Ha templo, ginbaton pa la ni Jesus an punoan nga mga saserdote ngan katigurangan han katawohan nga nagkwestyon kon diin tikang an iya awtoridad ha pagbuhat han mga butang. Waray hira pakayakan ha iya iginbaton. Katapos naghatag hiya hin ilustrasyon nga nagbuhayhag kon ano gud hira nga klase hin mga tawo.

Hi Jesus nagsiring: “May usa ka tawo nga duha an anak. Ginsidngan niya an magurang, ‘Anak, pagtrabaho ha urubasan yana nga adlaw.’ Binaton hiya, ‘Oo, Tatay.’ Pero waray hiya kumadto. Sugad liwat hito an ginsiring han tatay ha manghod. Pero binaton hiya, ‘Diri ako makadto.’ Katapos nagbasol hiya ngan kinadto ha urubasan. Hin-o ha ira an nagtuman han kaburut-on han ira amay?” (Mateo 21:28-31) Matin-aw an baton—an manghod, nga ha urhi amo an nagbuhat han kaburut-on han iya tatay.

Salit, ginsidngan ni Jesus an mga nakontra ha iya: “Ha pagkamatuod, susumatan ko kamo nga an mga parasukot hin buhis ngan an mga puta mahiuuna ha iyo pagsulod ha Ginhadian han Dios.” Ha tinikangan, an mga parasukot hin buhis ngan an mga puta diri nag-aalagad ha Dios. Pero ha urhi, pariho han manghod, nagbasol hira ngan nag-alagad ha Dios. Ha kabaliktaran, an mga lider han relihiyon pariho han magurang, nag-aangkon hira nga nag-aalagad ha Dios, pero an tinuod diri nira ito ginbubuhat. Hi Jesus nagsiring: “Hi Juan [nga Parabaptis] kinanhi ha iyo ha pagtutdo han dalan han katadongan, kondi waray kamo tumoo ha iya. Pero an mga parasukot hin buhis ngan an mga puta tinoo ha iya. Kondi kamo, bisan kon nakita niyo ini, waray kamo magbasol ngan waray tumoo ha iya.”—Mateo 21:31, 32.

Katapos hito, naghatag hi Jesus hin usa pa nga ilustrasyon. Hini nga higayon, iginpakita niya nga an kapakyas han mga lider han relihiyon labaw pa kay ha diri pag-alagad ha Dios. An tinuod, magraot hira. Hi Jesus nagsiring: “May usa nga tawo nga nagtanom hin urubasan, ngan iya ito gin-alad. Nag-ukad hiya hin purog-an han ubas ngan nagtindog hin torre. Katapos iya ito ginpaataman ha mga parauma ngan nagbiyahe ha iba nga nasud. Han panahon na ha pag-ani han mga ubas, nagsugo hiya hin uripon ngadto ha mga parauma basi kuhaon an iya bahín ha urubasan. Pero ira gindakop an uripon, ginkastigo, ngan ginpabaya hiya nga waray dara. Ngan nagsugo hiya hin usa pa nga uripon ngadto ha ira, ngan ira ito ginbalbag ha ulo ngan gin-insulto. Katapos ginpakadto niya an usa pa, pero ira ito ginpatay. Damu pa an iya ginpakadto, pero an iba ira ginkastigo ngan an iba ira ginpatay.”—Marcos 12:1-5.

Masasabtan ba han mga namamati kan Jesus ito nga ilustrasyon? Aw, bangin nahinumdoman nira an ginsiring ni Isaias: “An urubasan ni Jehova han mga kasundalohan amo an balay ni Israel, ngan an mga tawo ha Juda amo an iya makalilipay nga tanom: ngan hiya nangita han kasubayan, kondi, kitaa, pagtalumpigos.” (Isaias 5:7) Pariho hito an ilustrasyon ni Jesus. An agaron han panimalay amo hi Jehova, ngan an urubasan amo an nasud han Israel nga gin-alaran ngan ginpanalipdan han Balaud han Dios. Nagsugo hi Jehova hin mga propeta basi tutdoan ngan buligan an iya katawohan nga magkaada hin mag-opay nga bunga.

Pero, ginmaltrato ngan ginpatay han “mga parauma” an mga “uripon” nga ginpakadto ha ira. Hi Jesus nagsaysay: “Ginpakadto [han tag-iya han urubasan] an usa pa, an iya hinigugma nga anak. Hiya an ultimo nga iya ginpakadto ha ira kay nasiring hiya, ‘Irirespeto nira an akon anak.’ Pero nagsarabot an mga parauma, ‘Ini an eredero. Tana, patayon naton hiya basi magin aton an panurundon.’ Salit ira gindakop hiya, ngan ginpatay.”—Marcos 12:6-8.

Yana, hi Jesus nagpakiana: “Ano an bubuhaton han tag-iya han urubasan?” (Marcos 12:9) An mga lider han relihiyon binaton: “Tungod kay maraot hira, iya papatayon hira. Ngan an iya urubasan igpapaataman niya ha iba nga parauma nga maghahatag han iya bahín pag-abot han panahon.”—Mateo 21:41.

Hito nga paagi, waray nira masantop nga ginhukman na nira an ira kalugaringon kay kaupod hira ha mga “parauma” han “urubasan” ni Jehova, an nasud han Israel. An bunga nga husto la nga laoman ni Jehova tikang ha sugad nga mga parauma nag-uupod han pagtoo ha iya Anak, an Mesias. Ginkita ni Jesus an mga lider han relihiyon ngan ginsidngan: “Waray gud ba niyo mabasa ini nga kasuratan: ‘An bato nga iginsalikway han mga magtirindog, ini an nagin pinakaimportante nga pandugtong nga bato ha eskina? Tikang ini kan Jehova, ngan maopay gud ini pagkit-on.’” (Marcos 12:10, 11) Katapos iginpatin-aw ni Jesus an iya punto, ha pagsiring: “Tungod hini nasiring ako ha iyo: Kukuhaon han Dios an iya Ginhadian tikang ha iyo ngan ihahatag ha usa nga nasud nga nagbubuhat han iya kaburut-on.”—Mateo 21:43.

Nasantop na han mga eskriba ngan punoan nga mga saserdote nga “hira an gin-uunabi ni Jesus ha iya ilustrasyon.” (Lucas 20:19) Yana, determinado gud hira nga patayon hiya, an may katungod nga “eredero.” Pero nahahadlok hira ha mga tawo nga nagtatagad kan Jesus sugad nga propeta, salit waray hira magsari pagpatay ha iya hito nga takna.