Katapos tambalon an lalaki nga nanhuhupong, nakadto pa gihapon hi Jesus ha balay han Pariseo. Naobserbaran niya nga an iba nga bisita nagpipili hin pinakamaopay nga pwesto durante han pangaon, salit gin-gamit niya ito nga higayon basi magtutdo hin leksyon mahitungod ha pagpaubos.

Hiya nagsiring: “Kon may mag-imbitar ha imo ha panagtawo ha kasal, ayaw lingkod ha pinakamaopay nga pwesto. Bangin may gin-imbitar liwat hiya nga mas kilala kay ha imo, ngan dumaop hiya ha imo ngan magsiring, ‘Ihatag hini nga tawo ini nga pwesto.’ Salit naaawod nga mabalhin ka ha pinakaubos nga pwesto.”—Lucas 14:8, 9.

Katapos hi Jesus nagdugang: “Kon imbitaron ka, pakadto ngan lingkod ha pinakaubos nga pwesto, basi pagdaop han nag-imbitar ha imo, masiring hiya, ‘Sangkay, balhin ha maopay nga pwesto.’ Ngan mapapasidunggan ka ha atubangan han ngatanan nga imo igkasi-bisita.” Labaw pa ini ha pagpakita la hin maopay nga pamatasan. Hi Jesus nagsaysay: “Kay an bisan hin-o nga nagpapahitaas pauubson, ngan an bisan hin-o nga nagpapaubos pahihitas-on.” (Lucas 14:10, 11) Oo, gin-aaghat niya an mga mamarati nga magin mapainubsanon.

Katapos nag-istorya hiya hin usa pa nga leksyon para ha Pariseo nga nag-imbitar ha iya kon paonan-o makakaghikay hin pangaon nga ginpapabilhan gud han Dios. “Kon mag-andam ka hin paniudto o panihapon, ayaw imbitara an imo kasangkayan, kabugtoan, mga paryente, o riko nga mga amyaw. Bangin imbitaron ka liwat nira ngan magin bayad ito ha imo. Lugod, kon mag-andam ka hin panagtawo, imbitara an mga pobre, baldado, piay, ngan buta, ngan malilipay ka, kay waray hira maibabalos ha imo.”—Lucas 14:12-14.

Natural la nga mag-imbitar hin kasangkayan, paryente, o kakilala ha pangaon, ngan hi Jesus waray magsiring nga sayop ito. Pero, ginpabug-atan niya nga an pagpakaon ha mga nanginginahanglan, sugad han pobre, baldado, piay, ngan buta, magriresulta hin hura nga bendisyon. Hi Jesus nagsaysay ha nag-imbitar ha iya: “Babalosan ka ha pagkabanhaw han mga matadong.” Inuyon hito an usa nga bisita, ha pagsiring: “Malipayon an nakaon hin tinapay ha Ginhadian han Dios.” (Lucas 14:15) Nasabtan han bisita nga daku ito nga pribilehiyo. Pero, diri ngatanan nagpakita hin apresasyon, sugad han igin-ilustrar ni Jesus:

“Usa nga tawo an nag-andam hin daku nga panihapon, ngan damu an iya gin-imbitar. . . . Ginsugo niya an iya uripon nga sidngan an mga gin-imbitar, ‘Kadi na kamo, kay andam na an panihapon.’ Pero namaribad hira ngatanan. An siyahan nagsiring, ‘Nakapalit ako hin uma ngan kinahanglan kadtoon ko ito basi kitaon. Pasensya na, diri ako puydi.’ Ngan an usa nagsiring, ‘Nakapalit ako hin lima ka padis nga baka ngan kakadtoon ko ito basi usisahon. Pasensya na, diri ako puydi.’ An usa pa nagsiring, ‘Bag-o la ako nga kasal, salit diri ako puydi kumadto.’”—Lucas 14:16-20.

Hamabaw gud ito nga mga rason! Antes an usa pumalit hin uma o hayop, gin-uusisa anay niya ito, salit diri na ito kinahanglan kitaon dayon katapos paliton. An ikatulo nga tawo diri nangangandam ha pagpakasal. May asawa na hiya, salit waray unta makakaulang ha iya ha pagkarawat hin importante nga imbitasyon. Katapos mabatian ini nga mga pasangil, an agaron nasisina nga nagsiring ha iya uripon:

“Kadto dayon ha haluag nga mga dalan ngan ha kakalsadahan han syudad, ngan dad-a nganhi an mga pobre, baldado, buta, ngan piay.” Gintuman ito han uripon, pero may bakante pa gihapon. Salit ginsidngan han agaron an uripon. “Kadto ha mga dalan ngan ha inalad nga mga lugar, ngan pirita hira pagkanhi, basi mapuno an akon balay. Susumatan ko kamo: Bisan usa hito nga mga gin-imbitar diri makakatilaw han akon gin-andam nga panihapon.”—Lucas 14:21-24.

An igin-istorya ni Jesus nagpapakita gud kon paonan-o hiya ginsugo ni Jehova nga Dios nga mangimbitar hin mga tawo basi makapanunod han Ginhadian han langit. An mga Judio, labi na an mga lider han relihiyon, an siyahan nga gin-imbitar. Pero an kadam-an ha ira waray kumarawat hito durante han bug-os nga pagministeryo ni Jesus. Kondi diri la hira an iimbitaron. Matin-aw nga nagsiring hi Jesus nga ha tidaraon an ikaduha nga imbitasyon ihahatag ha mga ubos nga tawo ha Judio nga nasud ngan ha mga proselita. Katapos, magkakaada ikatulo ngan ultimo nga imbitasyon para ha mga tawo nga gintatagad han mga Judio nga diri ginkakarawat han Dios.—Buhat 10:28-48.

Oo, an ginsiring ni Jesus nagpapamatuod gud ha ginyakan han usa nga bisita: “Malipayon an nakaon hin tinapay ha Ginhadian han Dios.”