1. Ano nga bantogan nga pag-ampo an uusisahon yana?

MINILYON nga mga tawo ha bug-os nga kalibotan an pamilyar han pag-ampo nga tinatawag han damu nga mga tawo nga Amay Namon, o Pag-ampo han Ginoo. Ini nga mga ekspresyon nagtutudlok ha bantogan nga pag-ampo nga iginhatag ni Jesus mismo sugad nga modelo. Makahuluganon gud ito nga pag-ampo, ngan an paghisgot ha nangunguna nga tulo nga pangamuyo hito mabulig ha imo nga mahibaro hin dugang pa mahitungod ha kon ano gud an igintututdo han Biblia.

2. Ano an tulo han mga butang nga igintutdo ni Jesus ha iya mga disipulo nga ig-ampo?

² Ha tinikangan hini nga modelo nga pag-ampo, gintutdoan ni Jesus an iya mga mamarati: “Busa, mag-ampo kamo sugad hini nga paagi: Amay namon, nga aada ka ha langit, gindadayaw an imo ngaran; kumanhi an imo ginhadian. Matuman an imo pagburut-an, sugad ha langit, amo man ha tuna.” (Mateo 6:9-13) Ano an kahulogan hinin tulo nga pangamuyo?

3. Ano an kinahanglan hibaroan naton mahitungod han Ginhadian han Dios?

³ Damu na an aton hinbaroan mahitungod han ngaran han Dios, nga Jehova. Ngan ginhisgotan na naton an mahitungod han kaburut-on han Dios—kon ano an iya ginbuhat na ngan pagbubuhaton pa para ha katawohan. Kondi, ano an iginpasabot ni Jesus han ginsugo kita niya nga mag-ampo: “Kumanhi an imo ginhadian”? Ano an Ginhadian han Dios? Paonan-o an pag-abot hito magbabaraan ha ngaran han Dios? Ngan paonan-o  an pag-abot han Ginhadian may kalabotan ha pagtuman han kaburut-on han Dios?

4. Ano an Ginhadian han Dios, ngan hin-o an Hadi hito?

⁴ An Ginhadian han Dios usa nga gobyerno nga gintukod ni Jehova nga Dios nga may-ada Hadi nga iya pinili. Hin-o an Hadi han Ginhadian han Dios? Hi Jesu-Kristo. Sugad nga Hadi, hi Jesus mas gamhanan kay ha ngatanan nga mga tawo nga magmarando ngan tinatawag hiya nga ‘an Hadi han mga hadi, ngan Ginoo han mga ginoo.’ (1 Timoteo 6:15) May-ada hiya gahum ha pagbuhat hin mas damu gud nga kaopayan kay ha bisan hin-o nga tawo nga magmarando, bisan pa an pinakamaopay ha ira.

5. Tikang diin, ngan ha ano magmamando an Ginhadian han Dios?

⁵ Tikang diin magmamando an Ginhadian han Dios? Bueno, hain ba hi Jesus? Sigurado nga nahinunumdoman mo an imo hinbaroan nga ginpatay hiya ha pasakitan nga kahoy, ngan katapos ginbanhaw hiya. Waray pag-iha katapos hito, sinaka hiya ngadto ha langit. (Buhat 2:33) Kon sugad, didto nahimumutang an Ginhadian han Dios—ha langit. Ito an rason kon kay ano nga tinatawag ito ha Biblia nga “ginhadian nga langitnon.” (2 Timoteo 4:18) Bisan kon an Ginhadian han Dios aadto ha langit, magmamando ito ha tuna.—Pahayag 11:15.

6, 7. Kay ano nga hi Jesus an pinakamaopay nga Hadi?

⁶ Kay ano nga hi Jesus an pinakamaopay nga Hadi? An usa nga rason, hiya diri gud mamamatay. Ha pagtanding kan Jesus ha tawhanon nga mga hadi, tinatawag hiya ha Biblia nga “amo la an diri mamaratyon, nga nag-uukoy ha kalamrag nga diri gud sadang hiranian.” (1 Timoteo 6:16) Nangangahulogan ini nga an ngatanan nga mag-opay nga ginbubuhat ni Jesus magpapabilin ha kadayonan. Ngan magbubuhat gud hiya hin urusahon ngan mag-opay nga mga butang.

