Ginpinarig-on ni Jesus an iya magtinumanon nga apostol pinaagi hin kinasingkasing nga pakiistorya. Hilarom na an gab-i, posible nga pasado na han alas-12. Yana naghatag hi Jesus hin makapaaghat nga ilustrasyon:

Ha pagtikang, hiya nagsiring: “Ako an totoo nga puno han ubas, ngan an akon Amay an parauma.” (Juan 15:1) An iya ilustrasyon puropariho ha ginsiring mga siglo na an naglabay mahitungod han nasud han Israel, nga gintawag nga balagon o puno han ubas ni Jehova. (Jeremias 2:21; Hosea 10:1, 2) Pero iginsalikway ni Jehova ito nga nasud. (Mateo 23:37, 38) Salit bag-o nga ideya an gin-uunabi ni Jesus. Hiya an puno han ubas nga ginkinultibar han Amay tikang han gindihogan hiya pinaagi han baraan nga espiritu han 29 C.E. Pero iginpakita ni Jesus nga diri la hiya an ginsisimbolohan han puno han ubas.

Hiya nagsiring: ‘An tagsa ko nga sanga nga diri namumunga gin-uutod [han akon Amay], ngan an tagsa nga sanga nga namumunga iya ginpapangutdan basi mamunga hin mas damu. An sanga diri mamumunga kon diri ito magpabilin ha puno han ubas. Ha pariho nga paagi, diri kamo mamumunga kon diri kamo magpabilin nga kahiusa ko. Ako an puno han ubas, kamo an mga sanga.’—Juan 15:2-5.

Nagsaad hi Jesus ha iya magtinumanon nga disipulo nga kon bumaya na hiya, magpapadara hiya hin parabulig, an baraan nga espiritu. Paglabay hin 51 ka adlaw, han makarawat han mga apostol ngan han iba pa ito nga espiritu, nagin sanga hira han puno han ubas. Ngan an ngatanan nga “sanga” kinahanglan magpabilin nga kahiusa ni Jesus. Para mahimo an ano?

Hiya nagsaysay: “An nagpapabilin nga kahiusa ko, ngan ako kahiusa niya, nagbubunga hin damu; kay waray kamo mahihimo kon bulag kamo ha akon.” Ini nga “mga sanga”—an iya magtinumanon nga sumurunod—mamumunga hin damu, magsusubad ha mga kalidad ni Jesus, aktibo nga magsusumat ha iba mahitungod han Ginhadian han Dios, ngan manhihimo hin mas damu nga disipulo. Kumusta man kon an usa diri magpabilin nga kahiusa ni Jesus ngan diri mamunga? Hi Jesus nagsaysay: “Bisan hin-o nga diri nagpapabilin nga kahiusa ko iginlalabog.” Ha luyo nga bahin, hiya nagsiring: “Kon magpabilin kamo nga kahiusa ko ngan kon tipigan niyo an akon mga pulong, aroa an anoman nga karuyag niyo ngan ihahatag ito ha iyo.”—Juan 15:5-7.

Yana gin-utro ni Jesus an gin-unabi na niya hin duha ka beses—an pagtuman han iya mga sugo. (Juan 14:15, 21) Iginhulagway niya an usa nga importante nga paagi basi mapamatud-an han mga disipulo nga ginbubuhat nira ini: “Kon gintutuman niyo an akon mga sugo, magpapabilin kamo ha akon gugma, sugad la nga gintutuman ko an mga sugo han Amay ngan nagpapabilin ha iya gugma.” Pero, may-ada pa hira kinahanglan buhaton labot la ha paghigugma kan Jehova nga Dios ngan ha iya Anak. Hi Jesus nagsiring: “Ini an akon sugo, nga maghigugmaay kamo sugad han paghigugma ko ha iyo. Waray na malabaw ha gugma han usa nga naghahatag han iya kalag para ha iya kasangkayan. Kasangkayan ko kamo kon ginbubuhat niyo an iginsusugo ko ha iyo.”—Juan 15:10-14.

Pipira na la ka oras, ipapakita ni Jesus an iya gugma pinaagi ha paghatag han iya kinabuhi para ha ngatanan nga nagpapakita hin pagtoo ha iya. An iya susbaranan sadang magpagios ha iya mga sumurunod nga magkaada hin pariho nga nagsasakripisyo nga gugma ha kada tagsa. Ini nga gugma an ira pangirilal-an, sugad han ginsiring na ni Jesus: “Tungod hini an ngatanan mahibabaro nga mga disipulo ko kamo, kon naghihigugmaay kamo.”—Juan 13:35.

Sadang tigamnan han mga apostol nga gintawag hira ni Jesus nga “kasangkayan.” Iya iginsaysay an hinungdan: “Gintatawag ko kamo nga kasangkayan, kay an ngatanan nga hinbatian ko ha akon Amay iginpapahibaro ko ha iyo.” Presyoso gud ito nga relasyon—nga magin duok nga kasangkayan ni Jesus ngan mahibaro ha ginsiring han Amay ha iya! Pero basi magkaada han sugad nga relasyon, kinahanglan hira “padayon nga mamunga.” Kay kon buhaton nira ito, hi Jesus nagsiring, “bisan ano an iyo aroon ha Amay ha akon ngaran, ihahatag niya ito ha iyo.”—Juan 15:15, 16.

An paghigugmaay hini nga “mga sanga,” an iya mga disipulo, mabulig ha ira nga mailob an anoman nga mahitatabo ha tidaraon. Iya ginpahamangnoan hira nga an kalibotan masisina ha ira, pero iginhatag niya ini nga pagliaw: “Kon nasisina ha iyo an kalibotan, maaram kamo nga nasina ito ha akon antes masina ha iyo. Kon kanan kalibotan kamo, hinigugma unta kamo han kalibotan kay panag-iya kamo hito. Pero . . . diri na kamo kanan kalibotan, salit nasisina ito ha iyo.”—Juan 15:18, 19.

Basi dugang nga isaysay kon kay ano nga masisina ha ira an kalibotan, hi Jesus nagpadayon: “Bubuhaton nira ha iyo ini ngatanan tungod han akon ngaran, kay diri hira nakilala ha nagsugo ha akon.” Nagsiring hi Jesus nga tungod han iya ginbuhat nga mga milagro, napamatud-an nga salaan an mga nasisina ha iya: “Kon waray ko buhata an mga milagro nga waray gud iba nga nakahimo, waray unta hira sala; pero yana nga nakita nira an akon mga milagro, nangangalas hira ha akon ngan ha akon Amay.” Ha pagkamatuod, an ira kasina katumanan han tagna.—Juan 15:21, 24, 25; Salmo 35:19; 69:4.

Nagsaad utro hi Jesus nga magpapadara hiya hin parabulig, an baraan nga espiritu. Ito nga gamhanan nga pwersa makakarawat han ngatanan niya nga sumurunod ngan mabulig ha ira nga makapamunga, ‘nga makagpamatuod.’—Juan 15:27.