Waray pag-iha katapos tambalon ni Jesus an surugoon han opisyal han kasundalohan, binaya hiya ha Capernaum ngan kinadto ha Nain, usa nga syudad nga sobra 32 ka kilometro tipakadto ha sur-weste. Pero diri hiya nag-uusahan. Kaupod niya an iya mga disipulo ngan an damu nga tawo. Posible nga tikagab-i na han inabot hira ha gawas han syudad han Nain. Didto, nakatapo nira an damu nga Judio nga nagpuprosesyon para ha lubong. An patay nga lawas han batan-on nga lalaki gindadara tipagawas han syudad basi ilubong.

An pinakamasurub-on ha ira amo an nanay han batan-on. Balo hiya, ngan yana namatay pa an iya uusa la nga anak. Han namatay an iya bana, may-ada pa gihapon hiya anak nga makakaupod. Hunahunaa kon mationan-o hiya kaduok ha iya anak, an iya paglaom ngan seguridad nakadepende ha iya anak. Yana nga namatay an iya anak, hin-o pa man an iya makakaupod ngan masuporta ha iya?

Han makita ni Jesus ini nga babaye, nabantad hiya tungod han duro nga kasubo han babaye ngan han iya makalolooy nga kahimtang. Ha buotan pero ha marig-on nga paagi, ginpasarig niya an babaye: “Ayaw na pagtinangis.” Pero labaw pa hito an iya ginbuhat. Dinaop hiya ngan ginkaptan an tiheras nga ginbubutangan han patay. (Lucas 7:13, 14) Tungod han iya panggawi ngan mga ginbuhat, tigda nga inundang an mga tawo nga nagtataguminatay. Posible gud nga damu ha ira an naghunahuna, ‘Ano an iya karuyag sidngon ngan ano an iya bubuhaton?’

Kumusta man an mga nagbibiyahe kaupod ni Jesus nga nakakita na han iya mga milagro, an iya pagpanambal hin damu nga may sakit? Posible nga waray pa nira makita hi Jesus nga nagbanhaw hin patay. Bisan kon nagkaada na mga pagbanhaw hadto, makakagbanhaw ba liwat hi Jesus? (1 Hadi 17:17-23; 2 Hadi 4:32-37) Hi Jesus nagsiring: “Batan-on, ginsusugo ko ikaw: Buhát!” (Lucas 7:14) Ngan ito gud an nahitabo. An batan-on liningkod ngan nagyakan! Iginhatag hiya ni Jesus ha iya nanay nga diri makatoo pero nalilipay hinduro. Yana, diri na hiya nag-uusahan.

Han makita han mga tawo nga nabanhaw an batan-on, ira gindayaw an Naghahatag-hin-Kinabuhi nga hi Jehova, ngan nagsiring: “Usa nga harangdon nga propeta an ginsugo nganhi ha aton.” Nasantop han iba an kahulogan han urusahon nga ginbuhat ni Jesus, ngan hira nagsiring: “Nalooy an Dios ha iya katawohan.” (Lucas 7:16) Ini nga milagro nahibantog dayon ha kahigrani nga nasud ngan posible nga nakaabot ha Nazaret, an lugar nga gindak-an ni Jesus nga mga 10 ka kilometro an kahirayo. Nakaabot pa ngani ito ha sur ha Judea.

Priso pa gihapon hi Juan nga Parabaptis, ngan interesado gud hiya ha mga ginbubuhat ni Jesus. Ginsumatan hiya han iya mga disipulo mahitungod hini nga mga milagro. Ano an iya reaksyon?