Han nakadto pa hi Jesus ha kwarto ha igbaw kaupod an mga apostol katapos han panihapon ha memoryal, iya gindasig hira: “Ayaw pabay-i nga masubo an iyo kasingkasing. Magpakita kamo hin pagtoo ha Dios, ngan magpakita liwat kamo hin pagtoo ha akon.”—Juan 13:36; 14:1.

Gintagan ni Jesus hin rason an magtinumanon nga apostol nga diri masubo ha iya pagbaya: “Ha balay han akon Amay damu an urukyan. . . . Kon kumadto ako ngan mag-andam hin lugar para ha iyo, mabalik ako ngan ig-uupod ko kamo ha akon balay basi kon hain ako, aadto liwat kamo.” Pero waray nira masantop nga an iya ginsisiring amo an iya pagkadto ha langit. Hi Tomas nagpakiana: “Ginoo, diri kami maaram kon makain ka. Paonan-o namon mahibabaroan an dalan?”—Juan 14:2-5.

Hi Jesus binaton: “Ako an dalan ngan an kamatuoran ngan an kinabuhi.” An paagi la basi makasulod ha balay han iya Amay ha langit amo an pagkarawat ha iya ngan ha iya katutdoan ngan pagsubad han iya pagkinabuhi. Hiya nagpadayon: “Waray nakakakadto ha Amay kon diri pinaagi ha akon.”—Juan 14:6.

Hi Felipe, nga namamati hin maopay, naghangyo: “Ginoo, ipakita ha amon an Amay, ngan kontento na kami hito.” Baga hin karuyag ni Felipe nga makita an Dios, pariho han mga bisyon nga nakarawat nira Moises, Elias, ngan Isaias. Pero, labaw pa ha sugad nga mga bisyon an nakita han mga apostol. Ginpabug-atan ito ni Jesus: “Maiha na nga kaupod niyo ako, pero diri mo pa ako kilala, Felipe? An nakakita ha akon nakakita liwat ha Amay.” Perpekto nga iginpakita ni Jesus an personalidad han Amay; salit an pakig-upod ha iya ngan an pakaobserbar ha iya pariho ha pakakita ha Amay. Syempre, an Amay labaw kay ha Anak, kay hi Jesus nagpatin-aw: “An akon ginsisiring ha iyo diri akon kalugaringon nga mga ideya.” (Juan 14:8-10) Nakita han mga apostol nga iginhahatag ni Jesus ha iya Amay an ngatanan nga kadayawan tungod han iya mga igintututdo.

An mga apostol ni Jesus nakakita han iya urusahon nga mga buhat ngan nakabati han iya pagpasamwak han maopay nga sumat mahitungod han Ginhadian han Dios. Yana iya ginsumatan hira: “An nagpapakita hin pagtoo ha akon magbubuhat liwat han akon mga ginbubuhat, ngan labaw pa hini an iya bubuhaton.” (Juan 14:12) Diri iginpapasabot ni Jesus nga maghihimo hira hin mas damu nga milagro kay ha iya. Lugod, tutumanon nira an ira ministeryo ha mas hilawig nga panahon, mas haluag nga teritoryo, ngan mas damu nga tawo.

Diri hira papabay-an ni Jesus bisan kon bumaya na hiya, kay hiya nagsaad: “Kon mangaro kamo hin bisan ano ha akon ngaran, ihahatag ko ito.” Nagsiring pa hiya: “Maghahangyo ako ha Amay ngan tatagan niya kamo hin iba nga parabulig nga makakaupod niyo ha kadayonan, an espiritu han kamatuoran.” (Juan 14:14, 16, 17) Ginpasarig niya hira nga makarawat hira han baraan nga espiritu, an iba nga parabulig. Nahitabo ito ha adlaw han Pentekostes.

Hi Jesus nagsiring: “Halipot na la nga panahon ngan diri na ako makikita han kalibotan, pero makikita niyo ako kay magpapadayon ako nga buhi ngan mabubuhi liwat kamo.” (Juan 14:19) Labot la nga magpapakita hi Jesus ha ira ha pisikal nga lawas katapos niya mabanhaw, ha urhi, babanhawon niya hira ngadto ha langit sugad nga espiritu nga mga linarang basi makaupod niya.

Yana, iginsumat ni Jesus ini nga kamatuoran: “An nakarawat han akon mga sugo ngan nagtutuman hito, nahigugma ha akon. An nahigugma ha akon hihigugmaon liwat han akon Amay, ngan akon hiya hihigugmaon ngan ipapakilala ko ha iya an akon kalugaringon.” Salit hi apostol Judas nga gintatawag liwat nga Tadeo nagpakiana: “Ginoo, kay ano nga karuyag mo ipakilala ha amon an imo kalugaringon pero diri ha kalibotan?” Hi Jesus binaton: “An bisan hin-o nga nahigugma ha akon magtutuman han akon pulong, ngan hihigugmaon hiya han akon Amay . . . An diri nahigugma ha akon diri nagtutuman han akon mga pulong.” (Juan 14:21-24) Diri pariho han iya mga sumurunod, diri ginkikilala han kalibotan hi Jesus sugad nga an dalan, an kamatuoran, ngan an kinabuhi.

Mabaya hi Jesus, salit paonan-o mahinunumdoman han iya mga disipulo an ngatanan nga iya igintutdo? Hi Jesus nagsaysay: “An parabulig, an baraan nga espiritu, nga ipapadara han Amay ha akon ngaran, ito an magtututdo ha iyo han ngatanan nga butang ngan magpapahinumdom ha iyo han ngatanan nga akon iginsumat ha iyo.” Nakita na han mga apostol kon mationan-o kadaku an nahihimo han baraan nga espiritu, salit nakakaliaw ini nga pasarig. Hi Jesus nagdugang: “Igbibilin ko ha iyo an kamurayawan nga iginhatag ko ha iyo. . . . Ayaw pabay-i nga masubo o mahadlok an iyo kasingkasing.” (Juan 14:26, 27) Salit, may rason an mga disipulo nga diri masubo—gigiyahan ngan papanalipdan hira han Amay ni Jesus.

Diri mag-iiha, makikita an ebidensya han panalipod han Dios. Hi Jesus nagsiring: “Tiabot an magmarando han kalibotan. Diri niya ako madadaog.” (Juan 14:30) Hi Judas naimpluwensyahan ngan nakontrol han Yawa. Pero waray kaluyahan hi Jesus nga magagamit ni Satanas basi isalikway niya an Dios. Diri liwat hiya mapupugngan han Yawa pinaagi han kamatayon. Kay ano? Hi Jesus nagsiring: “Ginbubuhat ko an iginsugo ha akon han Amay.” Sigurado hiya nga babanhawon hiya han iya Amay.—Juan 14:31.