Ha usa pa nga Sabbath, binisita hi Jesus ha sinagoga, posible ha Galilea. May nakita hiya didto nga lalaki nga uga an too nga kamot. (Lucas 6:6) Ginbinantayan gud hi Jesus han mga eskriba ngan Pariseo. Kay ano? Hinbaroan an ira tinuod nga intensyon han hira nagpakiana: “Uyon ba ha Balaud an pagtambal ha adlaw han Sabbath?”—Mateo 12:10.

Natoo an Judio nga mga lider han relihiyon nga uyon ha balaud an pagtambal ha adlaw han Sabbath kon namimeligro la an kinabuhi. Pananglitan, durante han Sabbath diri uyon ha balaud an paghilot hin piang o pagbutang hin bendahe ha nalisa, mga kahimtang nga diri grabe. Matin-aw, an pagkwestyon kan Jesus han mga eskriba ngan Pariseo diri tungod kay napaid hira ha pag-antos hito nga lalaki. Lugod, namimiling hira hin maiaakusar kan Jesus.

Kondi maaram hi Jesus han ira baliko nga pangatadongan. Nakita niya nga mga panatiko hira ngan diri uyon ha Kasuratan an ira panhunahuna ha kon ano an diri puydi buhaton durante han Sabbath. (Eksodo 20:8-10) Gin-akusaran na hiya hadto tungod ha pagbuhat hin maopay. Yana may ginsiring hi Jesus nga nagresulta ha makatirigamnan nga komprontasyon. Ginsidngan niya an lalaki nga uga an kamot: “Buhát ngan kadto ha butnga.”—Marcos 3:3.

Katapos, hi Jesus nagsiring ha mga eskriba ngan Pariseo: “Hin-o ha iyo an may karnero nga kon mahulog ito ha buho ha adlaw han Sabbath, pababay-an la niya ngan diri kukuhaon?” (Mateo 12:11) Tungod kay may puhunan an pag-ataman hin karnero, diri nira ito pababay-an nga mabuwasan ha buho kay bangin mamatay ito, ngan salit malulugi hira. Labot pa hini, an Kasuratan nasiring: “An lalaki nga matadong nagtatagad han kinabuhi han iya mananap.”—Proberbios 12:10.

Ha pagtanding, hi Jesus nagpadayon: “Mas importante gud an lalaki kay ha karnero! Salit uyon ha balaud an pagbuhat hin maopay ha adlaw han Sabbath.” (Mateo 12:12) Kon sugad, diri gintatalapas ni Jesus an Sabbath pinaagi ha pagtambal ha lalaki. Waray makabaton an mga lider han relihiyon hiton lohikal ngan mapinairon nga pangatadongan. Humilom la hira.

Nasisina nga ginkita hira ni Jesus, ngan nasubo hiya tungod kay sayop an ira panhunahuna. Katapos ginsidngan ni Jesus an lalaki: “Unata an imo kamot.” (Mateo 12:13) Han gin-unat han lalaki an iya uga nga kamot, natambal ito. Nalipay gud hito an lalaki, pero ano an reaksyon han mga nangangalimbasog pagbitik kan Jesus?

Imbes nga malipay nga natambal an lalaki, an mga Pariseo nagkagawas ngan nakigsarabot dayon “ha mga membro han partido ni Herodes nga patayon hi Jesus.” (Marcos 3:6) Matin-aw nga kaupod hini nga partido ha politika an mga membro han usa nga grupo han relihiyon nga amo an mga Saduseo. Kasagaran, magkontra an mga Saduseo ngan mga Pariseo, pero yana nagkaurosa gud hira pagkontra kan Jesus.