1, 2. Ano an pagbag-o ha Zion’s Watch Tower han Enero 1895, ngan paonan-o ito ginkarawat han kabugtoan?

HAN nakarawat han madasigon nga Estudyante han Biblia nga hi John A. Bohnet an iya kopya han Enero 1895 nga Zion’s Watch Tower, nalipay gud hiya. Makaruruyag an bag-o nga kobre hito—usa nga hitaas nga parola nga nagsasanag hin kahayag ha mabalud nga kadagatan ngan ha masirom nga kalangitan. Iginpahibaro han magasin ini nga bag-o nga kobre ha artikulo nga may ulohan, “An Aton Bag-o nga Dagway.”

² Tungod kay naimpres, nagsurat hi Bugto Bohnet kan Bugto Russell: ‘Maopay pagkit-on an bag-o nga dagway han BARANTAYAN. Makaruruyag gud ito.’ Usa pa nga matinumanon nga Estudyante han Biblia, hi John H. Brown, an nagsurat mahitungod han kobre: “Nakakakuha gud ito hin interes. Marig-on an pundasyon nga gintitindogan han parola bisan kon ginpupusakan ito han mga balud ngan bagyo.” Iton bag-o nga kobre an siyahan nga pagbag-o nga nakita han kabugtoan hito nga tuig, pero diri ito an ultimo. Han Nobyembre, nagkaada usa pa nga daku nga pagbag-o. Makapainteres, may kalabotan gihap ito ha mabalud nga dagat.

3, 4. Ano nga problema an ginhisgotan han Watch Tower han Nobyembre 15, 1895, ngan ano an iginpahibaro nga pagbag-o nga igin-aaplikar tubtob yana?

³ Usa nga artikulo han Watch Tower han Nobyembre 15, 1895, an detalyado nga nagbuhayhag hin problema: Dagku nga balud hin problema an nagpupusak han kamurayawan han asosasyon, o organisasyon, han mga Estudyante han Biblia. Naglilinantugi an kabugtoan kon hin-o an mangunguna han lokal nga kongregasyon. Basi matadong inin espiritu han pakigkompetensya nga nagriresulta ha pagkabahin-bahin, iginpariho han artikulo an organisasyon ha barko. Katapos, ginkarawat hito nga an mga nangunguna napakyas nga maiandam an sugad-barko nga organisasyon ha pag-atubang hin bagyo. Ano an sadang buhaton?

⁴ An artikulo nagsiring nga an maopay nga kapitan nagsisiguro nga an barko may mga salbabida ngan an mga tripulante andam kon may tiabot nga bagyo. Ha pariho nga paagi, sadang siguruhon han mga nangunguna ha organisasyon nga an ngatanan nga kongregasyon andam ha sugad-bagyo nga mga sitwasyon. Basi mahimo ito, iginpahibaro han artikulo an usa nga daku nga  pagbag-o nga gin-aaplikar tubtob yana. Nagsiring ito nga tikangan dayon, “ha tagsa nga kongregasyon,” an ‘pagpili hin mga tigurang’ nga “‘magmamangno’ ha panon.”—Buh. 20:28.

5. (a) Kay ano nga an siyahan nga kahikayan ha pagpili hin tigurang napapanahon nga pag-uswag? (b) Ano nga mga pakiana an aton tatagdon?

⁵ Iton siyahan nga kahikayan ha pagpili hin tigurang napapanahon nga pag-uswag basi maestablisar an marig-on nga kongregasyon. Nakabulig ito ha kabugtoan bisan pa han mabalud nga panahon han Girra ha Kalibotan l. Han sumunod nga mga dekada, an dugang nga pagbag-o ha kahikayan han organisasyon nakabulig ha katawohan han Dios nga mas masangkapan ha ira pag-alagad. Ano nga tagna ha Biblia an naghisgot hini nga pag-uswag? Ano nga mga pagbag-o ha organisasyon an imo nakita? Ano an kapulsanan hito ha imo?

6, 7. (a) Ano an iginpapasabot han Isaias 60:17? (b) Ano an iginpapasabot han mga pulong nga ‘magdudumara’ ngan ‘maghahadi’?

