Hira Jose ngan Maria nagpabilin ha Betlehem imbes nga umuli ha Nazaret. Han walo ka adlaw na hi Jesus, ginturi hiya, sugad han iginsusugo han Balaud han Dios ha Israel. (Lebitiko 12:2, 3) Kustomre liwat nga ha ikawalo ka adlaw, tatagan hin ngaran an usa nga bata nga lalaki. Ginngaranan nira Jose ngan Maria an ira anak hin Jesus, sugad han instruksyon ni anghel Gabriel.

Paglabay hin sobra usa ka bulan, 40 ka adlaw na hi Jesus. Diin hiya yana dadad-on han iya mga kag-anak? Ha templo han Jerusalem nga pipira la ka kilometro tikang ha ira gin-uukyan. An Balaud nasiring nga 40 ka adlaw katapos manganak hin lalaki an usa nga babaye, kinahanglan hiya magdara hin halad ha pagputli ngadto ha templo.—Lebitiko 12:4-7.

Ito an ginbuhat ni Maria. Nagdara hiya hin duha nga gudtiay nga tamsi sugad nga halad. Iginpapakita hini an kahimtang ha pinansyal nira Jose ngan Maria. Sumala ha Balaud, usa nga nati nga karnero nga lalaki ngan usa nga tamsi an sadang ihalad. Pero kon diri ini maaakos han nanay, puydi na an duha nga tukmo o duha nga sarapati. Ito la an maaakos ni Maria salit ito an iya iginhalad.

Ha templo, may lagas nga lalaki nga dumaop kanda Jose ngan Maria. Simeon an iya ngaran. Iginpahayag ha iya han Dios nga antes hiya mamatay makikita niya an iginsaad ni Jehova nga Kristo, o Mesias. Hito nga adlaw, gin-giyahan hi Simeon han baraan nga espiritu ngadto ha templo, diin nakita niya hira Jose ngan Maria upod an ira minasus-an nga anak. Ginkugos ni Simeon an bata.

Samtang kugos ni Simeon hi Jesus, nagpasalamat hiya ha Dios: “Soberano nga Ginoo, an imo uripon puydi na yana mamatay nga mamurayawon sumala ha imo ginsiring, kay nakita ko na an imo gagamiton ha pagtalwas nga imo igintagana basi makita han ngatanan nga katawohan. Hiya an kalamrag nga magkukuha han kasisidman nga nalambong ha mga nasud ngan hiya an himaya han Israel nga imo katawohan.”—Lucas 2:29-32.

Nahipausa hira Jose ngan Maria han ira hinbatian. Ginbendisyonan hira ni Simeon ngan ginsidngan hi Maria nga an iya anak “an magigin hinungdan han kapukan ngan pagbangon utro han damu ha Israel” ngan makakaeksperyensya hiya hin kabido nga sugad hin matarom nga kampilan.—Lucas 2:34.

Hito nga adlaw, nakadto liwat an 84 anyos nga propetisa nga hi Ana. Diri gud hiya napalya pagkadto ha templo. Hito mismo nga takna, dinaop hiya kanda Jose, Maria, ngan ha minasus-an nga hi Jesus. Nagpasalamat hiya ha Dios ngan nag-inistorya mahitungod kan Jesus ha ngatanan nga namamati.

Hunahunaa la an kalipay nga inabat nira Jose ngan Maria hini nga mga panhitabo ha templo! Tungod hini ngatanan, nakombinse pa gud hira nga an ira anak amo an Usa nga Iginsaad han Dios.