Gin-imbitar ni Jesus an upat nga disipulo—hira Pedro, Andres, Santiago, ngan Juan—nga magin parapangisda hin mga tawo. Han Sabbath, hira ngatanan kinadto ha sinagoga ha Capernaum. Nagtutdo hi Jesus didto ngan nahipausa na liwat an mga tawo ha iya paagi han pagtutdo. Tungod ini kay ginbubuhat niya ito nga may awtoridad, diri pariho han mga eskriba.

Hini nga Sabbath, may lalaki nga ginsaniban hin demonyo. Nagginuliat hiya didto mismo ha sinagoga: “Ano an imo tuyo ha amon, Jesus nga Nazareno? Kinanhi ka ba basi poohon kami? Maaram gud ako kon hin-o ka, ikaw an Usa nga Baraan tikang ha Dios.” Ginsaway ni Jesus an demonyo nga nagkukontrol ha lalaki: “Ayaw pag-inaringasa, ngan gawas ha iya!”—Marcos 1:24, 25.

Katapos, an lalaki ginpakisaykisay han maraot nga espiritu ngan ginuliat hin makusog. Pero an demonyo gumawas ha lalaki ngan “waray hiya pasakiti.” (Lucas 4:35) Nahipausa gud an mga nakadto ha sinagoga! “Ano ini?” hira nagpakiana. “May awtoridad hiya ha pagsugo bisan ha magraot nga espiritu, ngan nasugot hira ha iya.” (Marcos 1:27) Syempre, ini nga hitabo nahibantog ha bug-os nga Galilea.

Pagbaya ni Jesus ngan han iya mga disipulo ha sinagoga, kinadto hira ha balay ni Simon, o Pedro. Pag-abot nira, an kan Pedro ugangan nga babaye may hitaas nga hiranat. Nakimalooy hira nga buligan hiya ni Jesus. Salit dumaop hi Jesus ha iya, ginkaptan an iya kamot, ngan ginbuligan hiya pagbuhat. Nag-opay dayon hiya ngan gin-asikaso hi Jesus ngan an mga disipulo, bangin gin-andaman hira hin pagkaon.

Han tikatunod na an adlaw, an mga tawo ha kahigrani nga lugar nagdara han ira mga sulod-balay nga may sakit ngadto ha balay ni Pedro. Waray pag-iha, baga hin an ngatanan nga tawo ha syudad nagpurundok ha purtahan. Kay ano? Kay karuyag nira magpatambal. Ha pagkamatuod, “gindara kan Jesus han ngatanan nga tawo an ira mga sulod-balay nga may mga sakit. Gintambal niya hira pinaagi han pagkapot ha tagsa ha ira.” (Lucas 4:40) Oo, anoman an ira sakit, gintambal hira ni Jesus sugad han igintagna. (Isaias 53:4) Iya pa ngani ginpagawas an mga demonyo ha mga ginsaniban. Samtang nagawas an mga demonyo, naguliat hira: “Ikaw an Anak han Dios.” (Lucas 4:41) Pero ginsaway hira ni Jesus ngan waray na hira payakna. Maaram hira nga hi Jesus an Kristo, pero nadiri hiya nga hunahunaon han mga tawo nga an mga demonyo nag-aalagad ha tinuod nga Dios.