Temprano hini nga gab-i, gintutdoan ni Jesus an iya mga apostol hin leksyon mahitungod han pagpaubos pinaagi ha paghimsaw ha ira. Yana, posible nga katapos han panihapon ha Paskua, ginkotar niya an matagnaon nga mga pulong ni David: “An akon nahiaaraan nga sangkay, nga sinarigan nakon, nga kinaon han akon tinapay, nag-alsa han iya tikod kontra ha akon.” Katapos hiya nagsaysay: “Usa ha iyo an magtatraydor ha akon.”—Salmo 41:9; Juan 13:18, 21.

Nagsiplatay an mga apostol, ngan nagpakiana an tagsa ha ira: “Ginoo, ako ba?” Bisan hi Judas Iscariote nagpakiana liwat. Ginsagda ni Pedro hi Juan, nga nalingkod sapit kan Jesus ha lamesa, nga usisahon kon hin-o ito. Salit sinandig hi Juan kan Jesus ngan nagpakiana: “Ginoo, hin-o hiya?”—Mateo 26:22; Juan 13:25.

Hi Jesus binaton: “Hiya an tatagan ko han tinapay nga akon igtutunlob.” Katapos itunlob an tinapay ha yahong, iya ito iginhatag kan Judas, ngan nagsiring: “An Anak han tawo mabaya sugad la han nahisurat na mahitungod ha iya. Pero kairo hito nga tawo nga magtatraydor ha Anak han tawo! Mas maopay pa kon waray na la hiya matawo.” (Juan 13:26; Mateo 26:24) Katapos gin-impluwensyahan ni Satanas hi Judas. Ini nga tawo, nga maraot na, nagbuhat han kaburut-on han Yawa ngan nagin “anak han kabungkagan.”—Juan 6:64, 70; 12:4; 17:12.

Hi Jesus nagsiring kan Judas: “Kon ano an imo ginbubuhat, durodagmita ito.” Kahuna han iba nga apostol nga hi Judas nga amo an nagkakapot han kahon han kwarta, ginsusugo: ‘Palit han aton mga kinahanglanon ha piyesta, o paghatag ha mga pobre.’ (Juan 13:27-30) Pero hi Judas lumakat basi trayduron hi Jesus.

Hito mismo nga gab-i han panihapon han Paskua, gintikangan ni Jesus an bag-o gud nga panihapon. Kinuha hiya hin tinapay, nag-ampo, gintipik-tipik ito, ngan iginhatag ha iya mga apostol basi kaunon. Hiya nagsiring: “Nagsisimbolo ini han akon lawas nga ihahatag para ha iyo. Padayon nga buhata niyo ini sugad nga hinumdoman ha akon.” (Lucas 22:19) Iginpasa an tinapay, ngan kinaon hito an mga apostol.

Yana kinuha hi Jesus hin kopa nga may bino, gin-ampoan ito, ngan iginpasa ha ira. An tagsa ha ira uminom hito, ngan hi Jesus nagsiring: “Ini nga kopa nagsisimbolo han bag-o nga kasabotan nga ginhimo pinaagi han akon dugo nga igpapaagay para ha iyo.”—Lucas 22:20.

Pinaagi hini, ginhikay ni Jesus an memoryal han iya kamatayon nga isasaurog han iya mga sumurunod kada tuig ha Nisan 14. Magpapahinumdom ini han ginhimo ni Jesus ngan han iya Amay basi adton may pagtoo matalwas ha sirot nga sala ngan kamatayon. Labaw pa ini kay ha nahihimo han Paskua para ha mga Judio, kay ginpapabug-atan hini an tinuod nga kagawasan para ha katawohan nga may pagtoo.

Nagsiring hi Jesus nga an iya dugo “igpapaagay basi mapasaylo an mga sala han damu nga tawo.” Kaupod han damu nga makarawat han sugad nga kapasayloan amo an iya magtinumanon nga apostol ngan an iba pa nga pariho ha ira. Hira an iya makakaupod ha Ginhadian han iya Amay.—Mateo 26:28, 29.