⁶ Sugad han ginhisgotan ha Kapitulo 9, hi Isaias nagtagna nga papadamuon ni Jehova an iya katawohan. (Isa. 60:22) Kondi, diri la ito an iginsaad ni Jehova. Hito gihap nga tagna, hiya nagsiring: “Imbes han bronsi dadad-on ko in bulawan; imbes han puthaw dadad-on ko in salapî. Imbes han kahoy dadad-on ko in bronsi; imbes hin mga bató, dadad-on ko in puthaw. Tutudlokon ko in kamingaw [o kamurayawan] nga amo an magdumara ha imo, ngan an katadungan an maghadi ha imo.” (Isa. 60:17, An Baraan nga Biblia) Ano an iginpapasabot hito? Paonan-o ito naaplikar ha aton yana?

⁷ An tagna ni Isaias nasiring nga an usa nga materyal sasaliwnan hin iba. Kondi tigamni nga an pagbag-o, diri tikang ha maraot ngadto ha maopay, kondi tikang ha maopay ngadto ha mas maopay. An pagsaliwani han bronsi hin bulawan, sugad man han iba nga materyal nga gin-unabi, nagpapakita hin pag-uswag. Salit hini nga ilustrasyon, igintagna ni Jehova nga an iya katawohan hinay-hinay nga mag-uuswag. Ano nga pag-uswag? Pinaagi ha pag-unabi hin mga ‘magdudumara’ ngan ‘maghahadi,’ iginpakita ni Jehova nga hinay-hinay nga mag-uuswag an pag-ataman ngan pag-organisar ha iya katawohan.

8. (a) Hin-o an nagpapahinabo han mga pag-uswag nga gin-unabi ha tagna ni Isaias? (b) Ano an kapulsanan ha aton hito nga mga pag-uswag? (Kitaa liwat an kahon nga “ Mapainubsanon nga Ginkarawat an Pagtadong.”)

⁸ Hin-o an nagpapahinabo hinin organisasyonal nga pag-uswag? Hi Jehova nagsiring: “Dadad-on ko in bulawan, . . . dadad-on ko in salapî,” ngan “tutudlokon ko in kamingaw” o kamurayawan. Oo, an pag-uswag ha pag-organisar han kongregasyon diri tungod ha pangalimbasog han tawo, kondi tungod kan Jehova mismo. Ngan tikang han nahitrono hi Jesus, ginpapahinabo ni Jehova ito nga pag-uswag pinaagi han iya Anak. Ano an kapulsanan hito ha aton? An amo nga teksto nasiring nga ini nga pag-uswag magriresulta ha kamurayawan ngan katadongan. Samtang ginkakarawat an giya han Dios ngan naghihimo hin pagbag-o, nagkakaada kita kamurayawan ngan an gugma ha katadongan nagpapagios ha aton ha pag-alagad kan Jehova, nga iginhulagway ni apostol Pablo nga “an Dios han kamurayawan.”—Fil. 4:9.

9. Ano an sadang magin pundasyon han kahapsay ngan pagkaurosa han kongregasyon, ngan kay ano?

 ⁹ Mahitungod kan Jehova, hi Pablo nagsurat: “An Dios diri Dios han kasamokan, kondi han kamurayawan.” (1 Cor. 14:33) Tigamni nga an gin-unabi ni Pablo nga kabaliktaran han kasamokan amo an kamurayawan, diri kahapsay. Kay ano? Tagda ini: An kahapsay diri pirme nagriresulta hin mamurayawon nga kahimtang. Pananglitan, an grupo hin mga sundalo mahimo magmartsa hin mahapsay ngadto ha patag-awayan, pero an ira kahapsay diri magriresulta ha kamurayawan, kondi ha girra. Salit sugad nga mga Kristiano, pirme naton hinumdoman inin importante nga kamatuoran: An bisan ano nga mahapsay kondi diri kamurayawan an pundasyon diri maglalampos. Ha kabaliktaran, an kamurayawan nga tikang ha Dios nagriresulta hin kahapsay nga nagpapadayon. Salit, mapasalamaton kita nga an aton organisasyon gin-gigiyahan ngan gin-uuray han “Dios nga naghahatag hin kamurayawan”! (Roma 15:33) An kamurayawan nga tikang ha Dios an pundasyon han kahapsay ngan pagkaurosa nga napapahimulosan ngan gin-aapresyar naton ha aton mga kongregasyon ha bug-os nga kalibotan.—Sal. 29:11.

10. (a) Ano nga mga pag-uswag an nahitabo ha aton organisasyon ha naglabay? (Kitaa an kahon nga “ Mga Pag-uswag han Kahikayan ha Pagdumara.”) (b) Ano nga mga pakiana an aton paghihisgotan?

