1, 2. (a) Kay ano nga nagupong an mga disipulo? (b) Ano nga klase hin pag-ani an ginhihisgotan ni Jesus?

NAGUGUPONG an mga disipulo. Nagsiring hi Jesus ha ira: “Kitaa niyo an kaumhan, hinog na an aranihon.” Han ginkita nira an gintutudlok ni Jesus, nakita nira nga an sebada pagtuturok pa la. Salit bangin nahipausa hira kon ano an aanihon. ‘Pipira pa ka bulan antes mag-ani.’—Juan 4:35.

² Kondi, diri literal nga pag-ani an ginhihisgotan ni Jesus. Lugod, iya ginagamit ito nga higayon ha pagtutdo ha iya mga disipulo hin duha nga importante nga leksyon may kalabotan han espirituwal nga pag-ani—pag-ani hin katawohan. Ano ito? Basi hibaroan, paghisgotan naton hin mas detalyado an asoy.

3. (a) Ano an posible nga nakaaghat kan Jesus ha pagsiring: “Hinog na an aranihon”? (b) Paonan-o ginklaro ni Jesus an iya ginsiring?

³ Ini nga pakiistorya ni Jesus ha iya mga disipulo nahitabo ha pag-ikatarapos han 30 C.E., ha hirani ha bungto han Sicar ha Samaria. Han sinulod ha bungto an mga disipulo, nagpabilin hiya ha may atabay diin iya iginpaangbit an espirituwal nga mga kamatuoran ha usa nga babaye nga nakasabot dayon han bili hito. Pagbalik han mga disipulo, an babaye nagdagmit pagkadto ha Sicar basi sumatan an iya mga amyaw han urusahon nga iya hinbaroan. Nagkainteres gud an iya mga amyaw, salit damu an kinadto dayon ha atabay basi makaistorya hi Jesus. Posible nga hito nga takna lahos pa ha kaumhan an ginkikita ni Jesus ngan nakita niya an mga Samaritano nga tiabot, ngan hiya nagsiring: “Kitaa niyo an kaumhan, hinog na an aranihon.” Katapos, basi klaruhon nga diri literal kondi espirituwal nga pag-ani an iya ginhihisgotan, hiya nagdugang: ‘[An] mag-arani nagtitirok han bunga para ha kinabuhi nga waray kataposan.’—Juan 4:5-30, 36.

4. (a) Ano an duha nga leksyon may kalabotan ha pag-ani an igintutdo ni Jesus? (b) Ano nga mga pakiana an aton paghihisgotan?

⁴ Ano an duha nga importante nga leksyon may kalabotan ha espirituwal nga pag-ani an igintutdo ni Jesus? Siyahan, an buruhaton dinalian. An iya ginsiring nga “hinog na an aranihon” nagpapasabot nga kinahanglan gumios na an iya mga sumurunod. Basi pabug-atan nga dinalian an buruhaton, hiya nagdugang: “Nakarawat na han mag-arani an suhol.” Oo, nagtikang na an  pag-ani—waray na panahon ha paglangan! Ikaduha, an mga magburuhat malipayon. An mga magsarabwag ngan mag-arani “magkakalipay,” siring ni Jesus. (Juan 4:35b, 36) Sugad la nga nalipay hi Jesus nga “damu nga Samaritano . . . an tinoo [ha iya],” an iya mga disipulo magkakaada liwat daku nga kalipay samtang bug-os-kalag nga nakikigbahin ha pag-ani. (Juan 4:39-42) Ini nga asoy han siyahan nga siglo importante ha aton kay nag-iilustrar ini han nahitatabo yana, an pinakadaku nga espirituwal nga pag-ani ha bug-os nga kasaysayan. Kakan-o nagtikang ini nga pag-ani? Hin-o an nakikigbahin hini? Ano an resulta?

5. Hin-o an nangunguna ha pag-ani nga ginhihimo ha bug-os nga kalibotan, ngan paonan-o iginpapakita han bisyon ni Juan nga an buruhaton dinalian?

