Para ha mga nahigugma kan Jehova nga Dios ngan ha iya Pulong, an Biblia:

“Mahibabaro kamo han kamatuoran, ngan an kamatuoran maghahatag ha iyo hin kagawasan,” nagsiring hi Jesus. (Juan 8:32) Hunahunaa an imo inabat han siyahan nga nahibaroan mo an kamatuoran tikang ha Biblia! Makalilipay hibaroan nga ha kalibotan nga puno hin kabuwaan, puydi naton mahibaroan an kamatuoran.​—2 Timoteo 3:1.

Karuyag ni Jehova nga Dios nga mahibaroan naton an kamatuoran. Ngan tungod kay hinigugma naton an mga tawo, karuyag naton sumatan hira mahitungod hito. Pero diri la ito an nahiuupod ha pag-alagad ha Dios. Kinahanglan buhaton naton an aton gimaopayi nga magkinabuhi sugad nga mga Kristiano kay ginrirespeto gud naton an mga prinsipyo ni Jehova. Iginsaysay ni Jesus an usa nga importante nga paagi nga mapapamatud-an naton ha Dios nga hinigugma naton hiya. Nagsiring hiya: “Kon gintutuman niyo an akon mga sugo, magpapabilin kamo ha akon gugma, sugad la nga gintutuman ko an mga sugo han Amay ngan nagpapabilin ha iya gugma.”​—Juan 15:10.

Hinigugma gud ni Jesus an iya Amay, ngan iya ginbubuhat an ngatanan nga iginsusugo ha iya han iya Amay. Kon susubaron naton hi Jesus ha paagi han aton pagkinabuhi, hihigugmaon kita ni Jehova ngan magigin tinuod kita nga malipayon. Sugad han ginsiring ni Jesus, “kon maaram kamo hini nga mga butang, malipayon kamo kon buhaton niyo ini.”​—Juan 13:17.

Naglalaom kami nga ini nga libro mabulig ha iyo nga mahibaro pagkinabuhi uyon ha kamatuoran ha Biblia ngan magin sangkay han Dios. Igin-aampo namon nga magtubo an iyo gugma ha Dios ngan magpabilin kamo “ha gugma han Dios . . . nga nagriresulta hin kinabuhi nga waray kataposan.”​—Judas 21.