Posible nga nakadto pa hi Jesus ha Perea ha este han Salog Jordan han iginsumat niya an mga ilustrasyon mahitungod han nawara nga karnero ngan han drakma nga sinselyo. Ito nga duha pariho nagtututdo nga sadang kita malipay kon an usa nga makasasala nagbasol ngan binalik ha Dios. Ginpapakaraot hi Jesus han mga Pariseo ngan eskriba kay ginkakarawat niya an sugad nga mga tawo. Pero may hinbaroan ba nga leksyon ito nga mga kritiko tikang ha duha nga ilustrasyon ni Jesus? Nasantop ba nira kon ano an pagtagad han aton Amay ha magpakasasala nga nagbasol? Yana, naghatag hi Jesus hin makapabantad nga ilustrasyon nga nagpapabug-at hin pariho nga importante nga leksyon.

An ilustrasyon mahitungod hin tatay nga may duha nga anak, diin an manghod an nangunguna nga tawohan. An mga Pariseo ngan eskriba, pati an iba nga nakabati hini may mahibabaroan mahitungod ha manghod nga anak. Pero diri sadang ibalewaray an mahitungod ha tatay ngan magurang nga anak tungod kay may igintututdo liwat nga leksyon an disposisyon nga ira iginpakita. Salit hunahunaa inin tulo nga kalalakin-an samtang iginsusumat ni Jesus an ilustrasyon.

Hi Jesus nagsiring: “May usa ka tawo nga may duha nga anak nga lalaki. . . . An manghod nagsiring ha iya amay, ‘Tatay, ihatag ha akon an akon bahín ha imo mga propyedad.’ Salit iya ginbahin ha ira an iya mga propyedad.” (Lucas 15:11, 12) Tigamni nga gin-aaro hini nga manghod an iya panurundon diri tungod kay patay na an iya tatay. Buhi pa an tatay. Pero karuyag han anak nga kuhaon na an iya bahin basi makaglugaring hiya ngan magamit ito uyon ha iya karuyag. Ngan ano an iya karuyag?

Hi Jesus nagsaysay: “Waray pag-iha, gintirok han manghod an ngatanan nga iya gamit ngan kinadto ha hirayo nga nasud. Didto ginwaldas niya ha maraot nga pagkinabuhi an iya propyedad.” (Lucas 15:13) Imbes nga magpabilin ha ira balay, kaupod an iya tatay nga nag-aataman ha ira ngan nagtatagana han ira panginahanglan, ini nga anak binalhin ha iba nga nasud. Didto, ginwaldas niya an ngatanan niya nga napanunod basi matagbaw an iya hingyap ha sekso. Ha kamaihaan, nagkuri hiya sugad han dugang nga ginsiring ni Jesus:

“Han nagasto na niya an ngatanan, nagkaada duro nga gutom ha bug-os nga nasud, ngan nagkuri hiya. Dinaop pa ngani hiya ha usa nga tuminungnong hito nga nasud ngan nagpirit nga tagan hiya hin trabaho. Salit iginpaataman ha iya an mga baboy ha uma. Karuyag niya nga kaunon na la an ginkakaon han mga baboy, pero waray nahatag ha iya hin bisan ano.”—Lucas 15:14-16.

Ha Balaud han Dios, an baboy gintatagad nga mahugaw, pero ini nga anak kinahanglan magtrabaho sugad nga paraataman hin baboy. Gutom gud hiya salit karuyag niya nga kaunon na la an pagkaon nga para la ha mga hayop, an mga baboy nga iya gin-aataman. Tungod han iya miserable ngan makasurubo nga kahimtang, “nakapamurubuot hiya.” Ano an iya ginbuhat? Hiya naghunahuna: “Abunda hin tinapay an damu nga trabahador ni Tatay, pero ako haros mamatay na dinhi han gutom! Malakat ako ngan makadto kan Tatay. Masiring ako ha iya: ‘Tatay, nakasala ako ha Dios ha langit ngan ha imo. Diri na ako angay tawagon nga imo anak. Himoa ako nga usa han imo mga trabahador.’” Katapos linakat hiya ngan kinadto ha iya tatay.—Lucas 15:17-20.

Ano an magigin reaksyon han tatay? Masisina ba hiya ngan iisgan an iya anak tungod han kalurongan nga binaya an iya anak ha ira balay? Kakarawaton ba niya an iya anak? Kon ikaw an tatay, ano an imo magigin reaksyon? Kumusta man kon imo ito anak?

Iginhulagway ni Jesus an inabat ngan ginbuhat han tatay: “Han hirayo pa [an anak], nakit-an hiya han iya tatay ngan nalooy ha iya. Dinalagan an iya tatay ngan mahigugmaon nga ginhangkopan ngan ginharokan hiya.” (Lucas 15:20) Bisan kon hinbatian han tatay an maraot nga pagkinabuhi han anak, iya ginkarawat an iya anak. Masasantop ba han Judio nga mga lider, nga nag-aangkon nga nakilala ngan nagsisingba kan Jehova, kon ano an pagtagad han aton Amay ha langit ha magpakasasala nga nagbabasol? Mahibabaroan ba liwat nira nga nagpapakita hi Jesus hin pariho nga disposisyon?

