Durante han ultimo nga gab-i ni Jesus upod han iya mga apostol, nagtutdo hiya hin maopay nga leksyon mahitungod han pagpaubos pinaagi ha paghimsaw ha ira. Kay ano nga angayan gud ito? Tungod han ira iginpapakita nga kaluyahan. Matinumanon hira ha Dios, pero naghuhunahuna pa gihapon hira kon hin-o ha ira an gilalabawi. (Marcos 9:33, 34; 10:35-37) Ini nga ira kaluyahan nakita utro hito nga gab-i.

An mga apostol ‘nagdiniskusyon kon hin-o ha ira an may gidadakui nga awtoridad.’ (Lucas 22:24) Sigurado nga nasubo gud hi Jesus han makita niya nga nagdidiskusyon na liwat hira! Ano an iya ginbuhat?

Imbes nga isgan an mga apostol tungod han ira disposisyon ngan panggawi, mapailubon nga nangatadongan hi Jesus ha ira: “An mga hadi han mga nasud nagpapakaagaron ha katawohan, ngan an mga may awtoridad ha ira gintatawag nga Pilantropo. Pero diri kamo magin sugad hito. . . . Kay hin-o an mas daku an awtoridad, an nalingkod ha lamesa o an nagsiserbi?” Katapos, ginpahinumdoman niya hira han ehemplo nga pirme niya iginpapakita ha ira: “Kondi ako, pariho han usa nga nagsiserbi ha iyo.”—Lucas 22:25-27.

Bisan pa han mga kaluyahan han mga apostol, nagpabilin hira nga kaupod ni Jesus ha damu nga magkuri nga kahimtang. Salit hiya nagsiring: “Naghihimo ako hin kasabotan ha iyo, sugad la nga an akon Amay naghimo hin kasabotan ha akon, para ha usa nga Ginhadian.” (Lucas 22:29) Ini nga kalalakin-an maunungon nga mga sumurunod ni Jesus. Ginpasarig niya hira nga pinaagi hito nga kasabotan, makakapanunod hira han Ginhadian ngan magmamando kaupod niya.

Bisan kon may makaruruyag gud nga paglaom an mga apostol, tawo la gihapon hira ngan diri hingpit. Ginsidngan hira ni Jesus: ‘Karuyag ni Satanas nga ag-agon kamo sugad hin trigo,’ nga nagsasarang kon gin-aag-ag. (Lucas 22:31) Nagpahamangno liwat hiya: “Babayaan ako niyo ngatanan tungod han mahitatabo ha akon yana nga gab-i, kay ini an iginsurat: ‘Papatayon ko an paraataman, ngan an mga karnero magpapatlaag.’”—Mateo 26:31; Sakarias 13:7.

May kompyansa nga nagsiring hi Pedro: “Bisan bayaan ka nira ngatanan tungod han mahitatabo ha imo, diri ko gud ikaw babayaan!” (Mateo 26:33) Ginsidngan ni Jesus hi Pedro nga antes tumugaok an manok hin makaduha hito nga gab-i, igninigar hiya ni Pedro. Bisan pa hito, nagdugang hi Jesus: “Nangamuyo ako para ha imo nga diri magluya an imo pagtoo, ngan katapos mo magbasol, parig-ona an imo kabugtoan.” (Lucas 22:32) Pero marig-on nga nagpasarig hi Pedro: “Bisan pa ako mamatay kaupod mo, diri ko gud ikaw igninigar.” (Mateo 26:35) Ito liwat an ginsiring han iba nga apostol.

Ginsidngan ni Jesus an iya mga disipulo: “Halipot na la nga panahon nga makakaupod ako niyo. Bibilngon niyo ako, pero igsisiring ko liwat ha iyo yana an akon ginsiring ha mga Judio, ‘Diri kamo makakakadto ha akon kakadtoan.’” Katapos hiya nagdugang: “Naghahatag ako ha iyo hin bag-o nga sugo, nga maghigugmaay kamo; sugad han akon paghigugma ha iyo, maghigugmaay liwat kamo. Tungod hini an ngatanan mahibabaro nga mga disipulo ko kamo, kon naghihigugmaay kamo.”—Juan 13:33-35.

Pakabati ha ginsiring ni Jesus nga halipot na la nga panahon nga makakaupod niya hira, hi Pedro nagpakiana: “Ginoo, makain ka?” Binaton hi Jesus: “Diri ka makakakadto yana ha akon kakadtoan, pero masunod ka pagkatapos.” Waray ito masabti ni Pedro, salit nagsiring hiya: “Ginoo, kay ano nga diri ako makakaupod ha imo yana? Ihahatag ko an akon kalag para ha imo.”—Juan 13:36, 37.

Gin-unabi yana ni Jesus an panahon han ginsugo niya an mga apostol nga magsangyaw ha bug-os nga Galilea nga waray dara nga surudlan hin kwarta o surudlan han pagkaon. (Mateo 10:5, 9, 10) Nagpakiana hiya: “Waray kamo makulangi hin bisan ano, diri ba? Binaton hira: ‘Waray!’” Pero ano an sadang nira buhaton ha maabot nga mga adlaw? Ginsugo hira ni Jesus: “An may supot han kwarta magdara hito, sugad man hin surudlan han pagkaon, ngan an waray espada magbaligya han iya pantungbaw nga panapton ngan pumalit hin usa. Kay susumatan ko kamo nga kinahanglan matuman ha akon ini nga iginsurat, ‘Ngan gintagad hiya nga kaupod han mga matinalapason.’ Kay an ginsurat mahitungod ha akon natutuman na.”—Lucas 22:35-37.

An ginhihisgotan ni Jesus amo an panahon nga iraraysang hiya ha kahoy sapit an mga magburuhat hin maraot, o mga matinalapason. Diri mag-iiha katapos hito, an iya mga sumurunod makakaeksperyensya hin duro nga pagtimaraot. Para ha ira andam na hira, salit nagsiring hira: “Ginoo, kitaa! may duha nga espada didi.” Binaton hiya: “Puydi na ito.” (Lucas 22:38) An pagkaada nira hin duha nga espada maghahatag kan Jesus hin higayon nga magtutdo hin usa pa nga importante nga leksyon.