Nahuman na hi Jesus pag-ampo upod han iya magtinumanon nga apostol. “Katapos nira magkanta hin mga pagdayaw, kinadto hira ha Bukid han mga Olibo.” (Marcos 14:26) Nagtipa-este hira ngadto ha hardin nga gintatawag nga Getsemani, nga pirme ginkakadtoan ni Jesus.

Pag-abot nira didto hinin makaruruyag nga dapit nga may mga kahoy han olibo, iginbilin ni Jesus an walo nga apostol. Posible nga nagpabilin hira hirani ha entrada han hardin kay ginsidngan niya hira: “Lingkod kamo dinhi mentras nag-aampo ako didto ha unhan.” Upod hira Pedro, Santiago, ngan Juan, hi Jesus kinadto ha unhan han hardin. Inabat hiya hin duro nga kasakit ngan ginsidngan an tulo: “Nasusubo gud an akon kalag nga haros ikamatay ko. Dinhi la kamo ngan magpadayon kamo ha pagbantay kaupod ko.”—Mateo 26:36-38.

Dumistansya hi Jesus ha ira, “yinukbo ha tuna ngan nag-ampo.” Ano an iya igin-ampo ha Dios hito nga panahon nga duro an iya kasakit? Hiya nag-ampo: “Amay, an ngatanan nga butang posible ha imo; alayon kuhaa ha akon ini nga kopa. Pero diri uyon ha akon karuyag, kondi uyon ha imo karuyag.” (Marcos 14:35, 36) Ano an iya iginpapasabot? Naatras na ba hiya ha pagin Manunubos? Diri!

Han nakadto pa hi Jesus ha langit, nakita niya an duro nga pag-antos han iba nga ginpatay han mga Romano. Yana sugad nga tawo nga may malumo nga pagbati ngan naabat hin kasakit, diri ginpapamulat ni Jesus an mahitatabo ha iya. Pero labaw han ngatanan, nasasakit hiya tungod kay maaram hiya nga an iya kamatayon nga sugad hin ginkakangalasan nga kriminal posible makapasipara ha ngaran han iya Amay. Pipira na la ka oras, iraraysang na hiya ha kahoy nga sugad hin usa nga parapasipara ha Dios.

Katapos han maiha nga pag-inampo, binalik hi Jesus ngan naabtan nga nangangaturog an mga apostol. Ginsidngan niya hi Pedro: “Diri ba kamo makakagbantay upod ko hin bisan usa la ka oras? Padayon kamo nga magbantay ngan mag-ampo basi diri kamo madara han pagsulay.” Nasantop ni Jesus nga kapoy gud liwat an mga apostol, ngan hilarom na an gab-i. Hiya nagdugang: “An espiritu disidido pero an lawas maluya.”—Mateo 26:40, 41.

Katapos, ha ikaduha nga higayon kinadto hi Jesus ha unhan ngan naghangyo ha Dios nga kuhaon tikang ha iya “ini nga kopa.” Pagbalik niya, naabtan na liwat niya nga nangangaturog an tulo nga apostol imbes nga nag-aampo basi diri hira madara han pagsulay. Han nagyakan hi Jesus ha ira, “diri hira maaram kon ano an ibabaton ha iya.” (Marcos 14:40) Ha ikatulo nga higayon kinadto na liwat hi Jesus ha unhan, ngan linuhod para mag-ampo.

Nasasakit gud hi Jesus ha magigin pasipara ha ngaran han iya Amay kay papatayon hiya sugad hin kriminal. Pero namamati hi Jehova ha pag-ampo han iya Anak, ngan hito nga takna nagsugo an Dios hin anghel basi parig-unon hiya. Bisan pa hito, waray umundang hi Jesus ha pangamuyo ha iya Amay, lugod “mas naniguro gud hiya pag-inampo.” Nasasakit hiya hinduro. Mabug-at gud an responsabilidad ni Jesus! Nahidadabi hito an iya kinabuhi nga dayon ngan han ngatanan nga tawo nga may pagtoo. Ngani, “an iya balhas nagin sugad hin dugo nga nanunuro ha tuna.”—Lucas 22:44.

Ha ikatulo nga pagbalik ni Jesus, naabtan na liwat niya nga nangangaturog hira. Hiya nagsiring: “Diri yana panahon nga mangaturog ngan mamahuway kamo! Kitaa! Hirani na an oras nga an Anak han tawo igtutubyan ha mga kamot han magpakasasala. Buhát kamo, pagkalakat kita. Kitaa! Tikanhi na an magtatraydor ha akon.”—Mateo 26:45, 46.