⁷ Tagda ini nga tagna han Biblia mahitungod kan Jesus: “An espiritu ni Jehova mahugdon dida ha iya, an espiritu han kinaadman, ngan han sarabotan, an espiritu han kasaragdonan ngan han gahum, an espiritu han hibaro ngan han kahadlok kan Jehova. Ngan an iya kalipay maaada ha kahadlok kan Jehova; ngan hiya diri maghuhukom sumala han hikikit-an han iya mga mata,  diri man mahatag hin kahusayan sumala han hinbabatian han iya mga talinga; kondi pinaagi han katadongan hiya maghuhukom han mga kablas, ngan mahatag hin husay pinaagi han kaangayan para ha mga maaghop ha tuna.” (Isaias 11:2-4) Ipinapakita hito nga mga pulong nga hi Jesus magigin matadong ngan mapinairon nga Hadi ha mga tawo dinhi ha tuna. Karuyag mo ba nga magkaada hin magmarando nga pariho hito?

8. Hin-o an magmamando kaupod ni Jesus?

⁸ Iini an usa pa nga kamatuoran mahitungod han Ginhadian han Dios: Hi Jesus diri magmamando nga nag-uusahan. May-ada hiya mga igkasi-magmarando. Pananglitan, hi apostol Pablo nagsiring kan Timoteo: “Kon kita mag-ilob, maghahadi man kita upod niya.” (2 Timoteo 2:12) Oo, hi Pablo, hi Timoteo, ngan an iba pa nga mga magtinumanon nga ginpili han Dios magmamando kaupod ni Jesus ha langitnon nga Ginhadian. Pira kadamu an magkakaada hito nga pribilehiyo?

9. Pira kadamu an magmamando upod ni Jesus, ngan kakan-o nagtikang an Dios pagpili ha ira?

⁹ Sugad han iginpatin-aw ha Kapitulo 7 hini nga libro, hi apostol Juan tinagan hin bisyon diin hinkit-an niya “an Kordero [hi Jesu-Kristo] nga natukdaw ha Bukid nga Sion [an iya hadianon nga katungdanan ha langit], ngan upod niya an usa ka gatos, kap-atan kag upat ka yukot, nga hira may ngaran niya, ngan han iya Amay, nga ipinanurat dida ha ira mga agtang.” Hira hin-o ito nga 144,000? Hi Juan mismo nagsusumat ha aton: “Ini hira amo an nagsusunod ha Kordero bisan diin hiya kadto. Ini hira amo an mga tinubos tikang ha mga tawo, nga magin siyahan nga mga bunga ngadto ha Dios ngan ha Kordero.” (Pahayag 14:1, 4) Oo, hira an matinumanon nga mga sumurunod ni Jesu-Kristo nga espesyal nga pinili basi magmando ha langit upod niya. Katapos banhawon tikang ha kamatayon ngadto ha langitnon nga kinabuhi, ‘maghahadi hira ha tuna’ upod ni Jesus. (Pahayag 5:10) Tikang pa ha panahon han mga apostol, an Dios nagpipili na hin matinumanon nga mga Kristiano basi makompleto an kadamu nga 144,000.

10. Kay ano nga mahigugmaon an paghikay nga magmando ha katawohan hi Jesus ngan an 144,000?

¹⁰ Mahigugmaon gud an paghikay nga magmando ha katawohan  hi Jesus ngan an 144,000. Tungod ini kay maaram hi Jesus kon mationan-o an pagin usa nga tawo ngan pag-antos. Hi Pablo nagsiring nga hi Jesus diri usa nga “diri sadang makahimo hin pagbati ha aton mga kakurian; kondi hiya man ginsulay ha ngatanan nga paagi sugad ha aton, kondi waray sala.” (Hebreo 4:15; 5:8) An iya mga igkasi-magmarando nag-antos ngan nag-ilob liwat sugad nga mga tawo. Dugang pa, pinangalimbasogan nira nga malamposan an pagkadiri-hingpit ngan gin-ilob an ngatanan nga klase hin sakit. Sigurado nga masasabtan nira an mga problema nga inaatubang han mga tawo!

