AN ANGHEL nga tinatawag nga Miguel diri agsob unabihon ha Biblia. Kondi, kon gin-uunabi hiya, may-ada hiya aktibo nga ginbubuhat. Ha libro nga Daniel, hi Miguel nakikig-away ha magraot nga mga anghel; ha surat ni Judas, nakikiglantugi hiya kan Satanas; ngan ha Pahayag, nakikig-away hiya ha Yawa ngan ha iya mga demonyo. Pinaagi han pagdepensa ha pagmando ni Jehova ngan pakig-away ha mga kaaway han Dios, nagbubuhat hi Miguel uyon ha kahulogan han iya ngaran—“Hin-o an Pariho ha Dios?” Kondi hin-o hi Miguel?

Usahay, may mga tawo nga kilala ha sobra usa nga ngaran. Pananglitan, an patriarka nga hi Jakob kilala liwat sugad nga Israel, ngan hi apostol Pedro, sugad nga Simon. (Genesis 49:1, 2; Mateo 10:2) Ha sugad man nga paagi, ipinapakita han Biblia nga Miguel an lain nga ngaran ni Jesu-Kristo, antes ngan katapos niya mabuhi dinhi ha tuna. Aton paghisgotan an Kasuratanhon nga mga rason ha pagkaada hito nga konklusyon.

Arkanghel. Gin-uunabi han Pulong han Dios hi Miguel “nga punoan han mga anghel [“an arkanghel,” NW].” (Judas 9) Tigamni nga hi Miguel tinatawag nga an arkanghel. Nagpapasabot ini nga usa la an sugad nga anghel. Ha pagkamatuod, an termino nga “arkanghel” makikita ha Biblia para ha usa la, diri gud para ha damu. Dugang pa, para la kan Jesus an katungdanan han usa nga arkanghel. Mahitungod han binanhaw nga Ginoo nga hi Jesu-Kristo, an 1 Tesalonika 4:16 nasiring: ‘An Ginoo, ha usa nga pagsinggit, ngan ha tingog han punoan han mga anghel [“arkanghel,” NW], malusad tikang ha langit.’ Salit an tingog ni Jesus iginsasaysay sugad nga  tingog han usa nga arkanghel. Iginpapasabot kon sugad hini nga teksto, nga hi Jesus mismo amo an arkanghel nga hi Miguel.

Lider han Kasundalohan. An Biblia nasiring nga “hi Miguel ngan an iya mga anghel nakikipag-away kontra ha dragon . . . ngan han iya mga anghel.” (Pahayag 12:7) Salit, hi Miguel amo an Lider han kasundalohan han matinumanon nga mga anghel. Ha Pahayag iginsasaysay liwat hi Jesus sugad nga Lider han kasundalohan han matinumanon nga mga anghel. (Pahayag 19:14-16) Ngan espisipiko nga gin-uunabi ni apostol Pablo an “Ginoo nga hi Jesus” ngan an “iya gamhanan nga mga anghel.” (2 Tesalonika 1:7, NW) Salit pariho gin-uunabi han Biblia hi Miguel ngan an “iya mga anghel” ngan hi Jesus ngan an “iya mga anghel.” (Mateo 13:41; 16:27; 24:31; 1 Pedro 3:22) Tungod kay waray bisan ano nga bahin han Pulong han Dios nga nagpapakita nga may-ada duha ka grupo nga kasundalohan han matinumanon nga mga anghel ha langit—usa nga pinangungunahan ni Miguel ngan usa nga pinangungunahan ni Jesus—makatadunganon la an pagsiring nga hi Miguel amo mismo hi Jesu-Kristo ha iya langitnon nga katungdanan. *