⁵ Ha bisyon ni apostol Juan, iginhayag ni Jehova nga iya igintoka hi Jesus ha pagpanguna ha pag-ani hin katawohan ha bug-os nga kalibotan. (Basaha an Pahayag 14:14-16.) Hini nga bisyon, iginhulagway hi Jesus nga nakakorona ngan may dara nga garab. An “bulawan nga korona ha ulo” ni Jesus nagpapasabot han iya katungdanan sugad nga nagmamando nga Hadi. An “matarom nga garab ha iya kamot” nagpapakita han iya papel sugad nga Mag-arani. Ngan ha pagsiring pinaagi hin anghel nga “hinog na gud an aranihon ha tuna,” ginpapabug-atan ni Jehova nga an buruhaton dinalian. Oo, “oras na han pag-ani”—waray na panahon ha paglangan! Ha pagsunod han sugo han Dios nga “gamita an imo garab,” gin-gamit ni Jesus an iya garab, ngan nag-ani ha tuna—karuyag sidngon, nag-ani hiya hin katawohan ha tuna. Inin makalilipay nga bisyon nagpapahinumdom nga “hinog na an aranihon.” Nakabulig ba ini basi hibaroan naton kon kakan-o nagtikang ito nga pag-ani ha bug-os nga kalibotan? Oo!

6. (a) Kakan-o nagtikang an “pag-ani”? (b) Kakan-o nagtikang an aktuwal nga pag-ani ha tuna? Isaysay.

⁶ Ha bisyon ni Juan ha Pahayag kapitulo 14 makikita nga hi Jesus, an Mag-arani, nakakorona (bersikulo 14), ngan nagpapasabot ito nga an iya pagkahadi han 1914 nagtikang na. (Dan. 7:13, 14) Waray pag-iha, ginsugo hiya nga tikangan an pag-ani (bersikulo 15). Ito nga pagkasunod-sunod han panhitabo makikita gihap ha ilustrasyon ni Jesus han pag-ani han trigo, diin hiya siniring: “An pag-ani amo an ikatarapos hini nga sistema.” Karuyag sidngon, an pag-ani ngan an kataposan hini nga sistema nagtikang ha pariho nga panahon—han 1914. Ha urhi “ha pag-ani,” nagtikang an aktuwal nga pag-ani. (Mat. 13:30, 39) Kon uusisahon an naglabay, masasantop naton nga nagtikang an pag-ani paglabay hin pipira ka tuig han nagtikang paghadi hi Jesus. Siyahan, tikang han 1914 tubtob han temprano han 1919, nagbuhat hi Jesus hin paglimpyo ha iya dinihogan nga mga sumurunod. (Mal. 3:1-3; 1 Ped. 4:17) Katapos han 1919, nagtikang an pag-ani ha tuna. Waray maglangan hi Jesus ha paggamit han bag-o nga gintokahan nga matinumanon nga uripon ha pagbulig ha aton kabugtoan nga masantop an pagkadinalian han pagsangyaw. Tagda an nahitabo.

7. (a) Ano an nakabulig ha kabugtoan nga hisabtan nga an pagsangyaw nga buruhaton dinalian? (b) Nadasig an aton kabugtoan nga buhaton an ano?

 ⁷ Han Hulyo 1920, an The Watch Tower nagsiring: “Ha pag-usisa han Kasuratan, baga hin nagin matin-aw nga an kongregasyon gintagan hin daku nga pribilehiyo ha pagpasamwak han mensahe may kalabotan han ginhadian.” Pananglitan, an tagna ni Isaias nakabulig nga hisabtan nga an sumat mahitungod han Ginhadian sadang isamwak ha bug-os nga kalibotan. (Isa. 49:6; 52:7; 61:1-3) Kon paonan-o matutuman an buruhaton, diri hira maaram, pero nasarig hira han giya ni Jehova. (Basaha an Isaias 59:1.) Sugad nga resulta hinin mas klaro nga pagsabot han pagkadinalian han pagsangyaw, nadasig an kabugtoan nga pauswagon pa gud an buruhaton. Paonan-o nira ginbuhat ito?

8. Han 1921, ano an duha nga kamatuoran mahitungod han pagsangyaw nga buruhaton an hinsabtan han aton kabugtoan?

⁸ Han Disyembre 1921, an The Watch Tower nagpahibaro: “Ini gud an pinakamaopay nga tuig; ngan mas damu an nakabati han mensahe han kamatuoran han 1921 kay han naglabay nga mga tuig.” Ito nagdugang: “Damu pa an buruhaton. . . . Buhaton naton ito nga malipayon.” Tigamni nga hinsabtan gud han kabugtoan iton duha nga importante nga kamatuoran mahitungod han pagsangyaw nga ginpabug-atan ni Jesus ha mga apostol: An buruhaton dinalian, ngan an magburuhat malipayon.

9. (a) Han 1954, ano an ginsiring han The Watchtower mahitungod han pag-ani, ngan kay ano? (b) Ano nga mga pag-uswag ha kadamu han magwarali an nahitabo hinin naglabay nga 50 ka tuig? (Kitaa an tsart nga “ Bug-os-Kalibotan nga Pag-uswag.”)