11. Kay ano nga hi Jesus nagsiring nga sadang ig-ampo han iya mga disipulo nga matuman an kaburut-on han Dios ha langit?

¹¹ Han nagsiring hi Jesus nga sadang ig-ampo han iya mga disipulo nga kumanhi an Ginhadian, nagsiring liwat hiya nga sadang nira ig-ampo nga matuman an kaburut-on han Dios “sugad ha langit, amo man ha tuna.” An Dios aadto ha langit, ngan an iya kaburut-on pirme ginbubuhat didto han matinumanon nga mga anghel. Kondi, ha Kapitulo 3 hini nga libro, hinbaroan naton nga usa ka maraot nga anghel an waray na magbuhat han kaburut-on han Dios ngan ginsulay niya hi Adan ngan hi Eva nga makasala. Ha Kapitulo 10, damu pa an aton hibabaroan kon ano an igintututdo han Biblia mahitungod hiton maraot nga anghel, nga kilala naton sugad nga hi Satanas nga Yawa. Hi Satanas ngan an mga anghel nga espirituhanon nga mga linarang nga nagdesisyon ha pagsunod ha iya—nga tinatawag nga mga demonyo—gintugotan nga mag-ukoy ha langit hin pipira ka panahon. Salit, hito nga panahon diri ngatanan ha langit nagbubuhat han kaburut-on han Dios. Mababag-o ito kon magtikang na magmando an Ginhadian han Dios. An bag-o la nga nahitrono nga Hadi, hi Jesu-Kristo, makikig-away kan Satanas.—Pahayag 12:7-9.

12. Ano nga duha nga importante nga hitabo an iginsasaysay ha Pahayag 12:10?

¹² An masunod nga matagnaon nga mga pulong nagsasaysay kon ano an mahitatabo: “Hinbatian ko an daku nga tingog ha langit, nga nasiring: Niyan inabot na an kaluwasan, ngan an kagamhanan, ngan an ginhadian han aton Dios, ngan an  gahum han iya Kristo: kay an mga parasumbong han aton mga kabugtoan [hi Satanas] pinanhulog na, adto nga nagsusumbong ha ira ha atubangan han aton Dios ha adlaw ngan gab-i”! (Pahayag 12:10) Natigamnan mo ba an duha nga importante hinduro nga hitabo nga iginsaysay hito nga bersikulo han Biblia? Siyahan, nagtikang magmando an Ginhadian han Dios pinaagi kan Jesu-Kristo. Ikaduha, iginhulog hi Satanas tikang ha langit nganhi ha tuna.

13. Ano an resulta han paghuloga kan Satanas tikang ha langit?

¹³ Ano an mga resulta hiton duha nga hitabo? Mahitungod han nahitabo ha langit, aton mababasa: “Busa magkalipay kamo, mga langit, ngan kamo nga nag-uukoy dida.” (Pahayag 12:12) Oo, an matinumanon nga mga anghel ha langit nagkakalipay tungod kay hi Satanas ngan an iya mga demonyo waray na didto, salit an ngatanan nga aadto ha langit matinumanon kan Jehova nga Dios. Bug-os ngan waray kataposan an kamurayawan ngan pagkaurosa didto. An kaburut-on han Dios gintutuman na ha langit.

14. Ano an nahitatabo tungod kay iginhulog na hi Satanas nganhi ha tuna?

¹⁴ Kondi, kumusta man an tuna? An Biblia nasiring: “Kairo han tuna ngan han dagat: kay an Yawa linusad ha iyo, nga may daku nga kasina, kay hinbaroan niya nga halipot na la nga oras iton iya pag-ukoy.” (Pahayag 12:12) Hi Satanas nasisina han paghuloga ha iya tikang ha langit ngan tungod kay halipot na la an iya panahon nga nahibibilin. Ha iya kasina, ginpapahinabo niya an kasakitan, o “kairo,” dinhi ha tuna. Damu pa an mahibabaroan naton mahitungod hito nga “kairo” ha masunod nga kapitulo. Kondi samtang ginhuhunahuna ito, mahimo kita magpakiana, Paonan-o tutumanon han Ginhadian an kaburut-on han Dios dinhi ha tuna?

