AN MGA Kristiano ginsusugo nga igsaurog an Memoryal han kamatayon ni Kristo. Ini nga pagsaurog tinatawag liwat nga an “Panihapon han Ginoo.” (1 Korinto 11:20) Kay ano nga importante gud ito? San-o ngan paonan-o sadang igsaurog ito?

Gintikangan ni Jesu-Kristo ini nga pagsaurog ha gab-i han Judio nga Paskua han 33 K.P. An Paskua usa nga selebrasyon nga ginbuhat makausa la ha kada tuig, ha ika-14 nga adlaw han Judio nga bulan nga Nisan. Basi makarkula ito nga petsa, an mga Judio naghulat han spring equinox. Ini an adlaw ha katsaringsing nga haros may-ada 12 ka oras han kaadlawon ngan 12 ka oras han kagab-ihon. An siyahan nga pagsirang han bulan ha gimata nga pinakahirani ha spring equinox amo an tinikangan han Nisan. Inabot an Paskua paglabay hin 14 ka adlaw, ha katunod han adlaw.

Ginsaurog ni Jesus an Paskua kaupod an iya mga apostol, ginpabaya hi Judas Iskariote, ngan katapos, gintikangan an Panihapon han Ginoo. Ini nga panihapon an sinaliwan ha Judio nga Paskua ngan salit sadang igsaurog hin makausa la ha usa ka tuig.

An Ebanghelyo ni Mateo nagsusumat: “Hi Jesus kinuha hin usa nga tinapay, ngan ginbendisyonan, ngan iya ginpinitpinit, ngan ipanhatag ha mga tinon-an, ngan siniring: Kuha kamo; kaon kamo; ini an akon lawas. Ngan han  pagkuha han tagayan hiya nagpasalamat, ngan ihinatag ha ira, nga nasiring: Inuma niyo ngatanan ito; kay ini an akon dugo han Bag-o nga Testamento nga igtatakbo tungod han kadam-an ha pagpasaylo han mga sala.”—Mateo 26:26-28.

An iba natoo nga ginpahinabo ni Jesus nga an tinapay magin literal nga iya unod ngan an alaksiw magin literal nga iya dugo. Kondi, an unudnon nga lawas ni Jesus bug-os pa gihapon han iginhatag niya ini nga tinapay. Kinaon gud ba an mga apostol ni Jesus han iya literal nga unod ngan ininom han iya dugo? Waray, kay nagin kanibalismo unta ito ngan pagtalapas ha balaud han Dios. (Genesis 9:3, 4; Lebitiko 17:10) Sumala ha Lukas 22:20, hi Jesus nagsiring: “Ini nga irinman amo an bag-o nga testamento han akon dugo, nga iginbisibis tungod ha iyo.” An irinman ba nagin literal nga “bag-o nga testamento” o kauyonan? Imposible ito, tungod kay an kauyonan usa nga ginkasabotan, diri materyal nga butang.

Salit, mga simbolo la an tinapay ngan an alaksiw. An tinapay nagsisimbolo han hingpit nga lawas ni Kristo. Ginamit ni Jesus an usa nga tinapay nga nahisalin tikang ha panihapon han Paskua. Ginhimo an tinapay nga waray ipaturubo, o libadura. (Eksodo 12:8) Agsob nga ginagamit han Biblia an ipaturubo sugad nga simbolo han sala o pagkadunot. Salit an tinapay nagsisimbolo han hingpit nga lawas nga iginhalad ni Jesus. Waray ito sala.—Mateo 16:11, 12; 1 Korinto 5:6, 7; 1 Pedro 2:22; 1 Juan 2:1, 2.

An pula nga alaksiw nagsisimbolo han dugo ni Jesus. Ito nga dugo an nagparig-on han bag-o nga kauyonan. Hi Jesus nagsiring nga an iya dugo iginbubo “ha pagpasaylo han mga sala.” Hito nga paagi an mga tawo mahimo magin limpyo ha paniplatan han Dios ngan makakasulod ha bag-o nga kauyonan kan Jehova. (Hebreo 9:14; 10:16, 17) Pinaagi hini nga kauyonan, o kontrata, nagigin posible para ha 144,000 nga matinumanon nga mga Kristiano nga makakadto ha langit. Didto hira mag-aalagad sugad nga mga hadi ngan mga saserdote para ha pagbendisyon ha ngatanan nga katawohan.—Genesis 22:18; Jeremias 31:31-33; 1 Pedro 2:9; Pahayag 5:9, 10; 14:1-3.

Hin-o an sadang kumaon ngan uminom hini nga mga emblema han Memoryal? Makatadunganon nga adto la nga kaupod ha bag-o nga kauyonan—karuyag sidngon, adton may-ada paglaom nga mahingadto ha langit—an sadang kumaon han tinapay ngan uminom han alaksiw. An baraan nga espiritu han Dios nagkukombinse ha ira nga pinili hira nga magin langitnon nga mga hadi. (Roma 8:16) Bahin liwat hira han kauyonan han Ginhadian kaupod ni Jesus.—Lukas 22:29.

 Kumusta man adton naglalaom nga mabuhi ha waray kataposan ha Paraiso ha tuna? Ira ginsusunod an sugo ni Jesus ngan natambong hira ha Panihapon han Ginoo, kondi presente hira sugad nga matinalahuron nga mga paraobserba, diri nakikigbahin ha panihapon. Makausa ha usa ka tuig ha katunod han adlaw ha Nisan 14, an mga Saksi ni Jehova nagsasaurog han Panihapon han Ginoo. Bisan kon pipira la ka yukot ha bug-os nga kalibotan an may-ada langitnon nga paglaom, importante gud ha ngatanan nga mga Kristiano ini nga pagsaurog. Ito an okasyon diin an ngatanan makakapamalandong han gidadakui nga gugma ni Jehova nga Dios ngan ni Jesu-Kristo.—Juan 3:16.