Hi Jesus posible nga nakadto ha Capernaum han ginsaway niya an mga Pariseo. Han kulop na, binaya hiya ha balay ngan kinadto ha baybayon ha Dagat han Galilea, diin nagtirirok an damu nga tawo. Sinakay hi Jesus ha baluto, iginhurohirayo ito ha baybayon, ngan nagtikang hiya panutdo ha mga tawo mahitungod han Ginhadian han langit. Ginbuhat niya ini pinaagi hin mga ilustrasyon, o parabola. An iya mga mamarati pamilyar ha damu nga sitwasyon o butang nga iya gin-unabi, salit masayon nira masabtan an iba-iba nga bahin han Ginhadian.

Siyahan, naghisgot hi Jesus mahitungod hin magsarabwag nga nagsabwag hin binhi. An iba nga binhi nahulog ha ligid han dalan ngan ginpanuktok han katamsihan. Samtang an iba nga binhi nahulog ha batoon nga dapit nga gutiay la an tuna. Waray ito makagamot hin hilarom, salit han nasirakan han adlaw ito nga bag-o nga tanom, nalaya ito ngan nauga. An iba nga binhi nahulog ha katunokan, ngan han nagrabong an katunokan natabonan an bag-o nga mga tanom. Ha urhi, an iba nga binhi nahulog ha maopay nga tuna. Ini nga mga binhi namunga, “ini nga usa namunga hin 100 ka pilo, ito nga usa 60, ngan an usa pa 30.”—Mateo 13:8.

Ha ikaduha nga ilustrasyon, iginpariho ni Jesus an Ginhadian ha tawo nga nagsasabwag hin mga binhi. Hini nga kahimtang, nakaturog man an tawo o nagmamata, an mga binhi nanagku. “Diri hiya maaram” kon paonan-o ito nahitabo. (Marcos 4:27) Nanagku na la ito ngan nagkaada mga bunga nga maaani niya.

Katapos, naghisgot hi Jesus hin ikatulo nga ilustrasyon mahitungod han magsarabwag. May tawo nga nagsabwag hin maopay nga binhi, pero “han nangangaturog an mga tawo,” usa nga kaaway an nagsabwag hin mga banwa dida ha mga trigo. An mga uripon han tawo nagpakiana kon gagabuton ba nira  an mga banwa. Hiya binaton: “Ayaw, kay bangin mahiupod kagabot an mga trigo samtang gin-gagabot niyo an mga banwa. Pasagdi la niyo nga dungan nga tumubo ito tubtob ha pag-ani, ngan ha pag-ani akon sisidngan an mga mag-arani: Gabota anay an mga banwa ngan pamutka basi sunugon, katapos tiroka an mga trigo ngadto ha akon bodega.”—Mateo 13:24-30.

Damu han mamarati ni Jesus an maaram mahitungod han pag-uma. Nag-unabi liwat hiya hin usa pa nga butang nga pamilyar ha ira, an gutiay hinduro nga liso han mustasa. Natubo ito ngan nagigin daku gud nga kahoy diin nakakahapon an katamsihan ha mga sanga hito. Mahitungod hini nga liso, hiya nagsiring: “An Ginhadian han langit pariho hin liso han mustasa nga igintanom hin usa nga tawo ha iya uma.” (Mateo 13:31) Pero, hi Jesus diri nagtututdo mahitungod ha tanom. Igin-iilustrar niya an mahitungod han urusahon nga pagtubo, kon paonan-o an usa nga gigutiayi mahimo dumaku hinduro.

Katapos, ginhisgotan ni Jesus an proseso nga pamilyar ha damu han iya mamarati. Iya iginpariho an Ginhadian han langit “hin libadura nga ginkuha han usa nga babaye ngan iginsalakot ha tulo ka takos nga harina.” (Mateo 13:33) Bisan kon diri nakikita, an libadura nagsarang ha ngatanan nga bahin han minasa ngan nagpatubo hito. Nagriresulta ini hin daku nga pagtubo ngan pagbag-o nga diri dayon nakikita.

Katapos hisgotan ini nga mga ilustrasyon, ginpauli ni Jesus an mga tawo ngan binalik hiya ha iya gin-uukyan nga balay. Waray pag-iha, kinadto ha iya an mga disipulo kay karuyag nira masabtan an kahulogan han iya ginsiring.