15. Ano an kaburut-on han Dios para ha tuna?

¹⁵ Hinumdumi kon ano an kaburut-on han Dios para ha tuna. Hinbaroan mo an mahitungod hito ha Kapitulo 3. Ha Eden, ipinakita han Dios nga kaburut-on niya nga ini nga tuna magin paraiso nga puno hin diri-namamatay, magtadong nga mga tawo. Ginsulay ni Satanas hi Adan ngan hi Eva nga makasala, ngan nakaapekto ito ha katumanan han kaburut-on han Dios  para ha tuna kondi waray makagbag-o hito. Katuyoan pa gihapon ni Jehova nga “an mga magtadong makakapanunod han tuna, ngan maukoy hira dida hin waray kataposan.” (Salmo 37:29) Ngan tutumanon ito han Ginhadian han Dios. Ha ano nga paagi?

16, 17. Ano an iginsusumat ha aton han Daniel 2:44 mahitungod han Ginhadian han Dios?

¹⁶ Hunahunaa an tagna ha Daniel 2:44. Didto aton mababasa: “Ha mga adlaw hito nga kahadian an Dios ha langit magpapabangon hin usa nga ginhadian, nga diri gud magugunaw, diri man an kagamhanan hini itatapod ha iba nga katawohan; kondi ini magpipinitpinit ngan mag-aanaw hini ngatanan nga ginhadian, ngan ini matindog ha kadayonan.” Ano an iginsusumat hini ha aton mahitungod han Ginhadian han Dios?

¹⁷ Siyahan, nagsusumat ito ha aton nga an Ginhadian han Dios ipapahamutang “ha mga adlaw hito nga kahadian,” o samtang naeksister pa an iba nga mga ginhadian. Ikaduha, nagsusumat ito ha aton nga an Ginhadian magpapadayon ha waray kataposan. Diri ito masasakop ngan masasaliwnan hin iba nga gobyerno. Ikatulo, nasasabtan naton nga magkakaada girra butnga han Ginhadian han Dios ngan han mga ginhadian hini nga kalibotan. An Ginhadian han Dios an magdadaog. Ha kataposan, ito la an magigin gobyerno han katawohan. Ngan an mga tawo magpapahimulos han gimaopayi nga pagmando nga maieksperyensyahan pa la nira.

18. Ano an tawag ha ultimo nga girra han Ginhadian han Dios ngan han mga gobyerno hini nga kalibotan?

¹⁸ Damu an iginsasaysay han Biblia mahitungod hiton ultimo nga girra butnga han Ginhadian han Dios ngan han mga gobyerno hini nga kalibotan. Pananglitan, nagtututdo ito nga samtang nagtitikahirani an kataposan, an magraot nga mga espiritu magpapasamwak hin mga buwa basi limbongan an “mga hadi ha bug-os nga kalibotan.” Ha ano nga katuyoan? “Ha pagtirok ha ira [mga hadi] ngatanan ngadto ha pakig-away ha daku nga adlaw han Dios, nga Makagarahum.” An mga hadi ha tuna pagtitirukon ngatanan ngadto ha “usa nga lugar nga ginngangaranan ha Hebreohanon nga Armagedon.” (Pahayag 16: 14, 16) Tungod han ginsisiring dida hiton duha nga bersikulo, an ultimo nga away han mga gobyerno han tawo ngan han Ginhadian han Dios tinatawag nga girra han Har–Magedon, o Armagedon.

19, 20. Ano an nakakaulang ha katumanan han kaburut-on han Dios dinhi ha tuna yana mismo?

¹⁹ Ano an tutumanon han Ginhadian han Dios pinaagi han Armagedon? Hunahunaa utro an mahitungod han kaburut-on han Dios para ha tuna. Katuyoan han Dios nga an tuna mapuno hin magtadong, hingpit nga mga tawo nga nag-aalagad ha iya ha Paraiso. Ano an nakakaulang hito nga mahitabo yana mismo? Siyahan, magpakasasala kita, ngan nagkakasakit kita ngan namamatay. Kondi, hinbaroan naton ha Kapitulo 5 nga hi Jesus namatay para ha aton basi mahimo kita mabuhi ha waray kataposan. Bangin nahinunumdoman mo an mga pulong nga iginrekord ha Ebanghelyo ni Juan: “An Dios naghigugma gud han kalibotan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi mamay kinabuhi nga waray kataposan.”—Juan 3:16.