⁹ Ha dekada han 1930, han hisabtan han kabugtoan nga makarawat an daku nga grupo han iba nga karnero han mensahe han Ginhadian, mas ginpauswag nira an pagsangyaw nga buruhaton. (Isa. 55:5; Juan 10:16; Pah. 7:9) Ano an resulta? Nagdamu an magwarali han Ginhadian, tikang ha 41,000 han 1934 ngadto ha 500,000 han 1953! An The Watchtower han Disyembre 1, 1954, husto ha pagsiring: “An espiritu ni Jehova ngan an gahum han iya Pulong an hinungdan han kalamposan hinin daku hinduro nga pag-ani ha bug-os nga kalibotan.” *—Sak. 4:6.

10, 11. Ha ilustrasyon han liso han mustasa, ano nga mga bahin han pagtubo hito an ginpapabug-atan?

¹⁰ Ha mga ilustrasyon ni Jesus mahitungod han Ginhadian, klaro nga igintagna niya an resulta han pag-ani. Paghisgotan  naton an ilustrasyon han liso han mustasa ngan han libadura, labi na kon paonan-o ito natutuman hinin panahon han kataposan.

¹¹ Ilustrasyon han liso han mustasa. Usa nga tawo an nagtanom hin liso han mustasa. Dumaku ito ngan nagin puno diin nahapon an katamsihan. (Basaha an Mateo 13:31, 32.) Ano nga mga bahin han pagtubo han binhi an ginpapabug-atan hini nga ilustrasyon? (1) An kadaku han pagtubo urusahon. “An gigutiayi ha ngatanan nga liso” nagin puno nga may “dagku nga sanga.” (Mar. 4:31, 32) (2) Sigurado an pagtubo. “Kon mahisabwag na [an binhi], natubo ito.” Hi Jesus waray magsiring, “Bangin ito tumubo.” Kondi hiya siniring: “Natubo ito.” An pagtubo hito diri mapupugngan. (3) An natubo nga puno nakakadani hin mga bisita ngan nagtatagana hin sirongan. “An katamsihan nakakahapon ngan nakakasirong ha mga sanga hito.” Ha ano nga paagi inin tulo nga bahin han pagtubo han liso naaplikar ha espirituwal nga pag-ani ha moderno nga panahon?

12. Paonan-o naaplikar an ilustrasyon han liso han mustasa ha pag-ani nga ginbubuhat yana? (Kitaa liwat an tsart nga “ Pagdamu han Pag-aram ha Biblia.”)

¹² (1) Kadaku han pagtubo: Ginpapakita han ilustrasyon an pagdamu han nakarawat han mensahe han Ginhadian ngan an pag-uswag han Kristiano nga kongregasyon. Tikang han 1919, an maduruto nga mga mag-arani gintirok ha ginpahiuli nga Kristiano nga kongregasyon. Hito nga panahon, gutiay pa la an mag-arani, pero madagmit ito dumamu. Ngani, an pagtubo hito tikang ha temprano han dekada han 1900 urusahon gud. (Isa. 60:22) (2) Sigurado nga pagtubo: An pagtubo han Kristiano nga kongregasyon diri mapupugngan. Bisan pa han damu nga sugad-bato nga pagkontra han mga kaaway han Dios ha gutiay nga liso, padayon ito nga natubo. (Isa. 54:17) (3) Sirongan: “An katamsihan” nga nasirong ha puno nagrirepresentar han minilyon nga magtadong tikang ha mga 240 nga nasud nga kinarawat han mensahe han Ginhadian pinaagi ha pagin bahin han Kristiano nga kongregasyon. (Esek. 17:23) Dida hito nakarawat hira hin espirituwal nga pagkaon, karepreskohan, ngan proteksyon.—Isa. 32:1, 2; 54:13.

13. Ano nga mga bahin han pagtubo an ginpapabug-atan han ilustrasyon han libadura?

¹³ Ilustrasyon han libadura. Han butangan han babaye hin libadura an minasa nga harina, ito tinubo. (Basaha an Mateo 13:33.) Ano nga mga bahin han pagtubo an ginpapabug-atan hini nga ilustrasyon? Tagdon naton an duha hito. (1) An pagtubo nagpapahinabo hin pagbag-o. An libadura nagsarang tubtob nga “tinubo an bug-os nga minasa.” (2) Daku an naaapektohan han pagtubo. Ginpatubo han libadura an “tulo ka takos nga harina”—an bug-os nga minasa. Paonan-o inin duha nga bahin naaplikar ha espirituwal nga pag-ani ha moderno nga panahon?

