PANHIMO HIN DISIPULO
LEKSYON 10
Pagin Determinado
Prinsipyo: “Determinado kami nga ipaangbit ha iyo, diri la an maopay nga sumat han Dios kondi pati an amon mismo kalugaringon, kay hinigugma gud namon kamo.”—1 Tes. 2:8.
An Ginbuhat ni Jesus
1. Kitaa an VIDEO, o basaha an Juan 3:1, 2. Katapos, batona an masunod nga mga pakiana:
-
Kay ano daw la nga ha gab-i binisita hi Nicodemo kan Jesus?—Kitaa an Juan 12:42, 43.
-
Paonan-o iginpakita ni Jesus nga determinado hiya ha panhimo hin disipulo?
Ano an Aton Mahibabaroan kan Jesus?
2. Iginpapakita naton nga hinigugma ta an mga tawo pinaagi ha pagin determinado ha pagbulig ha ira nga magin disipulo.
Subara hi Jesus
3. Dumaraha an pag-aram ha oras ngan lugar nga kombinyente ha imo Bible study. Bangin karuyag niya mag-aram ha espisipiko nga adlaw o oras. Mas komportable ba hiya mag-aram ha lugar han iya trabaho, balay, o panpubliko nga lugar? Kon posible, ig-adjust an imo eskedyol uyon ha iya panginahanglan.
4. Himoa nga regular an pag-aram. Kon diri ka available, ayaw ikansela an iyo pag-aram. Lugod, hunahunaa:
-
Puydi ba kamo mag-study ha iba nga adlaw hito nga semana?
-
Puydi ba kamo mag-study pinaagi ha pagtawag o videoconference?
-
Puydi mo ba hangyoon an iba nga magwarali ha pagdumara?
5. Ig-ampo nga magin determinado ka. Hangyoa hi Jehova nga magpabilin ka nga determinado ha pagbulig han imo study, bisan kon diri hiya regular nga nagpapa-study o nakukurian ha pag-aplikar han iya nahibabaroan. (Fil. 2:13) Posible gud nga damu an mag-opay nga kalidad han imo study; ig-ampo nga mabuligan ka nga magpokus hito.