¹⁰ Makikita ha kahon nga “ Mga Pag-uswag han Kahikayan ha Pagdumara” an mapulsanon ngan mahapsay nga mga pagbag-o ha aton organisasyon ha naglabay. Kondi ano nga mga pagbag-o tikang ha “bronsi” ngadto ha “bulawan” an diri pa la maiha nga ginpahinabo ni Jehova pinaagi han aton Hadi? Paonan-o ito nga mga pagbag-o ha pagdumara nagparig-on han kamurayawan ngan pagkaurosa han mga kongregasyon ha bug-os nga kalibotan? Paonan-o ito personal nga nakakabulig ha imo ha pag-alagad ha “Dios han kamurayawan”?

11. (a) Ano nga pagbag-o ha aton pagsabot an resulta han usa nga pag-usisa ha Kasuratan? (b) Ano an determinado nga buhaton han mga membro han nagmamando nga lawas?

¹¹ Tikang han 1964 tubtob han 1971, an nagmamando nga lawas nag-organisar hin detalyado nga proyekto ha pag-aram han Biblia nga nag-usisa han damu nga topiko upod na han mga kahikayan han Kristiano nga kongregasyon ha siyahan nga siglo. * Uyon hito, ira hinbaroan nga an mga kongregasyon hadto gindudumara hin lawas han mga tigurang, diri hin usa la nga tigurang o paramangno. (Basaha an Filipos 1:1; 1 Timoteo 4:14.) Han mas hinsabtan ito nga punto, nasantop han nagmamando nga lawas nga gin-gigiyahan hira han ira Hadi, hi Jesus, ha paghimo hin pagbag-o ha pagdumara ha katawohan han Dios, ngan determinado hira nga sundon ito. Ginios dayon hira basi sundon an Kasuratanhon nga paagi ha pagtoka hin mga tigurang. Ano an mga pagbag-o nga ginhimo temprano ha dekada han 1970?

12. (a) Ano nga pagbag-o an ginhimo ha nagmamando nga lawas? (b) Isaysay kon paonan-o yana gin-oorganisar an Nagmamando nga Lawas. (Kitaa an kahon nga “ Kon Paonan-o Gin-aataman han Nagmamando nga Lawas an Intereses han Ginhadian,” ha pahina 130.)

¹² An siyahan nga pagbag-o ha nagmamando nga lawas mismo. Tubtob hito nga panahon, ini nga grupo han dinihogan nga kabugtoan ginkukompwesto hin pito nga membro han board of directors han Watch Tower Bible and Tract Society of Pennsylvania. Kondi han 1971, an 7 nga membro han nagmamando nga  lawas ginhimo nga 11, ngan diri na hira bahin han board of directors. Para ha ira, waray usa nga membro an labaw ha iba, ngan gintikangan nira an pagsurosaliwan ha pagin tsirman kada tuig uyon ha alpabetiko nga pagkasunod-sunod han ira apelyido.

13. (a) Ano nga kahikayan an iginpatuman ha sulod hin 40 ka tuig? (b) Ano an ginbuhat han Nagmamando nga Lawas han 1972?

¹³ An sunod nga pagbag-o ha tagsa nga kongregasyon. Ha ano nga paagi? Tikang han 1932 tubtob han 1972, kasagaran usa la an nagdudumara han kongregasyon. Tubtob han 1936, an lalaki nga nagdudumara gintatawag nga service director. Katapos, ginliwanan ito nga ngaran hin company servant, sunod hin congregation servant, ngan ha urhi hin paramangno han kongregasyon. Madasigon nga ginmangnoan hini nga kabugtoan an espirituwalidad han panon. An paramangno han kongregasyon kasagaran nga nagdidesisyon para ha kongregasyon nga diri nakonsulta ha iba nga surugoon ha kongregasyon. Kondi han 1972, gin-andam han Nagmamando nga Lawas an daku nga pagbag-o. Ano ito?

14. (a) Ano nga kahikayan an gintikangan han Oktubre 1, 1972? (b) Paonan-o gin-aaplikar han koordinetor han lawas han mga tigurang an sagdon ha Filipos 2:3?

