Waray maglampos an nakontra nga mga lider han relihiyon ha pagpakaraot kan Jesus o pagbitik ha iya pinaagi han iya mga pulong basi madara hiya ha mga Romano. (Lucas 20:20) Yana, samtang nakadto pa hi Jesus ha templo han Nisan 11, ginbaliktad niya an sitwasyon ngan iginpakita kon hin-o gud hiya. Nag-una hiya ha pagpakiana: “Ano an iyo paghunahuna mahitungod han Kristo? Kan kanay hiya anak?” (Mateo 22:42) Maaram an damu nga an Kristo, o Mesias, magtitikang ha tulin ni David. Salit ito an ira iginbaton.—Mateo 9:27; 12:23; Juan 7:42.

Hi Jesus nagpakiana: “Kon amo, kay ano man nga pinaagi han giya han baraan nga espiritu, gintawag hiya ni David nga Ginoo, nga nasiring, ‘Hi Jehova nagsiring ha akon Ginoo: “Lingkod ha akon too tubtob nga ibutang ko an imo mga kaaway ha ilarom han imo mga tiil”’? Salit kon gintawag hiya ni David nga Ginoo, paonan-o hiya nagin anak ni David?”—Mateo 22:43-45.

Waray makabaton an mga Pariseo, kay naglalaom hira hin usa nga tawo nga tulin ni David nga bangin maghahatag ha ira hin kagawasan tikang ha pagmando han mga Romano. Pero pinaagi ha pagkotar han ginsiring ni David ha Salmo 110:1, 2, iginpakita ni Jesus nga an Mesias magigin labaw kay ha tawo nga magmarando. Ginoo hiya ni David, ngan katapos lumingkod ha too han Dios, gagamiton niya an iya awtoridad. An mga nakontra kan Jesus humilom tungod han iya baton.

Nagpinamati an mga disipulo ngan an damu nga iba pa. Yana ginkaistorya hira ni Jesus ngan ginpahamangnoan mahitungod han mga eskriba ngan mga Pariseo. Ito nga kalalakin-an “naglugaring paglingkod ha lingkoran ni Moises” basi magtutdo han Balaud han Dios. Ginsugo ni Jesus an iya mga mamarati: “Buhata ngan tumana niyo an ngatanan nga ira ginsisiring, pero ayaw pagsubara an ira ginbubuhat, kay diri nira ginbubuhat an ira ginyayakan.”—Mateo 23:2, 3.

Katapos naghatag hiya hin ehemplo han ira pagkahipokrito: “Ginpapadaku nira an gudtiay nga kahon nga surudlan han mga mensahe han Kasuratan nga ira iginsusul-ot sugad nga panalipod.” An iba nga Judio naghihigot ha ira agtang o butkon hin gudtiay nga kahon nga may halipot nga mga kotasyon tikang ha Balaud. Ginpapadaku han mga Pariseo ito nga mga kahon basi sidngon nga ginsusunod gud nira an Balaud. Dugang pa, ira “ginpapahalapad an sidsid han ira bado.” May tasel an sidsid han bado han mga Israelita, pero ginsisiguro han mga Pariseo nga mas halapad an ira. (Numeros 15:38-40) Ginbubuhat nira ito ngatanan kay “karuyag nira nga makita han mga tawo.”—Mateo 23:5.

Bisan an mga disipulo ni Jesus mahimo maghingyap nga magin prominente, salit ginsagdonan niya hira: “Ayaw kamo pagpatawag nga Rabbi, kay usa la an iyo Magturutdo, ngan kamo ngatanan magburugto. Diri liwat niyo tawagon nga amay an bisan hin-o ha tuna, kay usa la an iyo Amay nga aadto ha langit. Ngan ayaw kamo pagpatawag nga mga lider, kay usa la an iyo Lider, an Kristo.” Kon sugad, paonan-o sadang tagdon han mga disipulo an ira kalugaringon ngan paonan-o hira sadang gumios? Hi Jesus nagsiring ha ira: “An may daku nga awtoridad ha iyo, sadang magin surugoon niyo. An bisan hin-o nga nagpapahitaas pauubson, ngan an bisan hin-o nga nagpapaubos pahihitas-on.”—Mateo 23:8-12.

Katapos, sunod-sunod nga iginpahayag ni Jesus nga kairo han hipokrito nga mga eskriba ngan mga Pariseo: “Kairo niyo, mga eskriba ngan mga Pariseo, mga hipokrito! Tungod kay iyo ginsasadhan an Ginhadian han langit ha mga tawo. Kamo mismo diri nasulod, diri liwat niyo ginpapasulod an mga tisulod.”—Mateo 23:13.

Ginkondenar ni Jesus an mga Pariseo kay ginbabalewaray nira an mas importante para kan Jehova, sugad han makikita ha ira waray basihan nga mga surundon. Pananglitan, hira nasiring: “Bisan hin-o nga nagsusumpa pinaagi han templo, diri nakakasayop bisan kon diri niya ito tumanon. Pero an bisan hin-o nga nagsusumpa pinaagi han bulawan ha templo obligado hiya nga tumanon ito.” Salit iginpapakita nira nga diri hira maaram han husto o sayop kay mas ginpapabug-atan nira an bulawan ha templo kay han espirituwal nga kapulsanan han lugar para ha pagsingba kan Jehova. Ngan ira ‘ginbabalewaray an mas importante nga mga sugo han Balaud, sugad han hustisya, kalooy, ngan pagkamatinumanon.’—Mateo 23:16, 23; Lucas 11:42.

Gintawag ni Jesus ini nga mga Pariseo nga ‘mga buta nga paratugway, nga nagsasarà han tagnok pero nagtutulon han kamel!’ (Mateo 23:24) Ginsasarà nira an tagnok tikang ha bino kay ito nga insekto mahugaw sumala ha Balaud. Kondi, an ira pagbalewaray ha mas importante nga mga sugo ha Balaud pariho hin pagtulon hin kamel nga gintatagad liwat nga mahugaw, pero mas daku gud.—Lebitiko 11:4, 21-24.