1, 2. Ano nga daku nga buruhaton an igintagna ni Jesus, ngan ano nga importante nga pakiana an nabangon?

AN MGA politiko agsob magsaad pero diri nagtutuman. Bisan adton mag-opay an motibo napapakyas ha pagtuman han ira saad. Ha kabaliktaran, makalilipay nga an Mesianiko nga Hadi, hi Jesu-Kristo, pirme nagtutuman han iya mga saad.

² Han maghadi hi Jesus han 1914, andam hiya pagtuman han iya igintagna mga 1,900 ka tuig na an naglabay. Diri maiha antes hiya mamatay, hiya nagtagna: “Inin maopay nga sumat han Ginhadian isasangyaw ha bug-os nga inuukyan nga tuna.” (Mat. 24:14) An katumanan hito magigin bahin han tigaman han iya presensya sugad nga Hadi han Ginhadian. Kondi, ini an importante nga pakiana: Paonan-o an Hadi makakag-organisar hin panon han kinaburut-on nga magsarangyaw ha kataposan nga mga adlaw—an panahon diin an mga tawo kalugaringon la an gintatagad, waray gugma, ngan waray pagtagad ha Dios? (Mat. 24:12; 2 Tim. 3:1-5) Kinahanglan naton hibaroan an baton hito tungod kay apektado an ngatanan nga tinuod nga Kristiano.

3. Ano nga pagsarig an iginpahayag ni Jesus, ngan kay ano nga may-ada hiya sugad nga pagsarig?

³ Aton usisahon utro an tagna ni Jesus. An pulong ba nga “isasangyaw” nagpapahayag hin pagsarig? Oo! Sigurado hi Jesus nga ha kataposan nga mga adlaw, magkakaada hiya sumurunod nga kinaburut-on nga maghahatag han ira kalugaringon. Kay ano nga may-ada hiya sugad nga pagsarig? Kay nasubad niya ito ha iya Amay. (Juan 12:45; 14:9) Han waray pa matawo hi Jesus, nakita niya mismo hi Jehova nga may pagsarig ha kinaburut-on nga pagbuhat han Iya mga magsiringba. Aton kitaon kon paonan-o iginpahayag ni Jehova an sugad nga pagsarig.

4. Ano nga buruhaton an igin-aghat ni Jehova nga suportahan han mga Israelita, ngan paonan-o hira ginios?

⁴ Hinumdumi an nahitabo han ginsugo ni Jehova hi Moises ha pagtukod han tabernakulo, o tolda—an magigin sentro han pagsingba han nasud han Israel. Pinaagi kan Moises, gin-aghat ni Jehova an ngatanan nga suportahan an buruhaton. Hi Moises nagsiring: “Bisan hin-o nga may talinguha ha iya kasingkasing magdara hiya kan Jehova.” Ano an resulta? An katawohan padayon nga “nagdara . . . ha tagsa ka aga hin mga halad nga ha kaburut-on.”  Damu gud an ira iginhatag salit kinahanglan hira ‘pugngan ha pagdara’! (Eks. 35:5; 36:3, 6) Ginpamatud-an han mga Israelita nga husto hi Jehova ha pagsarig ha ira.

5, 6. Sumala ha Salmo 110:1-3, ano nga disposisyon an ginlalaoman ni Jehova ngan ni Jesus nga makita ha tinuod nga magsiringba ha panahon han kataposan?

⁵ Naglalaom ba hi Jehova nga makakita hin sugad nga kinaburut-on nga disposisyon ha iya mga magsiringba hinin kataposan nga mga adlaw? Oo! Sobra 1,000 ka tuig antes matawo hi Jesus, gin-giyahan ni Jehova hi David ha pagsurat mahitungod han panahon han pagtikang ha paghadi han Mesias. (Basaha an Salmo 110:1-3.) Magkakamay-ada mga kaaway an Hadi nga hi Jesus. Kondi, magkakaada liwat hiya katawohan nga masuporta ha iya. Diri hira kinahanglan piriton ha pag-alagad ha iya. Bisan an kabataan kinaburut-on nga maghahatag han ira kalugaringon ngan magigin daku hinduro nga kadam-an salit maipapariho ha diri maihap nga tun-og nga nagpuputos han tuna ha kaagahon. *