¹⁴ Imbes nga usa la an mag-aalagad sugad nga paramangno han tagsa nga kongregasyon, maitutoka na ha teokratiko nga paagi an iba nga nakaabot han Kasuratanhon nga kwalipikasyon sugad nga tigurang. Hira an magigin lawas han mga tigurang nga magdudumara han kongregasyon. Iton bag-o nga kahikayan iginpatuman han Oktubre 1, 1972. Yana an koordinetor han lawas  han mga tigurang diri nagtatagad han iya kalugaringon nga labaw, kondi “ubos” kay ha iba nga tigurang. (Luc. 9:48) Daku gud nga bendisyon ha aton iton mapainubsanon nga kabugtoan!—Fil. 2:3.

15. (a) Ano nga kapulsanan an resulta han kahikayan ha pagkaada mga lawas han mga tigurang ha kongregasyon? (b) Ano an nagpapakita nga an aton Hadi maaramon nga ginios?

¹⁵ An kahikayan ha pagbahin-bahin han mga responsabilidad ha kongregasyon ha mga membro han lawas han mga tigurang daku gud nga pag-uswag. Tagda inin tulo nga kapulsanan: Siyahan, nakakabulig ini ha ngatanan nga tigurang—anoman kadaku an ira responsabilidad ha kongregasyon—nga hinumdoman nga hi Jesus an Ulo han kongregasyon. (Efe. 5:23) Ikaduha, sugad han siring han Proberbios 11:14: “Ha kadam-an nga magsaragdon aada an karig-on.” Samtang ginhihisgotan han mga tigurang an mga nakakaapekto ha espirituwalidad han kongregasyon ngan gintatagad an suhestyon han kada tagsa, nabubuligan hira nga makagdesisyon uyon ha mga prinsipyo ha Biblia. (Prob. 27:17) Ginbibendisyonan ni Jehova an sugad nga mga desisyon, ngan nagriresulta ito ha “karig-on.” Ikatulo, tungod ha pagkaada dugang nga tigurang, nakakagtagana an organisasyon han nagtitikadaku nga panginahanglan hin mga magmarangno ngan hin mga mag-aataman han mga kongregasyon. (Isa. 60:3-5) Hunahunaa la—an mga kongregasyon ha bug-os nga kalibotan nag-uswag tikang ha sobra 27,000 han 1971 ngadto ha sobra 113,000 han  2013! Klaro nga tungod han kaaram, nagtatagana an aton Hadi han ginkikinahanglan nga mga magbarantay para ha iya mga sumurunod ha husto nga panahon.—Mika 5:5.

16. (a) Ano an responsabilidad han mga tigurang? (b) Paonan-o gintagad han mga Estudyante han Biblia an sugo ni Jesus nga ‘atamanon an mga karnero’?

¹⁶ Tikang pa ha panahon han mga Estudyante han Biblia, hinsabtan na han mga tigurang nga responsabilidad nira buligan an ira igkasi-tumuroo nga makagpabilin ha pag-alagad ha Dios. (Basaha an Galacia 6:10.) Han 1908, usa nga artikulo ha Watch Tower an naghisgot han sugo ni Jesus: “Atamana an akon gudtiay nga karnero.” (Juan 21:15-17) Ito nga artikulo nagsiring ha mga tigurang: “Importante gud nga an sugo han Agaron may kalabotan ha panon maisilsil naton ha aton kasingkasing, ngan tagdon nga daku nga pribilehiyo an pagpakaon ngan pag-ataman ha mga sumurunod han Ginoo.” Han 1925, ginpahinumdoman utro han The Watch Tower an mga tigurang han importansya ha pag-alagad sugad nga paraataman han panon: “An kongregasyon panag-iya han Dios, . . . ngan tatagdon niya nga may baratunon ha iya an ngatanan nga may pribilehiyo ha pag-alagad ha ira kabugtoan.”

17. Ha ano nga paagi ginbubuligan an mga tigurang nga mapauswag an ira abilidad ha pag-ataman ha panon?

¹⁷ Ha ano nga paagi ginbubuligan han organisasyon ni Jehova an mga tigurang ha pagpauswag han ira abilidad ha pag-ataman ha panon tikang ha “puthaw” ngadto ha “salapî”? Pinaagi ha pagbansay. Han 1959, gindumara an siyahan nga Kingdom Ministry School para ha mga paramangno. Usa nga bahin han klase an naghisgot han ulohan nga “Paghatag hin Personal nga Atensyon.” Gin-aghat an mga tigurang nga “mag-eskedyol ha pagbisita ha mga magwarali ha mga balay hito.” Ginhisgotan liwat an magkalain-lain nga paagi basi magin makaparig-on an sugad nga mga pagbisita. Han 1966, gintikangan an ginbag-o nga Kingdom Ministry School. Ginhisgotan hito an topiko nga “Kapulsanan han  Pag-ataman nga Buruhaton.” Ano an ginpapabug-atan hito? Adton mga nangunguna “sadang makigbahin ha mahigugmaon nga pag-ataman ha panon han Dios, kondi diri nira sadang pabay-an an ira responsabilidad ha ira kalugaringon nga panimalay ngan ha ministeryo.” Hinin naglabay pa la nga mga tuig, gin-organisar an dugang nga eskwelahan para ha mga tigurang. Ano an resulta han padayon nga pagbansay nga igintatagana han organisasyon ni Jehova? Yana, may-ada na yinukot nga kwalipikado nga kabugtoan nga nag-aalagad sugad nga espirituwal nga paraataman ha mga kongregasyon.

