Ginpukaw ni Jose hi Maria kay may importante hiya nga sumat. Usa nga anghel ni Jehova an nagpakita pa la ha iya ha inop, ngan nagsiring: “Buhát, dad-a an bata ngan an imo asawa ngadto ha Ehipto. Ngan didto la anay kamo tubtob nga sidngan ko kamo nga bumalik, kay ginbibiling ni Herodes an bata basi patayon.”—Mateo 2:13.

Hito nga gab-i, pumalagiw dayon hira Jose ngan Maria, upod an ira anak. Tayming gud la ito kay hinbaroan na ni Herodes nga ginlimbongan hiya han mga astrologo. Ginsidngan niya hira nga bumalik basi magsumat hin impormasyon. Pero bumaya hira ngan waray ito buhata. Nasina gud hi Herodes. Tungod kay karuyag niya patayon hi Jesus, nagsugo hiya nga patayon an ngatanan nga bata nga lalaki ha Betlehem ngan ha kahirani hito nga bungto nga dos anyos an edad tipaubos. Iginbasar niya ini nga pagkarkulo han edad ha iya hinbaroan han naglabay ha mga astrologo ha Este.

Makangingirhat gud an pamatay ha ngatanan nga bata nga lalaki! Diri kita maaram kon pira an ginpatay, pero nagkaada duro nga panangis ngan pannguyngoy han mga nanay. Katumanan ini han usa nga tagna ha Biblia pinaagi kan Jeremias nga propeta han Dios.—Jeremias 31:15.

Hito nga panahon, hi Jose ngan an iya pamilya nakadto na ha Ehipto, ngan nag-ukoy hira didto. Usa ka gab-i, an anghel ni Jehova nagpakita utro kan Jose ha inop ngan nagsiring: “Buhát, dad-a an bata ngan an imo asawa ngadto ha Israel, kay patay na an mga nangangalimbasog pagpatay han bata.” (Mateo 2:20) Salit nahunahuna ni Jose nga puydi na hira bumalik ha ira tuna nga natawohan. Tungod hini natuman an usa pa nga tagna ha Biblia—an Anak han Dios gintawag tikang ha Ehipto.—Hosea 11:1.

Posible nga plano ni Jose nga mag-ukoy hira ha Judea, hirani ha bungto han Betlehem, nga ira gin-ukyan antes hira pumalagiw ngadto ha Ehipto. Pero nahibaro hiya nga an maraot nga anak ni Herodes nga hi Arquelao amo na an hadi ha Judea. Ha usa pa nga inop, ginpahamangnoan hiya han Dios mahitungod han peligro. Salit hi Jose ngan an iya pamilya nagbiyahe tipanorte ngan nag-ukoy ha syudad han Nazaret ha Galilea, hirayo ha sentro han buruhaton ha relihiyon han mga Judio. Nagtubo hi Jesus didto, salit natuman an usa pa nga tagna: “Tatawagon hiya nga Nazareno.”—Mateo 2:23.