⁶ Maaram hi Jesus nga an tagna ha Salmo 110 mahitungod ha iya. (Mat. 22:42-45) Salit nasarig hiya nga magkakaada hiya maunungon nga mga surugoon nga kinaburut-on nga maghahatag han ira kalugaringon ha pagsangyaw han mensahe ha bug-os nga tuna. Natuman gud ba ito? Nakag-organisar ba an Hadi hin sugad nga katawohan hinin kataposan nga mga adlaw?

7. Katapos mahitrono hi Jesus sugad nga Hadi, paonan-o niya igin-andam an iya mga sumurunod para ha tiarabot nga buruhaton?

⁷ Waray pag-iha katapos mahitrono hi Jesus sugad nga Hadi, iya igin-andam an iya mga sumurunod para ha daku nga buruhaton. Sumala ha Kapitulo 2, tikang han 1914 tubtob ha temprano han 1919, naghimo hi Jesus hin pag-usisa ngan paglimpyo nga buruhaton. (Mal. 3:1-4) Katapos, han 1919, iya gintokahan an matinumanon nga uripon nga manguna ha iya mga sumurunod. (Mat. 24:45) Labi na tikang hito nga panahon, nagtikang  an uripon ha pagtagana hin espirituwal nga pagkaon—pinaagi hin mga pahayag ha mga kombensyon ngan hin mga publikasyon—nga pauroutro nga nagpapabug-at han responsabilidad han ngatanan nga Kristiano ha personal nga pakigbahin ha pagsangyaw.

8-10. Paonan-o ginpabug-atan han mga kombensyon an pagsangyaw nga buruhaton? Paghatag hin ehemplo. (Kitaa liwat an kahon nga “ Mga Kombensyon nga Nagpakita han Importansya han Pagsangyaw.”)

⁸ Mga pahayag ha kombensyon. Tungod kay naghihingyap ha pagkarawat hin instruksyon, an mga Estudyante han Biblia nagkatirok ha Cedar Point, Ohio, E.U.A., tikang han Septyembre 1 tubtob 8, 1919, para han ira siyahan nga daku nga kombensyon katapos han Girra ha Kalibotan I. Ha diskurso ni Bugto Rutherford ha ikaduha ka adlaw, hiya prangka nga nagsiring: “An misyon han usa nga Kristiano ha tuna . . . amo an pagpasamwak han mensahe han ginhadian han Ginoo.”

⁹ Paglabay hin tulo ka adlaw, sugad nga an ginpapamulat nga bahin han kombensyon, nagpahayag hi Bugto Rutherford ha ulohan, “Pahayag Para ha mga Igkasi-Magburuhat,” nga iginpublikar ha The Watch Tower ha ulohan nga “Nagpapasamwak han Ginhadian.” Hiya nagsiring: “Kon namamalandong an usa nga Kristiano natural la nga magpakiana hiya, Kay ano nga aanhi ako ha tuna? Ngan kinahanglan an iya baton amo ini, Tungod han kalooy han Ginoo, iya ako ginhimo nga embahador basi igwali ha kalibotan an mensahe han Dios ha pakighiuli, ngan pribilehiyo ngan responsabilidad ko an pagpasamwak hito nga mensahe.”

¹⁰ Hiton makasaysayan nga diskurso, iginpahibaro ni Bugto Rutherford an pagpublikar han bag-o nga magasin nga The Golden Age (Pagpamata! na yana), basi giyahan an mga tawo ngadto ha Ginhadian sugad nga an amo la nga paglaom. Katapos nagpakiana hiya kon hin-o an naruruyag makigbahin ha pagpanaltag han magasin. An report mahitungod han kombensyon nagsiring: “Makalilipay gud an nagin reaksyon. Ngatanan han unom ka yukot nga presente an tumindog.” * Klaro, an Hadi may-ada katawohan nga andam pagpasamwak han iya Ginhadian!

