hinay nga naghahayag han mga kamatuoran mahitungod han Ginhadian tubtob han 1914, bisan tubtob  hinin panahon han kataposan. Sugad han makikita ha Kapitulo 4 ngan 5 hini nga libro, ha naglabay nga 100 ka tuig, damu ka beses nga ginbag-o han katawohan han Dios an ira pagsabot. Karuyag sidngon ba hito nga waray hira suporta tikang kan Jehova? Diri! Iya gud hira ginsusuportahan. Kay ano nga masisiring naton ito? Tungod kay adton nahahadlok kan Jehova may-ada mga kalidad nga iya naruruyagan—pagtoo ngan pagpaubos. (Heb. 11:6; San. 4:6) An mga surugoon ni Jehova may pagtoo nga an ngatanan nga saad ha Pulong han Dios matutuman. Nagpapakita hira hin pagpaubos ha pagkarawat nga nagsasayop hira ha pagsabot han eksakto nga katumanan hito nga mga saad. An sugad nga pagkamapainubsanon masasantop ha Marso 1, 1925 nga gowa han The Watch Tower, nga nagsiring: “Maaram kami nga an Ginoo mismo an nag-iinterpretar, ngan mag-iinterpretar han iya Pulong ngadto ha iya katawohan ha iya kalugaringon nga paagi ngan ha iya itinanda nga panahon.”

19. Ano an igintutugot ni Jehova nga masabtan naton yana, ngan kay ano?

¹⁹ Han naestablisar an Ginhadian han 1914, limitado pa an kahibaro han katawohan han Dios kon paonan-o matutuman an mga tagna mahitungod han Ginhadian. (1 Cor. 13:9, 10, 12) Tungod han aton duro nga interes nga makita nga natutuman an mga saad han Dios, usahay nagsasayop kita. Ha paglabay han mga tuig, nagin dayag nga husto an siring han The Watch Tower nga ginkotar kanina. Ito nagsiring: “Baga hin maopay sundon an giya nga masasabtan la naton an tagna kon natuman na ito o aada na ha proseso han katumanan.” Yana nga hirani na gud kita ha kataposan, damu nga tagna may kalabotan ha Ginhadian an natuman na ngan natutuman. Tungod kay an katawohan han Dios mapainubsanon ngan andam kumarawat hin pagtadong, gintutugotan ni Jehova nga magin mas bug-os an aton pagsabot han iya katuyoan. An tinuod nga kahibaro nagigin hura na gud!

20, 21. Ha ano nga paagi an pag-uray ha pagsabot nakaapekto ha mga Kristiano han siyahan nga siglo?

²⁰ Kon gin-uuray ni Jehova an aton pagsabot ha kamatuoran, nasasarihan an aton kasingkasing. Mapapagios ba kita han pagtoo ngan pagpaubos ha pagkarawat han pagbag-o? An mga Kristiano han siyahan nga siglo inatubang han sugad nga pagsari. Pananglitan, hunahunaa nga Judio ka nga Kristiano hadto. Gintatahod mo an Mosaiko nga Balaud ngan iginpapasigarbo an imo nasyonalidad. Kondi nakakarawat ka hin giniyahan nga surat tikang kan apostol Pablo nga nasiring nga diri na ipapatuman an Balaud ngan isasalikway na ni Jehova an natural nga Israel basi magtirok hin espirituwal nga Israel nga ginkukompwesto hin mga Judio ngan mga Hentil. (Roma 10:12; 11:17-24; Gal. 6:15, 16; Col. 2:13, 14) Ano an imo magigin reaksyon?

²¹ Ginkarawat han mapainubsanon nga mga Kristiano an giniyahan nga surat ni Pablo, ngan ginbendisyonan hira ni Jehova. (Buh. 13:48) An iba nagdumiri hito ngan nagpabilin ha ira kalugaringon nga pagsabot. (Gal. 5:7-12) Kon diri nira babag-uhon an ira panhunahuna, mawawad-an hira han higayon nga makaupod an Kristo ha pagmando.—2 Ped. 2:1.

22. Ano an imo reaksyon may kalabotan ha mga pagbag-o ha aton pagsabot han katuyoan han Dios?

²² Hinin naglabay nga mga dekada, gin-uray ni Jehova an aton pagsabot mahitungod han Ginhadian. Pananglitan, ginbuligan kita niya nga mas masabtan kon san-o an magigin mga sakop han Ginhadian ibubulag ha mga diri makinarawaton, sugad la nga an karnero ibubulag ha kanding. Gintutdoan liwat kita niya kon san-o makukompleto an 144,000, kon ano an kahulogan han mga ilustrasyon ni Jesus mahitungod han Ginhadian, ngan kon san-o babanhawon an ultimo nga dinihogan para ha kinabuhi ha langit. * Paonan-o mo ginkarawat an sugad nga mga pagbag-o? Naparig-on ba an imo pagtoo? Gintatagad mo ba ito sugad nga ebidensya nga padayon nga gintututdoan ni Jehova an iya mapainubsanon nga katawohan? An masunod nga mga impormasyon dinhi hini nga libro magpaparig-on han imo pagtoo nga padayon nga iginhahayag ni Jehova an iya katuyoan ha mga nahadlok ha iya.