Ha usa nga sinagoga ha Capernaum, hi Jesus nagtutdo mahitungod han iya pagin tinuod nga tinapay tikang ha langit. Matin-aw nga an iya ginsiring sumpay han iya iginsumat ha mga tawo nga binalik tikang ha este han Dagat han Galilea, adton kinaon han tinapay ngan isda nga iginpanhatag didto.

Iginpadayon ni Jesus an iya paghisgot, ha pagsiring: “An iyo kaapoy-apoyan kinaon hin manna ha kamingawan pero namatay la gihapon hira.” Ha kabaliktaran, hiya nagsaysay: “Ako an buhi nga tinapay tikang ha langit. Bisan hin-o nga kumaon hini nga tinapay mabubuhi ha kadayonan. Ha pagkamatuod, an tinapay nga akon ihahatag amo an akon unod para ha kinabuhi han katawohan ha kalibotan.”—Juan 6:48-51.

Han katsaringsing han 30 C.E., hi Jesus nagsiring kan Nicodemo nga hinigugma gud han Dios an kalibotan salit Iya iginhatag an Iya Anak sugad nga Paratalwas. Yana, ginpabug-atan ni Jesus nga kinahanglan kaunon an iya unod pinaagi ha pagpakita hin pagtoo ha halad nga iya hihimoon. Ini an paagi basi makarawat an kinabuhi nga waray kataposan.

Pero an mga tawo kumontra ha ginsiring ni Jesus. Hira nagpakiana: “Paonan-o ipapakaon ha aton hini nga tawo an iya unod?” (Juan 6:52) Karuyag ni Jesus nga masabtan nira nga diri ini literal. An iya dugang nga ginsiring nagpapakita han kahulogan hito.

“Kon diri kamo kumaon han unod ngan uminom han dugo han Anak han tawo, diri kamo magkakaada kinabuhi. An nakaon han akon unod ngan nainom han akon dugo may kinabuhi nga waray kataposan, . . . kay an akon unod amo an totoo nga pagkaon, ngan an akon dugo amo an totoo nga irimnon. An nakaon han akon unod ngan nainom han akon dugo kahiusa ko pirme.”—Juan 6:53-56.

Hunahunaa la kon mationan-o kangirhat ito nga mga pulong para ha mga Judio! Bangin naghunahuna hira nga hi Jesus nag-aaghat hin kanibalismo o pagtalapas ha balaud han Dios kontra ha pagkaon ngan pag-inom hin dugo. (Genesis 9:4; Lebitiko 17:10, 11) Pero diri literal nga pagkaon hin unod o pag-inom hin dugo an iginpapasabot ni Jesus. Iginpapakita niya nga an ngatanan nga naruruyag magkaada hin kinabuhi nga waray kataposan kinahanglan magpakita hin pagtoo ha halad nga iya hihimoon kon ihatag na niya an iya perpekto nga tawhanon nga lawas ngan ibubo an iya dugo. Pero, bisan an damu han iya disipulo waray makasabot hini nga iya igintutdo. An iba nagreklamo: “Makangingirhat ini nga mga pulong. Hin-o an makakailob pagpinamati hini?”—Juan 6:60.

Tungod kay maaram hi Jesus nga an iba han iya mga disipulo nagrireklamo, nagpakiana hiya: “Nawawara ba an iyo pagtoo tungod hini? Labi na gud kon makita niyo an Anak han tawo nga nasaka ngadto ha iya gintikangan! . . . An akon ginsiring ha iyo tikang ha baraan nga espiritu ngan naghahatag hin kinabuhi. Pero an iba ha iyo diri natoo.” Tungod hini, damu nga disipulo an binaya ngan waray na sumunod ha iya.—Juan 6:61-64.

Salit ginpakianhan ni Jesus an iya 12 nga apostol: “Karuyag ba liwat niyo bumaya?” Hi Pedro binaton: “Ginoo, hin-o pa man an amon kakadtoan? Ikaw an may mga pulong han kinabuhi nga waray kataposan. Natoo kami ngan maaram nga ikaw an Usa nga Baraan tikang ha Dios.” (Juan 6:67-69) Kapahayagan gud ito hin pagkamaunungon, bisan kon hini nga takna waray bug-os nga masabti ni Pedro ngan han iba pa nga apostol an igintutdo ni Jesus!

Nalipay hi Jesus ha baton ni Pedro, kondi nagsiring hiya: “Kamo nga 12 an akon ginpili, diri ba? Pero an usa ha iyo parapakaraot.” (Juan 6:70) An gin-uunabi ni Jesus amo hi Judas Iscariote. Posible nga hini nga takna maaram na hi Jesus nga hi Judas nagtikang na gumios uyon ha sayop nga mga hingyap.

Bisan pa hito, sigurado nga nalipay hi Jesus nga mahibaro nga hi Pedro ngan an iba nga apostol diri maundang ha pagsunod ha iya ngan ha pakigbahin ha buruhaton nga nagtatalwas hin kinabuhi nga iya ginhihimo.