Katapos gapuson hi Jesus sugad hin kriminal, gindara hiya kan Anas, nga amo an hitaas nga saserdote ha panahon nga nahipausa an mga magturutdo ha templo ha bata nga hi Jesus. (Lucas 2:42, 47) May mga anak hi Anas nga ha urhi nagin hitaas nga saserdote, ngan yana an iya umagad nga hi Caifas an aada hito nga posisyon.

Han nakadto hi Jesus ha balay ni Anas, nagkaada higayon hi Caifas nga tirukon an mga membro han Sanhedrin. Ito nga korte may 71 nga membro upod an hitaas nga saserdote ngan iba pa nga may sugad hito nga posisyon hadto.

Ginpakianhan ni Anas hi Jesus “mahitungod han iya mga disipulo ngan han iya katutdoan.” Pero ini la an baton ni Jesus: “Nagyakan ako ha atubangan han mga tawo. Pirme ako nagtututdo ha sinagoga ngan ha templo, diin nagkakatirok an mga Judio; ngan waray ako igintatago ha iyo. Kay ano nga ginpapakianhan mo ako? Pakianhi an mga nakabati kon ano an akon ginyakan ha ira.”—Juan 18:19-21.

Gintampalo hi Jesus hin opisyal ngan ginsaway: “Sugad ba hito an imo pagbaton ha punoan nga saserdote?” Pero maaram hi Jesus nga waray hiya nabuhat nga sayop, salit hiya binaton: “Kon sayop an akon ginsiring, pamatud-i nga sayop ito; pero kon husto an akon ginsiring, kay ano nga gintampalo mo ako?” (Juan 18:22, 23) Katapos iginpadara ni Anas hi Jesus ngadto ha iya umagad nga hi Caifas.

Hito nga takna, kompleto na an ngatanan nga membro han Sanhedrin—an hitaas nga saserdote, katigurangan, ngan mga eskriba. Nagkatirok hira ha balay ni Caifas. Ilegal an sugad nga pagbista ha gab-i han Paskua, pero waray ito makapugong han ira maraot nga plano.

Diri gud hira patas. Katapos banhawon ni Jesus hi Lasaro, nagdesisyon an Sanhedrin nga kinahanglan patayon hi Jesus. (Juan 11:47-53) Ngan ha naglabay pa la nga mga adlaw, an mga lider han relihiyon nagsarabot pag-aresto ngan pagpatay ha iya. (Mateo 26:3, 4) Oo, antes pa man hiya bistahon, ginsentensyahan na hiya hin kamatayon!

Labot pa ha ilegal nga pagbista, an punoan nga mga saserdote ngan an iba pa nga membro han Sanhedrin nangalimbasog pamiling hin mga testigo nga magsusumat hin buwa basi makasohan hi Jesus. Damu an ira nabilngan, pero diri nagkakauruyon an ira mga testimonya. Ha urhi, may duha nga nagsiring: “Hinbatian namon hiya nga nagyakan, ‘Bubungkagon ko ini nga templo nga ginhimo han mga kamot, ngan ha sulod hin tulo ka adlaw magtitindog ako hin iba nga diri hinimo han mga kamot.’” (Marcos 14:58) Pero bisan hira nga duha diri gud nagkakauyon.

Ginpakianhan ni Caifas hi Jesus: “Waray ka ba ibabaton? Ano an imo masisiring ha ira testimonya kontra ha imo?” (Marcos 14:60) Hi Jesus waray bumaton hiton buwa nga akusasyon han mga testigo nga diri magkauruyon an testimonya. Salit ginamit hin iba nga taktika an hitaas nga saserdote nga hi Caifas.

Maaram hi Caifas nga nasisina gud an mga Judio ha bisan hin-o nga nag-aangkon nga Anak han Dios. Ha naglabay, han gintawag ni Jesus an Dios nga iya Amay, gin-ikaparatay hiya han mga Judio kay nasiring hira nga iya “gintatagad an iya kalugaringon nga katupong han Dios.” (Juan 5:17, 18; 10:31-39) Maaram hito hi Caifas salit tuso nga ginsugo niya hi Jesus: “Ginpapasumpa ko ikaw ha atubangan han buhi nga Dios nga magsumat ka han kamatuoran kon ikaw an Kristo, an Anak han Dios!” (Mateo 26:63) Syempre, iginpakilala ni Jesus an iya kalugaringon sugad nga an Anak han Dios. (Juan 3:18; 5:25; 11:4) Kon diri niya ito buhaton yana, mahimo hunahunaon nga iginninigar niya nga hiya an Anak han Dios ngan an Kristo. Salit hi Jesus nagsiring: “Oo, ako, ngan makikita niyo an Anak han tawo nga nalingkod ha too han Usa nga Gamhanan, ngan napakanhi upod han mga dampog ha langit.”—Marcos 14:62.

Tungod hini, kunohay nga nasisina gud nga gin-gisi ni Caifas an iya bado ngan ginuliat: “Nagpapasipara hiya ha Dios! Kinahanglan pa ba naton hin mga testigo? Kitaa! Iyo yana nabatian an iya pagpasipara. Ano an iyo masisiring?” Iginpahayag han Sanhedrin an diri patas nga desisyon: “Angay hiya patayon.”—Mateo 26:65, 66.

Katapos, ginhimo nira nga pataraw-an hi Jesus ngan ginsuntok. Gintampalo hiya han iba ngan gintuprahan ha nawong. Kahuman tahoban an iya nawong ngan tampaluhon, nakakainsulto nga ginsidngan nira hiya: “Kon propeta ka, tigoha, hin-o an nagsuntok ha imo?” (Lucas 22:64) Oo, an Anak han Dios gin-abuso ha ilegal nga pagbista ha gab-i!