11, 12. Ano an ginsiring han The Watch Tower han 1920 may kalabotan ha kon san-o paghihimoon an buruhaton nga igintagna ni Jesus?

¹¹ Inimprinta nga mga publikasyon. Pinaagi han mga pahina han The Watch Tower, nagin mas matin-aw an importansya han buruhaton nga igintagna ni Jesus, an pagsangyaw han maopay nga sumat han Ginhadian. Tagda an pipira hini nga mga pagpatin-aw tikang ha temprano han dekada han 1920.

¹² Ano nga mensahe an ipapasamwak sugad nga katumanan han Mateo 24:14? San-o ito hihimoon? An artikulo nga “Ebanghelyo han Ginhadian” ha Hulyo 1, 1920 nga gowa han The Watch Tower, nagsiring: “An maopay nga sumat nga ginhihisgotan dinhi amo an may kalabotan han kataposan han daan nga sistema ngan han kaestablisar han ginhadian han Mesias.” Klaro nga iginpakita han artikulo kon san-o isasangyaw ini nga mensahe, ha pagsiring: “Ini nga mensahe sadang ipasamwak ha kabutngaan han daku nga girra ha kalibotan [Girra ha Kalibotan I] ngan han ‘daku nga kasakitan.’” Tungod hito, an artikulo nagdugang:  “Panahon na yana . . . ha pagpasamwak hinin maopay nga sumat ngadto ha kahigrayoan ha Kakristianohan.”

13. Paonan-o an The Watch Tower han 1921 nag-aghat ha dinihogan nga mga Kristiano nga may andam nga kasingkasing?

¹³ Mapipiritan ba an katawohan han Dios ha pagbuhat han buruhaton nga igintagna ni Jesus? Diri. An artikulo nga “Magmaisugon Gud,” ha Marso 15, 1921 nga gowa han The Watch Tower, nag-aghat ha dinihogan nga mga Kristiano nga may andam nga kasingkasing. An tagsa ha ira ginsagda nga pakianhan an ira kalugaringon: “Diri ba usa nga daku nga pribilehiyo ngan obligasyon nga makigbahin ako hini nga buruhaton?” An artikulo nagpadayon: “Sigurado gud kami nga kon tatagdon mo ini [sugad nga pribilehiyo ha pakigbahin ha buruhaton] magigin pariho ka kan Jeremias, nga an pulong han Ginoo ha iya kasingkasing nagin ‘sugad hin naglalaga nga kalayo ha [iya] mga tul-an,’ nga nagpagios ha iya salit diri hiya nakakaundang ha pagyakan.” (Jer. 20:9) Iton mahigugmaon nga pagdasig nagpakita han pagsarig ni Jehova ngan ni Jesus ha mga nasuporta han Ginhadian.

14, 15. Ha ano nga paagi an The Watch Tower han 1922 nag-aghat ha dinihogan nga mga Kristiano ha pagsangyaw?

¹⁴ Ha ano nga paagi ipapasamwak han tinuod nga mga Kristiano an mensahe han Ginhadian ngadto ha iba? An halipot kondi mapwersa nga artikulo nga may ulohan, “Importante nga Pag-alagad,” ha Agusto 15, 1922 nga gowa han The Watch Tower nagsagda ha dinihogan nga mga Kristiano nga makigbahin hin “aktibo ha pagdara han inimprinta nga mensahe ngadto ha mga tawo ngan ha pakiistorya ha ira didto ha ira balay, nga nagpapamatuod nga hirani na an ginhadian han langit.”

¹⁵ Matin-aw, tikang han 1919 padayon, ginagamit han Kristo an iya matinumanon ngan maaramon nga uripon basi pauroutro nga pabug-atan nga an pagpasamwak han mensahe han Ginhadian pribilehiyo ngan obligasyon han ngatanan nga Kristiano. Kondi, paonan-o ginios an mga Estudyante han Biblia ha pagsagda nga makigbahin ha pagpasamwak hito nga mensahe?