18. (a) Ano nga mabug-at nga responsabilidad an igintapod ha mga tigurang? (b) Kay ano nga hinigugma ni Jehova ngan ni Jesus an maduruto nga mga tigurang?

¹⁸ An mga tigurang igintoka ni Jehova pinaagi han Hadi, hi Jesus, ha pagtuman hin mabug-at nga responsabilidad. Ano ito? An pagpanguna ha mga karnero han Dios hinin pinakamakuri nga panahon ha kasaysayan. (Efe. 4:11, 12; 2 Tim. 3:1) Hinigugma gud ni Jehova ngan ni Jesus an maduruto nga mga tigurang tungod han ira pagsunod han sagdon han Kasuratan: “Atamana an panon han Dios nga igintapod ha iyo, . . . kinaburut-on . . . tungod han hingyap nga magserbi . . . magin mga susbaranan ha panon.” (1 Ped. 5:2, 3) Aton tagdon an duha han damu nga paagi diin an Kristiano nga paraataman susbaranan ha panon ngan nakakabulig ha pagkaada kamurayawan ngan kalipay ha kongregasyon.

19. Ano an aton inaabat ha mga tigurang nga naupod ha aton ha ministeryo?

¹⁹ Siyahan, an mga tigurang nagbubuhat upod han ngatanan ha kongregasyon. An parasurat han Ebanghelyo nga hi Lucas nagsiring: “Kinadto hi Jesus ha mga syudad ngan mga baryo basi magsangyaw ngan magpasamwak han maopay nga sumat han Ginhadian han Dios. Kaupod niya an 12 nga apostol.” (Luc. 8:1)  Sugad la nga hi Jesus nagsangyaw upod han iya mga apostol, an susbaranan nga mga tigurang yana nagsasangyaw kaupod liwat han ira igkasi-tumuroo. Maaram hira nga pinaagi hito, nakakabulig hira nga magin marig-on an kongregasyon. Ano an inaabat han mga kabugtoan ha ira? Hi Jeannine, nga hirani na mag-90 anyos, nagsiring: “An pagsangyaw kaupod hin tigurang naghahatag ha akon hin higayon nga makaistorya hiya ngan mas makikilala hiya.” Hi Steven, nga mga 35 anyos, nagsiring: “Kon nakikig-upod ha akon an usa nga tigurang ha pagbalay-balay, inaabat ko nga karuyag niya ako buligan. Nalilipay gud ako hito.”

20, 21. Paonan-o masusubad han mga tigurang an paraataman hin karnero ha ilustrasyon ni Jesus? Paghatag hin ehemplo. (Kitaa liwat an kahon nga “ Mabungahon nga Sinemana nga Pagbisita.”)

²⁰ Ikaduha, ginbabansay han organisasyon ni Jehova an mga tigurang ha pagpakita hin pagtagad hadton diri na nakig-upod ha kongregasyon. (Heb. 12:12) Kay ano nga sadang buligan han mga tigurang an sugad nga mga indibiduwal, ngan paonan-o nira ito bubuhaton? Ito nga pakiana ginbabaton han ilustrasyon ni Jesus mahitungod han paraataman ngan han nawara nga karnero. (Basaha an Lucas 15:4-7.) Han hibaroan han paraataman nga nawawara an usa nga karnero, ginpinamiling niya ito nga baga hin waray na hiya iba nga karnero. Paonan-o ginsusubad han mga tigurang yana an susbaranan hito nga paraataman? Sugad la nga presyoso ha paraataman an nawara nga karnero, adton diri na nakig-upod ha katawohan han Dios nagpapabilin nga presyoso ha mga tigurang. Ira ginhuhunahuna an magluya ha espirituwal sugad nga nawara nga karnero, diri nakarag nga panahon. Dugang pa, sugad la nga an paraataman malakat basi ‘pamilngon’ an nawara “tubtob nga hiagian” ito, an mga tigurang naghihimo liwat hin paagi basi pamilngon ngan buligan an mga magluya.

