Iba-iba an reaksyon han mga tawo ha ginsisiring ngan ginbubuhat ni Jesus depende ha kahimtang han ira kasingkasing. Napamatud-an ini didto ha usa nga balay ha Galilea. Gin-imbitar hi Jesus han Pariseo nga hi Simon ha usa nga pangaon, posible basi mas makilala an usa nga nagbubuhat hin mga milagro. Bangin ginhunahuna ni Jesus nga higayon ini basi masangyawan an mga aadto, salit ginkarawat niya an imbitasyon, sugad la nga ginkarawat niya an imbitasyon hadto nga kumaon kaupod han mga parasukot hin buhis ngan magpakasasala.

Pero waray abiabiha hi Jesus ha paagi nga kasagaran nga ginhihimo ha mga bisita. Ha matapotapo nga dalan ha Palestina, napapasoan ngan nahuhugawan an mga tiil hadton mga nakasandalyas, salit usa nga kustomre han pag-abiabi an paghimsaw ha mga bisita hin matugnaw nga tubig. Waray ito buhata kan Jesus. Waray liwat hiya haruki, sugad han kasagaran nga ginhihimo. Usa pa nga kustomre an pagpahid hin lana ha buhok han bisita sugad nga pagpakita hin pagkabuotan ngan pag-abiabi. Waray liwat ini buhata kan Jesus. Kon sugad, paonan-o gud ba hiya gintratar?

Nagtikang an pangaon, ngan an mga bisita nangalingkod ha may lamesa. Samtang nangangaon, usa nga babaye nga diri imbitado an sinulod ha kwarto. “Kilala [hiya] ha syudad sugad nga makasasala.” (Lucas 7:37) An ngatanan nga diri perpekto nga tawo makasasala, pero ini nga babaye imoral an pagkinabuhi, bangin usa hiya nga hostes. Posible nga nakabati hiya han mga katutdoan ni Jesus, upod na an imbitasyon nga an ‘ngatanan nga binubug-atan kumadto kan Jesus para tagan hin kapahuwayan.’ (Mateo 11: 28, 29) Bangin napagios hiya ha mga ginsiring ngan ginbuhat ni Jesus, salit ginbiling niya hi Jesus.

Kinadto hiya kan Jesus ha may lamesa ngan linuhod ha tiilan ni Jesus. An mga luha han babaye tinuro ha mga tiil ni Jesus, ngan iya ito gintrapohan pinaagi han iya buhok. Mahigugmaon nga ginharokan niya an mga tiil ni Jesus ngan ginpahiran hin mahamot nga lana nga iya dara. Han nakita ito ni Simon waray hiya umuyon, ngan naghunahuna hiya: “Kon propeta ini nga tawo, maaram unta hiya kon hin-o ngan kon ano nga klase hin babaye ito nga nakapot ha iya, nga makasasala hiya.”—Lucas 7:39.

Tungod kay maaram hi Jesus han ginhuhunahuna ni Simon, hiya nagsiring: “Simon, may ig-iistorya ako ha imo.” Hi Simon binaton: “Magturutdo, ano ito?” Hi Jesus nagpadayon: “Duha nga lalaki an may utang ha parapautang. An usa 500 nga denaryo an utang, pero an usa 50. Han waray hira pakakabayad ha iya, kinasingkasing nga iya ginpasaylo hira nga duha. Salit, hin-o ha ira an mas maghihigugma ha iya?” Posible nga diri interesado hi Simon, pero binaton hiya: “Para ha akon, an nakautang hin mas daku nga kinasingkasing nga ginpasaylo niya.”—Lucas 7:40-43.

Umuyon hi Jesus. Katapos samtang nagkikita ha babaye, nagsiring hiya kan Simon: “Nakikita mo ba ini nga babaye? Pagsulod ko ha imo balay, waray mo ako hatagi hin tubig nga ihirimsaw. Pero an akon mga tiil ginhulos hini nga babaye han iya mga luha ngan gintrapohan ito han iya buhok. Waray mo ako haruki, pero mahigugmaon nga ginhinarokan hini nga babaye an akon mga tiil tikang nga sinulod ako. Waray mo pahiri hin lana an akon ulo, pero ginpahiran hini nga babaye hin mahamot nga lana an akon mga tiil.” Maaram hi Jesus nga ini nga babaye nagpapakita hin kinasingkasing nga pagbasol han iya imoral nga pagkinabuhi. Salit ha kataposan hi Jesus nagsiring: “Susumatan ko ikaw nga bisan kon damu an iya mga sala, ginpasaylo na ito kay nagpakita hiya hin daku nga gugma, kondi an ginpasaylo hin gutiay, nagpapakita hin gutiay nga gugma.”—Lucas 7:44-47.

Diri ginkukonsinter ni Jesus an imoralidad. Lugod, iginpapakita niya nga mahigugmaon nga nasasabtan niya an mga tawo nga nagbuhat hin seryoso nga sala pero nagpakita hin pagbasol ngan dumangop ha Kristo para han pagliaw. Ngan naliaw gud an babaye han nagsiring hi Jesus: “Ginpasaylo na an imo mga sala. . . . An imo pagtoo an nagtalwas ha imo; lakat nga mamurayawon.”—Lucas 7:48, 50.