16. Ano an reaksyon han pipira nga tigurang ha ideya nga an ngatanan sadang makigbahin ha ministeryo?

¹⁶ Ha dekada han 1920 ngan 1930, may mga kumontra ha ideya nga an ngatanan nga dinihogan nga Kristiano sadang makigbahin ha ministeryo. An Nobyembre 1, 1927 nga gowa han Watch Tower nagsaysay han nahitabo: “May pipira ha singbahan [kongregasyon] nga may-ada katungdanan sugad nga tigurang . . . nga nadiri pag-aghat ha ira kabugtoan nga makigbahin ha buruhaton, ngan hira liwat mismo nadiri makigbahin hito. . . . Diri nira makarawat an suhestyon nga magbalay-balay ha pagdara han mensahe han Dios, han iya Hadi ngan han iya ginhadian, ngadto ha mga tawo.” An artikulo prangka nga nagsiring: “Panahon na basi tigamnan han mga matinumanon an sugad nga mga tawo ngan likyan hira, ngan sidngan hira nga diri na hira tataporan han responsabilidad ha pagin tigurang.” *

17, 18. Paonan-o ginkarawat han kadam-an ha mga kongregasyon an giya han headquarters, ngan paonan-o ito ginkarawat han minilyon ha naglabay nga 100 ka tuig?

¹⁷ Makalilipay nga kadam-an han membro han mga kongregasyon an sumunod han giya han headquarters. Para ha ira,  pribilehiyo an pagsangyaw han mensahe han Ginhadian. An Marso 15, 1926 nga The Watch Tower nagsiring: “An mga matinumanon magbuboluntaryo . . . ha pagsumat hini nga mensahe ha katawohan.” Gintuman nira an tagna ha Salmo 110:3 ngan ginpamatud-an nga andam hira pagsuporta ha Mesianiko nga Hadi.

¹⁸ Ha naglabay nga sobra 100 ka tuig, minilyon an kinaburut-on nga nagtuman han buruhaton ha pagpasamwak han Ginhadian. Ha sunod nga mga kapitulo, aton paghihisgotan kon ha ano nga paagi hira nagsangyaw—an ira pamaagi ngan mga gin-gamit—ngan kon ano an mga resulta hito. Kondi, paghisgotan anay naton kon kay ano nga minilyon an nagbuboluntaryo ha pakigbahin hini nga buruhaton bisan pa kon ginpapalibotan hira hin mga tawo nga kalugaringon la an gintatagad. Samtang ginhihisgotan naton kon kay ano, pakianhi an imo kalugaringon, ‘Kay ano nga iginsasangyaw ko an maopay nga sumat?’

19. Kay ano nga ginsusunod naton an sugo ni Jesus nga ‘padayon nga unahon an pagpamiling han Ginhadian’?

¹⁹ Ginsugo ni Jesus an iya mga sumurunod nga ‘padayon nga unahon an pagpamiling han Ginhadian.’ (Mat. 6:33) Kay ano nga ginsusunod naton ito? Siyahan, tungod kay maaram kita han importansya han Ginhadian, nga ito an nangunguna ha katuyoan han Dios. Sumala ha naglabay nga kapitulo, hinay-hinay nga iginhahayag han baraan nga espiritu an makalilipay nga mga kamatuoran mahitungod han Ginhadian. Kon nababantad han kamatuoran an aton kasingkasing, naaaghat kita ha pag-una han Ginhadian.

20. Paonan-o ginkarawat han mga sumurunod ni Jesus an sugo nga unahon an Ginhadian sugad han iginpapakita han iya ilustrasyon mahitungod han nakatago nga bahandi?