An mga disipulo nakabati na hadto han mga ilustrasyon ni Jesus, pero diri sugad hito kadamu. Nagpakiana hira ha iya: “Kay ano nga pinaagi hin mga ilustrasyon an imo pag-istorya ha ira?”—Mateo 13:10.

An usa nga rason, basi matuman an tagna ha Biblia. An asoy ni Mateo nasiring: “Pirme hiya nagamit hin ilustrasyon kon nakikiistorya ha ira, basi matuman an iginsiring pinaagi han propeta: ‘Magyayakan ako pinaagi hin mga ilustrasyon, ngan ipapahayag ko an mga butang nga nakatago tikang ha tinikangan.’”—Mateo 13:34, 35; Salmo 78:2.

Pero, may iba pa nga hinungdan kon kay ano nga gumamit hi Jesus hin mga ilustrasyon. Pinaagi hito naibuhayhag an disposisyon han mga tawo. Damu ha ira an interesado kan Jesus tungod la kay maopay gud hiya mag-istorya ngan nagbubuhat hiya hin milagro. Diri nira hiya gintatagad sugad nga usa nga sadang sugton pariho hin Ginoo ngan sadang sundon hin kinaburut-on. (Lucas 6:46, 47) Diri nira karuyag bag-uhon an ira panhunahuna o pagkinabuhi. Diri nira karuyag nga makaapekto gud ha ira an mensahe ni Jesus.

Ha pagbaton ha pakiana han mga disipulo, hi Jesus nagsiring: “Salit nagyayakan ako ha ira pinaagi hin mga ilustrasyon, kay nakakakita hira pero baga hin waray nakikita, nakakabati hira pero baga hin waray nababatian, ngan diri liwat hira nakakasabot han kahulogan hito. Natutuman ha ira an tagna ni Isaias nga nasiring: ‘. . . An kasingkasing hini nga katawohan nagin matig-a.’”—Mateo 13:13-15; Isaias 6:9, 10.

Pero ito nga mga pulong diri aplikado ha ngatanan nga namamati kan Jesus. Hiya nagsaysay: “Malipayon kamo kay an iyo mga mata nakakakita, ngan an iyo mga talinga nakakabati. Ha pagkamatuod, susumatan ko kamo: Damu nga propeta ngan magtadong nga tawo an naghingyap nga makit-an an iyo nakikita nga waray nira makita, ngan naghingyap nga mabatian an iyo nababatian nga waray nira mabatii.”—Mateo 13:16, 17.

Oo, an 12 nga apostol ngan an iba pa nga maunungon nga disipulo may makinarawaton nga kasingkasing. Mahitungod ha ira, hi Jesus nagsiring: “An sagrado nga mga tinago han Ginhadian han langit  iginpapasabot ha iyo, pero diri ito iginpapasabot ha ira.” (Mateo 13:11) Tungod kay karuyag gud han mga disipulo nga makasabot, iginsaysay ni Jesus ha ira an ilustrasyon mahitungod han magsarabwag.

Hi Jesus nagsiring: “An binhi amo an pulong han Dios.” (Lucas 8:11) Ngan an tuna amo an kasingkasing. An paghibaro hini importante basi masabtan an kahulogan han iya ilustrasyon.

Mahitungod ha binhi nga nahisabwag ha tuna nga gintamak-tamakan ha ligid han dalan, hiya nagsaysay: “Inabot an Yawa ngan ginkuha an pulong ha ira kasingkasing basi diri hira tumoo ngan diri matalwas.” (Lucas 8:12) May kalabotan ha binhi nga nahisabwag ha batoon nga dapit nga gutiay la an tuna, an iginpapasabot ni Jesus amo an kasingkasing han mga tawo nga malipayon nga kinarawat han pulong pero waray ito makagamot hin hilarom ha ira kasingkasing. “Pag-abot han kasakitan o pagtimaraot tungod han pulong” waray na hira tumoo hito. Oo, ito an mahitatabo “pag-abot han pagsari,” bangin pagtimaraot han ira kapamilya o iba pa.—Mateo 13:21; Lucas 8:13.

