Waray pag-iha katapos bawtismohan hi Jesus, inatubang hiya hin kaaway nga karuyag gud nga mapakyas hiya antes pa man niya tikangan an iya ministeryo. Oo, an Yawa pauroutro nga nangalimbasog pagsulay ha iya. Ha urhi, hi Jesus nagsiring mahitungod hito nga usa nga maraot: “Tiabot an magmarando han kalibotan. Diri niya ako madadaog.”—Juan 14:30.

Nakita ni apostol Juan ha usa nga bisyon an mahitatabo ha “daku nga dragon, an orihinal nga halas, an gintatawag nga Yawa ngan Satanas.” Iton maraot hinduro nga kaaway han katawohan ilalabog tikang ha langit, “nga may daku nga kasina, kay maaram hiya nga halipot na la an iya panahon.” (Pahayag 12:9, 12) May maopay nga hinungdan an mga Kristiano nga tumoo nga nagkikinabuhi na hira durante hiton ‘halipot na la nga panahon’ ngan diri na mag-iiha an “dragon, an orihinal nga halas,” ilalabog ha kahiladman ngan waray na mahihimo ha sulod hin 1,000 ka tuig samtang nagmamando hi Jesus ha Ginhadian han Dios.—Pahayag 20:1, 2.

Durante hito nga peryodo, ano an mahitatabo ha tuna, an aton urukyan? Hin-o an maukoy dinhi, ngan ha ano nga kahimtang? Ginbaton ito mismo ni Jesus. Ha iya ilustrasyon mahitungod han mga karnero ngan mga kanding, iginpakita niya an mahitatabo ha matadong nga mga tawo nga sugad hin mga karnero, nga nakikigkooperar ngan nagbubuhat hin maopay ha iya kabugtoan. Iya liwat iginpatin-aw kon ano an mahitatabo ha mga diri nagbubuhat hito, adton sugad hin mga kanding. Hi Jesus nagsiring: “Huhukman [an mga kanding] hin permanente nga kamatayon, pero an magtadong [an mga karnero] makarawat hin kinabuhi nga waray kataposan.”—Mateo 25:46.

Nabulig ini ha aton nga masabtan an ginsiring ni Jesus ha kriminal nga iginraysang ha kahoy ha iya sapit. Waray niya igsaad hito nga tawo an balos nga iya iginsaad ha iya matinumanon nga mga apostol, an pagin bahin han Ginhadian ha langit. Lugod, hi Jesus nagsaad ha mabinasulon nga kriminal: “Ha  pagkamatuod susumatan ko ikaw yana, Makakaupod ko ikaw ha Paraiso.” (Lucas 23:43) Salit ito nga tawo may paglaom nga mabuhi ha Paraiso—ha makaruruyag nga parke, o hardin. Kon sugad, adton nagpapamatuod yana nga pariho hira hin karnero ngan magkakaada “kinabuhi nga waray kataposan” makakaukoy hito nga Paraiso.

Uyon ini ha iginhulagway ni apostol Juan nga magigin kahimtang han tuna. Hiya nagsiring: “An tolda han Dios aada ha katawohan, ngan maukoy hiya kaupod nira, ngan hira magigin iya katawohan. Ngan an Dios mismo makakaupod nira. Papahiron niya an mga luha ha ira mga mata, ngan mawawara na an kamatayon, pati an kabido, pagtangis, ngan kasakit. An daan nga mga butang naglabay na.”—Pahayag 21:3, 4.

Basi magpahimulos hin kinabuhi ha Paraiso ito nga kriminal, kinahanglan hiya banhawon. Ngan diri la hiya an babanhawon. Iginpatin-aw ito ni Jesus han hiya nagsiring: “Maabot an oras nga an ngatanan nga aadto ha handumanan nga mga lubnganan makakabati han iya tingog ngan mababanhaw. An mga nagbubuhat hin maopay magkakaada kinabuhi nga waray kataposan, pero an mga nagbubuhat hin maraot huhukman.”—Juan 5:28, 29.

Pero kumusta man an matinumanon nga mga apostol ngan an limitado nga kadamu han iba pa nga makakaupod ni Jesus ha langit? An Biblia nasiring: “Magigin mga saserdote hira han Dios ngan han Kristo, ngan magmamando hira sugad nga mga hadi kaupod niya ha sulod hin 1,000 ka tuig.” (Pahayag 20:6) Ini nga mga magigin magmarando kaupod han Kristo mga kalalakin-an ngan kababayin-an nga nagkinabuhi dinhi ha tuna. Salit sigurado nga magigin maloloy-on ngan mapinairon hira nga mga magmarando ha mga aanhi ha tuna.—Pahayag 5:10.

Gagamiton ni Jesus an iya halad-lukat para ha mga tawo ha tuna ngan wawad-on an ira napanunod nga sala. Papahinaboon niya ngan han iya mga igkasi-magmarando nga magin hingpit an katawohan. Oo, ha urhi mapapahimulosan na han mga tawo an kinabuhi nga uyon ha orihinal nga katuyoan han Dios para ha ira han ginsidngan niya hira Adan ngan Eva nga magdamu ngan pun-on an tuna. Bisan an kamatayon nga resulta han sala ni Adan mawawara na!

Salit, matutuman na ni Jesus an ngatanan nga iginsugo ha iya ni Jehova. Ha kataposan han iya Usa ka Yukot ka Tuig nga Pagmando, ihahatag ni Jesus ha iya Amay an Ginhadian ngan an hingpit na nga tawhanon nga pamilya. May kalabotan hinin makatirigamnan gud nga pagkamapainubsanon ni Jesus, hi apostol Pablo nagsurat: “Kon igpasakop na ha iya an ngatanan nga butang, an Anak mismo magpapasakop liwat ha Dios nga amo an nagpasakop han ngatanan nga butang ha iya, basi an Dios gud la an magmando han ngatanan.”—1 Corinto 15:28.

Matin-aw nga importante hinduro an papel ni Jesus ha pagtuman han makaruruyag gud nga mga katuyoan han Dios. Ngan samtang ito nga mga katuyoan padayon nga ipapahayag ha kadayonan, magkikinabuhi hiya uyon han iya paghulagway ha iya kalugaringon: “Ako an dalan ngan an kamatuoran ngan an kinabuhi.”—Juan 14:6.