²⁰ Maaram hi Jesus kon paonan-o kakarawaton han iya mga sumurunod an sugo nga unahon an Ginhadian. Tagda an iya ilustrasyon han nakatago nga bahandi. (Basaha an Mateo 13:44.) Samtang nagtatrabaho an parauma hito nga ilustrasyon, nakabiling hiya hin nakatago nga bahandi ngan nasantop dayon niya an bili hito. Ano an iya ginbuhat? “Tungod han iya kalipay, linakat hiya ngan iginbaligya an iya mga panag-iya ngan ginpalit ito nga uma.” Ano an aton mahibabaroan tikang hito? Han nabilngan naton an kamatuoran han Ginhadian ngan nasantop an bili hito, nalipay kita ha pag-una hito ngan paghimo hin bisan ano nga pagsakripisyo basi magin prayoridad an Ginhadian ha aton kinabuhi. *

21, 22. Paonan-o iginpapakita han maunungon nga mga nasuporta han Ginhadian nga gin-uuna nira ito? Paghatag hin ehemplo.

²¹ Iginpapakita han maunungon nga mga nasuporta han Ginhadian nga gin-uuna nira an Ginhadian diri la ha pulong, kondi ha buhat man. Ira ginagamit an ira kinabuhi, abilidad, ngan panag-iya ha pagsangyaw nga buruhaton. Damu an naghimo hin daku nga pagsakripisyo basi makag-alagad ha bug-os nga panahon. Personal nga naeksperyensyahan hadton nag-uuna han Ginhadian an bendisyon ni Jehova. Tagdon naton an usa nga ehemplo.

 ²² Hira Avery ngan Lovenia Bristow magkaupod nga nag-alagad sugad nga mga colporteur (payunir) ha sur nga bahin han Estados Unidos tikang pa han pag-ikatarapos han dekada han 1920. Ha urhi, hi Lovenia nagsiring: “Pirme kami malipayon ni Avery tikang han magpayunir kami. Damu ka beses nga diri kami maaram kon diin kami han igpapalit hin gasolina o groseri. Pero ha ngatanan nga higayon, hi Jehova pirme nagtatagana. Waray gud kami umundang. Pirme kami may-ada han amon tinuod nga ginkikinahanglan.” Nahinunumdoman pa ni Lovenia an usa ka higayon han nagpayunir hira ha Pensacola, Florida, nga haros waray na hira kwarta ngan groseri. Han umuli hira ha ira treyler, nakita nira an duha ka dagku nga bag nga puno hin groseri ngan may surat, “Love, Pensacola Congregation.” Kon iya ginhihinumdom an mga dekada han iya bug-os-panahon nga pagministeryo, hiya nakakasiring: “Diri gud kita papabay-an ni Jehova. Iya gud babalosan an pagsarig nga aton iginhahatag ha iya.”

23. Paonan-o mo gintatagad an kamatuoran han Ginhadian nga imo nabilngan, ngan ano an imo karuyag buhaton?

²³ Iba-iba an kadamu han panahon nga naihahatag naton ha pagsangyaw. Diri papriho an aton sitwasyon. Pero, pribilehiyo naton ngatanan nga bug-os-kalag nga ipasamwak an maopay nga sumat. (Col. 3:23) Tungod kay aton ginpapabilhan an aton nabilngan nga presyoso nga kamatuoran han Ginhadian, andam kita, oo, disidido ha paghimo hin bisan ano nga sakripisyo basi makag-alagad tubtob han aton mahihimo. Diri ba sugad liwat hito an imo karuyag buhaton?

24. Ano an usa han pinakamakatirigamnan nga nabuhat han Ginhadian hinin kataposan nga mga adlaw?

²⁴ Ha naglabay nga siglo, gintutuman gud han Hadi an iya tagna ha Mateo 24:14. Ngan ginbuhat niya ito nga diri namimirit. Ha paggawas han iya mga sumurunod hini nga kalibotan nga kalugaringon la an gintatagad, hira kinaburut-on nga nagsasangyaw. An ira pagsangyaw han maopay nga sumat ha bug-os nga kalibotan bahin han tigaman han presensya ni Jesus sugad nga Hadi han Ginhadian, ngan usa han pinakamakatirigamnan nga nabuhat han Ginhadian hinin kataposan nga mga adlaw.