Kumusta man an binhi nga nahulog ha katunokan? Iginsumat ni Jesus nga nagtutudlok ini ha mga nakabati han pulong. Pero nadaog hira han “kabaraka ha kinabuhi hini nga sistema ngan an nakakalimbong nga gahum han karikohan.” (Mateo 13:22) Aada na ha ira kasingkasing an pulong, pero natabonan ito salit waray mamunga.

An ultimo nga klase han tuna nga ginhisgotan ni Jesus amo an maopay nga tuna. Nagtutudlok ini hadton mga nakabati han pulong ngan kinasingkasing nga kumarawat hito, nakasabot hira han tinuod nga kahulogan hito. Ano an resulta? ‘Namunga’ hira. Tungod han ira iba-iba nga kahimtang, sugad han edad o kahimsog, diri parapriho an ira nahihimo; an usa namumunga hin 100 ka pilo, an usa 60 ka pilo, ngan an usa pa 30 ka pilo. Oo, an mga bendisyon ha pag-alagad ha Dios nakakarawat han mga “nagtitipig han pulong ngan namumunga nga  may pagpailob katapos nira mamati nga may makinarawaton nga kasingkasing.”—Lucas 8:15.

Makaruruyag gud ini nga mga pulong labi na ha mga disipulo nga nagpakiana kan Jesus kon ano an kahulogan han iya mga igintutdo! Yana, nasasabtan na gud nira an mga ilustrasyon. Karuyag ni Jesus nga masabtan nira an iya mga ilustrasyon basi maitutdo liwat nira ito ha iba. Hiya nagpakiana: “An lampara diri gintatakloban hin taraksan nga basket o iginbubutang ha ilarom han katre, lugod iginbubutang ito ha burutangan han lampara, diri ba?” Salit, hi Jesus nagsagdon: “Bisan hin-o nga may mga talinga ha pagpamati, mamati.”—Marcos 4:21-23.

Katapos hibatian han mga disipulo an pagsaysay ni Jesus ha ilustrasyon mahitungod han magsarabwag, karuyag pa nira mahibaro hin dugang. Naghangyo hira: “Ig-esplikar ha amon an ilustrasyon mahitungod han mga banwa ha uma.”—Mateo 13:36.

Ha paghangyo hini, iginpakita nira nga an ira disposisyon diri pariho ha mga tawo didto ha baybayon. Matin-aw nga nakabati han ilustrasyon ito nga mga tawo pero waray hira hingyap nga mahibaro han kahulogan ngan han aplikasyon hito. Kontento na hira ha mga gin-unabi la ha ilustrasyon. Basi ipakita an kaibahan han mga mamarati didto ha baybayon ngan han iya mga disipulo, hi Jesus nagsiring:

“Tagi hin atensyon an iyo hinbabatian. An suruklan nga iyo ginagamit amo an gagamiton ha iyo, oo, damu pa an idudugang ha iyo.” (Marcos 4:24) An mga disipulo naghahatag hin atensyon ha ira mga nababatian tikang ha iya. Nagpakita hira hin sinsero nga interes ngan atensyon kan Jesus pariho han iya iginpakita ha ira, ginbendisyonan liwat hira hin dugang nga instruksyon ngan hin dugang nga pagsabot. Salit ha pagbaton han pakiana han iya mga disipulo mahitungod ha ilustrasyon han trigo ngan mga banwa, hiya nagsaysay:

“An magsarabwag han maopay nga binhi amo an Anak han tawo. An uma amo an kalibotan, ngan an maopay nga binhi amo an mga anak han Ginhadian, kondi an mga banwa amo an mga anak han usa nga maraot, ngan an kaaway nga nagsabwag hito amo an Yawa. An pag-ani amo an ikatarapos hini nga sistema, ngan an mag-arani amo an mga anghel.”—Mateo 13:37-39.

