Han “mga alas-12 ha udto,” urusahon nga nagsirom an “bug-os nga tuna tubtob han mga alas-3 ha kulop.” (Marcos 15:33) Diri ini tungod hin eklipse. Nagkakaada la eklipse kon dulom, ngan panahon adto han Paskua, salit kadayaw. Ngan ini nga pagsirom mas maiha kay han eklipse nga nahitatabo hin pipira la ka minuto. Salit an Dios an nagpahinabo hini!

Hunahunaa la an epekto hini ha mga nagtatamay kan Jesus. Durante hinin masirom nga takna, may upat nga babaye nga dinaop ha pasakitan nga kahoy. Ini nga kababayin-an amo hira Maria nga nanay ni Jesus, Salome, Maria Magdalena, ngan Maria nga nanay han burobata nga Santiago nga apostol.

Hi apostol Juan kaupod han masurub-on gud nga nanay ni Jesus “hirani ha pasakitan nga kahoy.” Ginkinita ni Maria an iya anak nga iya ginmangnoan, nga nag-aantos ha pasakitan nga kahoy. Para ha iya, sugad hin ginbuno hiya hin “hilaba nga espada.” (Juan 19:25; Lucas 2:35) Pero, bisan pa han duro nga kasakit ni Jesus, ginhunahuna pa gihapon niya an kaopayan han iya nanay. Nangalimbasog hiya pagtangdo kan Juan ngan pagsiring ha iya nanay: “Babaye, kitaa! An imo anak!” Katapos, tinangdo hiya kan Maria, ngan ginsidngan hi Juan: “Kitaa! An imo nanay!”—Juan 19:26, 27.

Igintapod ni Jesus ha apostol nga iya gud hinigugma an pag-ataman ha iya nanay, nga matin-aw nga balo na. Maaram hiya nga an iya kabugtoan ha nanay, an iba nga anak ni Maria, diri pa natoo ha iya. Salit ginhikay niya nga may magtagana han materyal ngan espirituwal nga panginahanglan han iya nanay. Maopay gud hiya nga susbaranan!

Han naglamrag na, hi Jesus nagsiring: “Nauuhaw ako.” Pinaagi hini, gintuman niya an ginsiring ha Kasuratan. (Juan 19:28; Salmo 22:15) Inabat ni Jesus nga sugad hin waray na hiya panalipdi han iya Amay basi masarihan gud an iya integridad. Salit sininggit hiya, bangin ha yinaknan han mga taga-Galilea nga Aramaiko: “Eli, Eli, lama sabachthani?” nga nangangahulogan, “Dios ko, Dios ko, kay ano nga ginpabay-an mo ako?” Sayop an pagsabot han pipira nga naninindog ha hirani, hira nagsiring: “Pamatii niyo! Gintatawag niya hi Elias.” An usa ha ira dinalagan, nagtunlob hin espongha ha maaslom nga bino, ngan iginbutang ito ha tangbo basi painumon hi Jesus. Pero an iba nagsiring: “Pabay-i hiya! Kitaon naton kon makanhi ba hi Elias basi ilusad hiya.”—Marcos 15:34-36.

Katapos ginuliat hi Jesus: “Natuman na!” (Juan 19:30) Oo, natuman na niya an ngatanan nga iginsugo han iya Amay nga buhaton niya dinhi ha tuna. Ha kataposan, hiya nagsiring: “Amay, igintatapod ko ha imo an akon espiritu.” (Lucas 23:46) Salit igintubyan ni Jesus kan Jehova an iya pwersa han kinabuhi, natapod nga ibabalik ito ha iya. Katapos, dinuko hiya ngan namatay nga may bug-os nga pagsarig ha Dios.

Dida hito, naglinog hin makusog, ngan nabuka an mga bato. Makusog gud ito salit naabrihan an mga lubnganan ha gawas han Jerusalem ngan nahigawas an mga patay. Han nakita ito han mga naagi, sinulod hira ha “baraan nga syudad” ngan iginsumat an ira nakita.—Mateo 12:11; 27:51-53.

Kamatay ni Jesus, an hilaba ngan mabug-at nga kurtina ha templo han Dios nga nagbabahin ha Baraan ngan Pinakabaraan nagisi tikang ha igbaw tubtob ha ubos. Iton urusahon nga panhitabo usa nga pagpakita han kasina han Dios ha mga nagpatay ha iya Anak, ngan nagpapasabot ito nga abrido na an dalan ngadto ha Pinakabaraan, ha langit mismo.—Hebreo 9:2, 3; 10:19, 20.

Natural la nga nahadlok gud an mga tawo. An opisyal han mga sundalo nga gintaporan ha pagpatay nagsiring: “Sigurado gud nga ini nga tawo Anak han Dios.” (Marcos 15:39) Bangin nakadto hiya ha pagbista kan Jesus ha atubangan ni Pilato han ginhisgotan kon hi Jesus ba anak han Dios o diri. Yana, kombinsido hiya nga hi Jesus matadong ngan amo gud an Anak han Dios.

An iba nga naapektohan gud hinin urusahon nga panhitabo, nanguli nga “ginpupukpok an ira dughan” tungod han duro nga kasubo ngan kaawod. (Lucas 23:48) Upod han mga nagkinita tikang ha hirayo an damu nga disipulo nga kababayin-an nga nakaupod na ni Jesus ha pagbiyahe. Nabantad gud liwat hira hinin makatirigamnan nga mga hitabo.