²⁰ May-ada usa pa nga problema—damu nga mga tawo an nagbubuhat hin magraot. Hira nagbubuwa, nanlilimbong, ngan nagbubuhat hin imoralidad. Diri hira naruruyag magbuhat han kaburut-on han Dios. An mga tawo nga nagbubuhat hin magraot bubungkagon durante han girra han Dios ha Armagedon. (Salmo 37:10) An usa pa nga hinungdan kon kay ano nga diri ginbubuhat an kaburut-on han Dios dinhi ha tuna, an mga gobyerno diri nagdadasig ha mga tawo nga buhaton ito. Damu nga mga gobyerno an nagin maluya, mabangis, o malimbong. An Biblia prangka nga nasiring: ‘An tawo may gahum labaw ha iba ha iya ikakadaot.’—Eklesiastes 8:9.

21. Paonan-o tutumanon han Ginhadian an kaburut-on han Dios dinhi ha tuna?

²¹ Katapos han Armagedon, an katawohan mamandoan han usa la nga gobyerno, an Ginhadian han Dios. Bubuhaton hito nga Ginhadian an kaburut-on han Dios ngan magdadara hin makalilipay nga mga bendisyon. Pananglitan, pagwawad-on hito hi Satanas ngan an iya mga demonyo. (Pahayag 20:1-3)  Gagamiton an gahum han halad ni Jesus basi an matinumanon nga mga tawo diri na magkakasakit ngan mamamatay. Lugod, ilarom han pagmando han Ginhadian hira mahimo na mabuhi ha waray kataposan. (Pahayag 22:1-3) An tuna magigin paraiso na. Hito nga paagi tutumanon han Ginhadian an kaburut-on han Dios dinhi ha tuna ngan pagbabaraanon hito an ngaran han Dios. Ano an kahulogan hini? Nangangahulogan ini nga ha kataposan, ilarom han Ginhadian han Dios an ngatanan nga buhi magpapasidungog ha ngaran ni Jehova.

22. Kay ano nga maaram kita nga an Ginhadian han Dios waray umabot han hi Jesus nakanhi pa ha tuna o katapos gud banhawon hiya?

²² Han ginsugo ni Jesus an iya mga sumurunod nga mag-ampo nga, “Kumanhi an imo ginhadian,” matin-aw nga an Ginhadian waray pa umabot hito nga panahon. Inabot ba ito han sinaka hi Jesus ngadto ha langit? Waray, tungod kay hi Pedro ngan hi Pablo pariho nagsiring nga katapos banhawon hi Jesus, an tagna ha Salmo 110:1 natuman ha iya: “Hi Jehova siniring ngadto ha akon Ginoo: Lingkod ikaw dida ha akon too nga kamot, tubtob nga an imo mga kaaway magin turumbanan han imo tiil.” (Buhat 2:32-34; Hebreo 10:12, 13) Nagkaada panahon han paghulat.

23. (a) Kakan-o nagtikang magmando an Ginhadian han Dios? (b) Ano an paghihisgotan ha masunod nga kapitulo?

²³ Tubtob san-o? Durante han ika-19 ngan ika-20 ka siglo, hinay-hinay nga nasabtan han sinsero nga mga estudyante han Biblia nga an panahon han paghulat matatapos ha 1914. (Mahitungod hini nga petsa, kitaa  an Apendise, pahina 215-18.) An mga hitabo ha kalibotan nga nagtikang han 1914 nagpapamatuod nga husto an pagsabot hinin sinsero nga mga estudyante han Biblia. An katumanan han tagna han Biblia nagpapakita nga han 1914, hi Kristo nagin Hadi ngan an langitnon nga Ginhadian han Dios nagtikang magmando. Salit, nagkikinabuhi na kita yana ha “halipot na la nga oras” nga nahibibilin para kan Satanas. (Pahayag 12:12; Salmo 110:2) May pagkasigurado nga makakasiring liwat kita nga diri na mag-iiha, an Ginhadian han Dios magios na basi matuman an kaburut-on han Dios dinhi ha tuna. Makalilipay ba para ha imo ini nga mga sumat? Natoo ka ba nga totoo ito? An masunod nga kapitulo mabulig ha imo nga masabtan nga igintututdo gud ini han Biblia.