14. Paonan-o naaplikar an ilustrasyon han libadura ha pag-ani nga ginbubuhat yana?

¹⁴ (1) Pagbag-o: An libadura nagrirepresentar han mensahe han Ginhadian, ngan an minasa nga harina ha katawohan. Sugad la nga an libadura nakakagbag-o ha harina han ginsaralakot ito nga duha, an mensahe han Ginhadian nakakagbag-o han kasingkasing  han tawo katapos hito karawaton an mensahe. (Roma 12:2) (2) Daku an naaapektohan: An pagsarang han libadura nagrirepresentar han pagsarang han mensahe han Ginhadian. An libadura nakakasalakot ha minasa tubtob nga bug-os nga magsarang ito. Ha pariho nga paagi, an mensahe han Ginhadian nagsasarang “tubtob ha pinakahirayo nga lugar ha tuna.” (Buh. 1:8) Iginpapakita hini nga bisan ha mga nasud diin igindiri an buruhaton, an mensahe han Ginhadian magsasarang, bisan kon diri duro nga naoobserbaran an aton pagsangyaw hito nga mga lugar.

15. Paonan-o natutuman an mga pulong ha Isaias 60:5, 22? (Kitaa liwat an mga kahon nga “ Ginpapahinabo Ito ni Jehova,” ha pahina 93, ngan “ Kon Paonan-o ‘an Usa nga Gutiay’ Nagin ‘Nasud nga Makusog,’” ha pahina 96-97.)

¹⁵ Mga 800 ka tuig antes iyakan ni Jesus ito nga mga ilustrasyon, igintagna ni Jehova, pinaagi hin makatirigamnan nga paghulagway ni Isaias an kahaluag han espirituwal nga pag-ani yana ngan an kalipay nga magigin resulta hito. * Iginhulagway ni Jehova an mga tawo “tikang ha kahigrayoan” nga naagos ngadto ha iya organisasyon. Ha “babaye,” nga ginrirepresentaran yana han dinihogan nga nanhibilin dinhi ha tuna, hiya nasiring: “Ikaw makita ngan magmamasilaw, ngan an imo kasingkasing  mangingibigkibig ngan madaku; tungod kay an kahuraan han dagat pakakadaon ha imo, an manggad han mga nasud makada ha imo.” (Isa. 60:1, 4, 5, 9) Tinuod gud ito nga mga pulong! An mag-iha na nga surugoon ni Jehova nalilipay gud ha pakakita han damu ka yukot nga magwarali han Ginhadian ha ira nasud, nga hadto pipira la.

16, 17. Ano an usa nga hinungdan kon kay ano nga an magsarabwag ngan mag-arani magkakalipay nga magkaupod? (Kitaa liwat an kahon nga “ Duha nga Tract nga Nakabantad han Duha nga Kasingkasing ha Amazon.”)

¹⁶ Hi Jesus nagsiring ha iya mga apostol: ‘[An] mag-arani nagtitirok han bunga para ha kinabuhi nga waray kataposan, salit magkakalipay [nga magkaupod] an magsarabwag ngan an mag-arani.’ (Juan 4:36) Ha ano nga paagi kita magkakalipay nga magkaupod ha bug-os-kalibotan nga pag-ani? Ha damu nga paagi. Tagdon naton an tulo hito.

¹⁷ Siyahan, nalilipay kita nga makita an papel ni Jehova ha buruhaton. Kon nagsasangyaw kita, nagsasabwag kita hin binhi. (Mat. 13:18, 19) Kon may ginbubuligan kita nga magin disipulo han Kristo, nag-aani kita hin bunga. Ngan kita ngatanan nalilipay gud samtang nahipapausa kita kon paonan-o ginpapahinabo ni Jehova an ‘pagtubo ngan pagdaku’ han binhi han Ginhadian. (Mar. 4:27, 28) An iba nga binhi nga aton iginsasabwag diri dayon natubo, ngan iba an nag-aani. Bangin naeksperyensyahan mo an pariho han eksperyensya ni Joan, usa nga bugto nga taga-Britanya nga nabawtismohan 60 ka tuig na an naglabay. Hiya nagsiring: “May mga nakilala ako nga nagsiring nga nagtanom ako hin binhi ha ira kasingkasing han nasangyawan ko hira mga tuig na an naglabay. Diri ako maaram nga ha urhi, gindumarahan ngay-an hira hin pag-aram ha Biblia hin iba nga Saksi ngan ginbuligan nga mag-alagad kan Jehova. Nalilipay ako nga an binhi nga akon igintanom tumubo ngan naani.”—Basaha an 1 Corinto 3:6, 7.