Katapos isaysay an tagsa nga bahin han iya ilustrasyon, iginhulagway ni Jesus an mahitatabo ha urhi. Hiya nagsiring nga ha ikatarapos hini nga sistema, ibubulag han mga mag-arani, o mga anghel, an sugad-banwa nga diri tinuod nga mga Kristiano tikang ha tinuod nga “mga anak han Ginhadian.” “An magtadong” titirukon ngan ha urhi masanag hin malamrag “ha Ginhadian han ira Amay.” Ngan ano an mahitatabo ha “mga anak han usa nga maraot”? Mabubungkag hira, salit “hira mananangis ngan mangingigot an ira mga ngipon.”—Mateo 13:41-43.

Sunod ginbendisyonan ni Jesus an iya mga disipulo hin tulo pa nga ilustrasyon. Ha siyahan, hiya nagsiring: “An Ginhadian han langit pariho hin nakatago nga bahandi ha uma nga hinkit-an hin usa nga  tawo ngan iya igintago. Tungod han iya kalipay, linakat hiya ngan iginbaligya an iya mga panag-iya ngan ginpalit ito nga uma.”—Mateo 13:44.

Ha ikaduha, hiya nagpadayon: “An Ginhadian han langit pariho liwat hin nagbibiyahe nga negosyante nga nagpipinamiling hin mag-opay nga perlas. Pakakita niya hin maopay nga klase hin perlas, inuli hiya ngan iginbaligya dayon an ngatanan nga iya panag-iya ngan ginpalit ito.”—Mateo 13:45, 46.

Hinin duha nga ilustrasyon, ginpabug-atan ni Jesus an pagin andam magsakripisyo han usa para ha kon ano an tinuod nga birilhon. Iginbaligya dayon han negosyante an “ngatanan nga iya panag-iya” basi mapalit an maopay nga klase hin perlas. Masasabtan han mga disipulo ni Jesus ito nga ilustrasyon mahitungod han presyoso nga perlas. Ngan an tawo nga nakaagi hin nakatago nga bahandi ‘nagbaligya han iya mga panag-iya’ basi iya ito makuha. Ini nga mga ilustrasyon pariho naghihisgot hin butang nga birilhon nga sadang makuha ngan tipigan. Maipapariho ini ha mga pagsakripisyo han usa basi matagbaw an iya espirituwal nga panginahanglan. (Mateo 5:3) An pipira han nakabati han mga ilustrasyon ni Jesus nagpakita na hin pagin andam ha pagsakripisyo basi matagbaw an ira espirituwal nga panginahanglan ngan magin iya tinuod nga mga sumurunod.—Mateo 4:19, 20; 19:27.

Ha ikatulo, iginpariho ni Jesus an Ginhadian han langit ha usa nga pukot nga nakadakop han ngatanan nga klase hin isda. (Mateo 13:47) Han ginbulag-bulag an mga isda, an mag-opay iginbutang ha mga surudlan pero an diri mag-opay iginlabog. Hi Jesus nagsiring nga sugad hito an mahitatabo ha ikatarapos hini nga sistema—ibubulag han mga anghel an magraot tikang ha magtadong.

Hi Jesus mismo nagbubuhat hin usa nga klase hin espirituwal nga pagpangisda han gintawag niya an iya siyahan nga mga disipulo nga magin “parapangisda hin mga tawo.” (Marcos 1:17) Pero, nagsiring hiya nga an iya ilustrasyon mahitungod han pukot aplikado ha tidaraon, “ha ikatarapos hini nga sistema.” (Mateo 13:49) Salit nasantop han mga apostol ngan han iba nga disipulo nga namamati kan Jesus nga may makapainteres gud nga mahitatabo.

Mas nadugangan an kahibaro hadton nakabati han mga ilustrasyon nga ginhisgotan ni Jesus didto ha baluto. Iginpakita ni Jesus an iya pagin andam ha ‘pag-esplikar han ngatanan ha iya la mga disipulo.’ (Marcos 4:34) “Pariho [hiya] hin tawo o agaron han panimalay nga nagpapagawas hin bag-o ngan daan nga mga butang tikang ha iya burutangan han bahandi.” (Mateo 13:52) Ha pagsumat hini nga mga ilustrasyon, diri nagpapabilib hi Jesus han iya abilidad ha pagtutdo. Lugod, iya igintututdo ha iya mga disipulo an mga kamatuoran nga pariho hin birilhon gud nga bahandi. Waray gud hiya kapariho nga “magturutdo.”