Posible nga nakita han maaramon nga tatay tikang ha masurub-on nga nawong han anak nga nagbabasol hiya. Bisan pa hito, mahigugmaon nga nag-una an tatay ha pagkarawat ha iya anak. Ini nga ginbuhat han tatay nakabulig basi maisumat han anak an iya mga sala. Hi Jesus nagsiring: “Katapos, nagsiring an anak, ‘Tatay, nakasala ako ha Dios ha langit ngan ha imo. Diri na ako angay tawagon nga imo anak.’”—Lucas 15:21.

An tatay nagsugo ha iya mga uripon: “Dagmita niyo! Kuha kamo han pinakamaopay nga bado ngan isul-ot ha iya. Sul-uti hin singsing an iya tudlo ngan hin sandalyas an iya mga tiil. Dad-a nganhi an pinatambok nga nati nga baka, ihawa niyo ito basi mangaon ngan magkalipay kita, kay ini nga akon anak namatay ngan nabuhi; nawara hiya ngan naagian.” Katapos ‘nagkalipay hira.’—Lucas 15:22-24.

Ha luyo nga bahin, an magurang nga anak nakadto ha uma. Mahitungod ha iya, hi Jesus nagsiring: “Pag-uli niya, han hirani na hiya ha balay, nabatian niya an musika ngan an sarayaw. Salit gintawag niya an usa nga surugoon ngan ginpakianhan kon ano an nahitatabo. Nagsiring an surugoon, ‘Inabot na an imo bugto, ngan an pinatambok nga nati nga baka iginpaihaw han imo tatay kay an imo bugto nakauli nga maopay an panlawas.’ Pero nangalas an magurang ngan diniri pagsulod. Salit ginawas an iya tatay ngan ginhangyo hiya nga sumulod. Nagsiring hiya ha iya tatay, ‘Damu ka tuig na nga nagsiserbi ako ha imo sugad hin uripon, ngan bisan makausa waray ko talapasa an imo sugo, pero waray mo pa gud ako hatagi hin nati nga kanding  basi magkalipay kami han akon kasangkayan. Kondi pagbalik hini nga imo anak nga nagwaldas han imo mga propyedad ha pakig-upod ha mga puta, gin-ihaw mo dayon para ha iya an pinatambok nga nati nga baka.’”—Lucas 15:25-30.

Hin-o an pariho ha magurang nga anak nga nakontra ha kalooy ngan atensyon nga iginpakita ni Jesus ha ordinaryo ngan magpakasasala nga mga tawo? An mga eskriba ngan Pariseo. An ira pagkontra ha pagkarawat ni Jesus ha magpakasasala an hinungdan nga iginsumat ini nga ilustrasyon. Syempre, kinahanglan iaplikar ini nga leksyon han bisan hin-o nga nakontra ha pagpakita han Dios hin kalooy.

Gintapos ni Jesus an iya ilustrasyon pinaagi ha pagsumat han hangyo han tatay ha iya magurang nga anak: “Anak, pirme mo ako kaupod, ngan an ngatanan nga akon, imo liwat. Pero kinahanglan magkalipay kita, kay an imo bugto namatay ngan nabuhi; nawara hiya ngan naagian.”—Lucas 15:31, 32.

Waray isumat ni Jesus kon ano an ginbuhat han magurang ha urhi. Pero, katapos mamatay ngan mabanhaw hi Jesus, “damu nga saserdote an nagin tumuroo.” (Buhat 6:7) Posible nga upod hito an iba nga nakabati hinin mapwersa nga ilustrasyon ni Jesus mahitungod ha nawara nga anak. Oo, posible nga nakapamurubuot liwat hira, nagbasol, ngan binalik ha Dios.

Tikang hito nga adlaw, hinbaroan han mga disipulo ni Jesus an importante nga mga leksyon hinin maopay nga ilustrasyon ngan kinahanglan nira ito iaplikar. An siyahan nga leksyon, maaramon gud nga magpabilin ha katawohan han Dios ilarom ha pag-ataman han aton Amay nga nahigugma ngan nagtatagana ha aton, imbes nga bumulag basi mamiling hin nakakasulay nga kaliawan ha “hirayo nga nasud.”

An ikaduha, kon an bisan hin-o ha aton magpahirayo ha Dios, kinahanglan mapainubsanon nga bumalik kita ha aton Amay basi magpahimulos utro han iya pag-uyon.

An ikatulo nga importante nga leksyon makikita ha kaibahan butnga han makinarawaton ngan mapinasayloon nga tatay ngan han nasisina ngan diri makinarawaton nga magurang. Matin-aw nga karuyag han mga surugoon han Dios nga magin mapinasayloon ngan makinarawaton kon an usa nga iniwas tinuod nga nagbasol ngan binalik ha ‘balay han Amay.’ Malipay kita nga an aton bugto nga ‘namatay, nabuhi’ ngan an ‘nawara, naagian.’