May mga lalaki nga inabot tikang ha Este. Mga astrologo hira—mga kalalakin-an nga nag-aaram han posisyon han mga bitoon, ngan nag-aangkon nga pinaagi hito maisusumat nira an kahulogan han mga panhitabo ha kinabuhi han mga tawo. (Isaias 47:13) Han nakadto pa hira ha Este, may nakita hira nga “bitoon” ngan ginsundan nira ito hin ginatos ka kilometro, diri ngadto ha Betlehem kondi ha Jerusalem.

Pag-abot didto han mga astrologo, nagpakiana hira: “Hain an natawo nga hadi han mga Judio? Nakita namon an iya bitoon han nakadto kami ha Este, salit kinanhi kami basi magyukbo ha iya.”—Mateo 2:1, 2.

Hinbatian ito ni Hadi Herodes han Jerusalem ngan nasina gud hiya. Salit iginpatawag niya an punoan nga mga saserdote pati an iba nga mga lider han relihiyon han mga Judio ngan ginpakianhan hira kon diin matatawo an Kristo. Binaton hira sumala ha Kasuratan: “Ha Betlehem.” (Mateo 2:5; Mika 5:2) Tungod hito, sekreto nga iginpatawag ni Herodes an mga astrologo, ngan ginsidngan hira: “Kadto kamo, pamilnga hin maopay an bata, ngan kon makita niyo hiya, balik kamo ngan sumati ako basi makakadto liwat ako ngan magyukbo ha iya.” (Mateo 2:8) Pero an tinuod, karuyag niya mabilngan an bata basi patayon!

Pagbaya han mga astrologo, may urusahon nga nahitabo. An “bitoon” nga ira nakita han nakadto hira ha Este nag-una ha ira. Matin-aw nga diri ito ordinaryo nga bitoon, lugod gin-gamit ito basi giyahan hira. Ginsundan ito han mga astrologo tubtob nga inundang ito ha balay nga gin-uukyan nira Jose ngan Maria pati han ira anak.

Pagsulod han mga astrologo ha balay, nakita nira hi Maria upod an bata nga hi Jesus. Hito nga takna, an mga astrologo yinukbo ha bata. Ngan gintagan nira hiya hin bulawan, busag nga insenso, ngan mira. Katapos, han tibalik na hira ngadto kan Herodes, ginpahamangnoan hira han Dios pinaagi hin inop nga diri ito buhaton. Salit pag-uli nira, iba nga ruta an ira gin-agian.

Ha imo hunahuna, hin-o an naggamit han “bitoon” nga naggiya ha mga astrologo? Hinumdumi nga waray hira direkta nga giyahi hito ngadto kan Jesus ha Betlehem. Lugod, gin-giyahan hira hito ngadto ha Jerusalem, diin nakaistorya nira hi Hadi Herodes nga naruruyag pagpatay kan Jesus. Ngan nabuhat unta niya ito kon waray pahamangnoi han Dios an mga astrologo nga diri hiya sumatan kon hain hi Jesus. Matin-aw, an kaaway han Dios nga hi Satanas an naruruyag nga mamatay hi Jesus, ngan gin-gamit niya ini nga pamaagi basi matuman an iya katuyoan.