18. Ano nga hinungdan ha kalipay an gin-unabi ha 1 Corinto 3:8?

¹⁸ Ikaduha, nagpapabilin kita nga malipayon nga magburuhat kon pirme naton ginhuhunahuna an ginsiring ni Pablo: “An tagsa nga tawo makarawat han balos uyon ha iya ginbubuhat.” (1 Cor. 3:8) An balos iginhahatag uyon ha buhat, diri uyon ha resulta han buhat. Makapadasig gud ini nga pasarig para hadton nagsasangyaw ha mga teritoryo nga gutiay la an nakarawat! Para ha Dios, an tagsa nga Saksi nga bug-os-kasingkasing nga nakikigbahin ha pagsabwag nga buruhaton ‘namumunga hin damu’ ngan tungod hito, may hinungdan nga malipay.—Juan 15:8; Mat. 13:23.

19. (a) Paonan-o an tagna ni Jesus ha Mateo 24:14 nakakahatag ha aton hin hinungdan nga malipay? (b) Bisan kon diri kita maglampos ha paghimo hin disipulo, ano an sadang naton hinumdoman?

¹⁹ Ikatulo, nalilipay kita nga an aton buruhaton nagtutuman hin tagna. Tagda an baton ni Jesus han an iya mga apostol nagpakiana: “Ano an magigin tigaman han imo presensya ngan han ikatarapos hini nga sistema?” Nagsiring hiya nga an usa nga bahin hito amo an pagsangyaw nga buruhaton ha bug-os nga kalibotan. An buruhaton ba nga paghimo hin mga disipulo an iya ginhihisgotan? Diri. Hiya nagsiring: “Inin maopay nga sumat han  Ginhadian isasangyaw ha bug-os nga inuukyan nga tuna sugad nga pamatuod.” (Mat. 24:3, 14) Salit, an pagsangyaw han Ginhadian—an pagsabwag hin binhi—usa nga bahin han tigaman. Tungod hini, ha aton pagsangyaw, hinumdoman naton nga bisan kon diri kita maglampos ha paghimo hin disipulo, naglalampos kita ha paghatag hin “pamatuod.” * Oo, kumarawat man an mga tawo o diri, nakikigbahin kita ha pagtuman han tagna ni Jesus ngan may pribilehiyo ha pagin “igkasi-magburuhat han Dios.” (1 Cor. 3:9) Daku gud ito nga hinungdan nga malipay!

20, 21. (a) Paonan-o natutuman an mga pulong ha Malakias 1:11? (b) May kalabotan ha pag-ani nga buruhaton, ano an determinado mo nga buhaton, ngan kay ano?

²⁰ Han siyahan nga siglo, ginbuligan ni Jesus an iya mga apostol nga hisabtan nga dinalian an buruhaton. Tikang han 1919 padayon, ginbubuligan ni Jesus an iya mga sumurunod ha moderno nga panahon nga masantop an pariho. Tungod hito, mas nangalimbasog pa gud an katawohan han Dios. Ngani, diri gud mapugngan an pag-ani nga buruhaton. Sugad han igintagna ni propeta Malakias, ini nga buruhaton ginhihimo “tikang ha pagsirang han adlaw bisan ngada ha pagkatunod hini.” (Mal. 1:11) Oo, tikang ha pagsirang han adlaw tubtob ha katunod hito—tikang ha este ngadto ha weste, bisan diin man an mga magsarabwag ngan mag-arani ha tuna—magkaupod hira nga nagbubuhat ngan nagrarayhak. Ngan tikang ha pagsirang han adlaw tubtob ha katunod hito—tikang ha aga tubtob ha gab-i, oo, ha bug-os nga adlaw—nagbubuhat kita samtang ginhuhunahuna nga an buruhaton dinalian.

²¹ Kon balikon naton an mga panhitabo mga 100 ka tuig ha naglabay, ngan nakikita kon paonan-o an gutiay nga grupo han mga surugoon han Dios nagin “nasud nga makusog,” an aton kasingkasing ‘nangingibigkibig ngan nagdadaku’ gud ha kalipay. (Isa. 60:5, 22) Hinaot ito nga kalipay ngan an aton gugma kan Jehova, an “Agaron” han pag-ani, mag-aghat ha tagsa ha aton nga padayon nga makigbahin ha pagtuman han pinakadaku nga pag-ani ha bug-os nga kasaysayan!—Luc. 10:2.