²¹ Ano an ginbuhat han paraataman han nabilngan niya an karnero? Mahigugmaon nga gin-alsa niya ito, ‘ginpas-an,’ ngan iginbalik ha panon. Ha pariho nga paagi, an kinasingkasing nga kapahayagan hin pagpaid han tigurang mahimo ipariho ha pag-alsa ha usa nga maluya ha espirituwal ngan pagbulig ha iya nga makabalik ha kongregasyon. Pananglitan, hi Victor nga taga-Aprika inundang pakig-upod ha kongregasyon. Hiya nagsiring: “Ha walo ka tuig nga diri ako aktibo, an mga tigurang waray umundang pagbulig ha akon.” Ano an nakabantad ha iya? Hiya siniring: “Usa ka adlaw, ginbisita ako ni John nga usa nga tigurang nga akon kaklase ha Pioneer Service School. Iya iginpakita ha akon an pipira han amon retrato han nag-eskwela kami. Nagpahinumdom ito ha akon han makalilipay nga mga eksperyensya nga nakaaghat ha akon nga handumon an kalipay han nag-aalagad pa ako kan Jehova.” Waray pag-iha, binalik hi Victor ha kongregasyon. Yana, payunir na liwat hiya. Matin-aw nga daku nga bulig an mahigugmaon nga mga tigurang para ha aton kalipay.—2 Cor. 1:24. *

22. Paonan-o ginpaparig-on han katadongan ngan kamurayawan an pagkaurosa han Kristiano nga kongregasyon? (Kitaa liwat an kahon nga “ Nalipay Gud Kami.”)

²² Sugad han ginhisgotan na, igintagna ni Jehova nga mag-uuswag an katadongan ngan kamurayawan han iya katawohan. (Isa. 60:17) Ini nga mga kalidad nagpaparig-on han pagkaurosa han mga kongregasyon. Ha ano nga mga paagi? May kalabotan ha katadongan, an aton Dios “uusa la nga Jehova.” (Deut. 6:4) An iya magtadong nga suruklan ha mga kongregasyon ha usa nga nasud pariho gihap ha iba nga nasud. Uusa la an iya suruklan han husto ngan sayop, ngan diri ito nagbabag-o ha “ngatanan nga kongregasyon han mga baraan.” (1 Cor. 14:33) Salit, mag-uuswag la an kongregasyon kon iaaplikar hito an mga suruklan han Dios. May kalabotan ha kamurayawan, karuyag han aton Hadi nga diri la kita magpahimulos han kamurayawan kondi magin ‘mamurayawon’ man. (Mat. 5:9) Salit, ‘ginpapangalimbasogan naton an mga butang nga nag-aaghat hin kamurayawan.’ Namimiling kita hin paagi ha pagsulbad han diri pagkasinabtanay nga nabangon. (Roma 14:19) Ha pagbuhat hito, nakakaamot kita ha kamurayawan ngan pagkaurosa han kongregasyon.—Isa. 60:18.

23. Ano an aton napapahimulosan yana sugad nga mga surugoon ni Jehova?

²³ Han Nobyembre 1895, han iginpahibaro han Watch Tower an siyahan nga kahikayan ha pagkaada mga tigurang, iginpahayag gihap han mga nangunguna an ira kinasingkasing nga hingyap. Ano ito? Ginhihingyap ngan gin-aampo nira nga inin bag-o nga kahikayan makabulig basi an katawohan han Dios “madagmit nga makaabot ha pagkaurosa han pagtoo.” Kon babalikon naton an naglabay nga mga dekada, nagpapasalamat gud kita nga naparig-on an aton pagkaurosa ha pagsingba tungod han hinay-hinay nga pagbag-o ha pagdumara nga iginpahinabo ni Jehova pinaagi han aton Hadi. (Sal. 99:4) Sugad nga resulta, an katawohan ni Jehova yana ha bug-os nga kalibotan nalilipay samtang naglalakat nga may ‘pariho nga hunahuna,’ nagsusunod ha ‘pariho nga paggawi,’ ngan urosa nga nag-aalagad ha “Dios han kamurayawan.”—2 Cor. 12:18; basaha an Sepania 3:9.