Gintagan ni Jesus an iya mga apostol hin maopay gud nga mga instruksyon kon paonan-o magsasangyaw nga padis-padis. Pero labot pa hito, ha buotan nga paagi nagpahamangno hiya mahitungod han mga parakontra: “Kitaa! Sugad kamo hin mga karnero nga ginsusugo ko ngadto ha butnga han mga lobo . . . Pag-ikmat kamo ha mga tawo kay dadad-on kamo nira ha mga korte, ngan lalatiguhon kamo ha ira mga sinagoga. Oo, dadad-on kamo ha mga gobernador ngan mga hadi tungod ha akon.”—Mateo 10:16-18.

Oo, an mga sumurunod ni Jesus bangin makaeksperyensya hin duro nga pagtimaraot, pero ginpasarig niya hira pinaagi hini nga saad: “Kon dad-on kamo, ayaw kamo kabaraka kon paonan-o kamo magyayakan o kon ano an iyo igsisiring, kay hibabaroan niyo an iyo yayaknon hito nga takna, kay diri kamo an nagyayakan, kondi an espiritu han iyo Amay an nagyayakan pinaagi ha iyo.” Hi Jesus nagpadayon: “Itutubyan han bugto ha kamatayon an iya bugto, ngan han amay an iya anak, ngan kukontrahon han mga anak an ira mga kag-anak ngan ipapapatay hira. Ngan mapupungot ha iyo an ngatanan nga tawo tungod ha akon ngaran, pero an magpailob tubtob ha kataposan amo an matatalwas.”—Mateo 10:19-22.

Tungod kay an pagsangyaw amo an pinakaimportante, ginpabug-atan ni Jesus nga an iya mga sumurunod kinahanglan magin maaramon basi makagpadayon hini nga buruhaton. Hiya nagsiring: “Kon pagtimarauton kamo ha usa nga syudad, pakadto kamo ha iba nga lugar, kay ha pagkamatuod, susumatan ko kamo: Diri niyo malilibot an ngatanan nga syudad ha Israel tubtob nga umabot an Anak han tawo.”—Mateo 10:23.

Maopay gud ini nga mga instruksyon, pahamangno, ngan pagdasig nga iginhatag ni Jesus ha iya 12 nga apostol! Kondi, posible nga mahunahuna mo nga ini nga mga pulong aplikado liwat ha mga makikigbahin ha pagsangyaw katapos mamatay ngan mabanhaw hi Jesus. Iginpatin-aw niya ini han nagsiring hiya nga ‘mapupungot an ngatanan nga tawo’ ha iya mga disipulo, diri la adton ginsasangyawan han mga apostol. Dugang pa, waray kita mababasa nga an mga apostol gindara ngadto ha mga gobernador ngan ha mga hadi durante han ira halipot nga panahon nga pagsangyaw ha Galilea, o iginpapatay man hira han ira mga kapamilya.

Matin-aw, an tidaraon an ginhuhunahuna ni Jesus han ginsiring niya ito ha mga apostol. Tagda an iya ginsiring nga diri masasangyawan han iya mga disipulo an ira bug-os nga teritoryo “tubtob nga umabot an Anak han tawo.” Iginpapasabot ni Jesus nga antes pa matapos han iya mga disipulo an pagsangyaw mahitungod han Ginhadian han Dios, maabot na an ginhimaya nga Hadi nga hi Jesu-Kristo sugad nga hukom han Dios.

Samtang nagsasangyaw an mga apostol, diri hira sadang mahipausa kon kontrahon hira, kay hi Jesus nagsiring: “An disipulo diri labaw ha iya magturutdo, o an uripon diri labaw ha iya agaron.” Matin-aw an punto ni Jesus. Gintratar hiya hin diri maopay ngan gintimaraot tungod ha pagsangyaw han Ginhadian han Dios, salit ito liwat an maieksperyensyahan han iya mga disipulo. Pero hi Jesus nagsagda: “Ayaw kamo kahadlok ha nakakamatay han lawas kondi diri nakakamatay han kalag; lugod, mahadlok kamo ha iya nga nakakabungkag han kalag ngan han lawas ha Gehenna.”—Mateo 10:24, 28.

Nagpakita hi Jesus hin susbaranan hini nga bahin. Waray kahadlok nga gin-atubang niya an kamatayon imbes nga ikompromiso an iya pagkamaunungon ha surok han gahum, hi Jehova. An Dios nga Makagarahum-ha-ngatanan an makakagbungkag han “kalag” han tawo (an iya paglaom nga kinabuhi ha tidaraon) o makakagbanhaw ha iya basi magpahimulos hin kinabuhi nga dayon. Sigurado nga naparig-on hini an mga apostol!

Ha pag-ilustrar ni Jesus mahitungod han mahigugmaon nga pag-ataman han Dios ha iya mga sumurunod, hiya nagsiring: “An duha nga maya iginbabaligya ha gutiay gud nga kantidad hin sinselyo, diri ba? Pero waray usa hito an nahuhulog ha tuna nga diri hinbabaroan han iyo Amay. . . . Salit ayaw kahadlok: Mas importante kamo kay ha damu nga maya.”—Mateo 10:29, 31.

An mensahe nga isasangyaw han mga disipulo ni Jesus magbabahin han mga pamilya. An iba nga membro makarawat hito pero an iba diri. Hi Jesus nagsiring: “Ayaw kamo paghunahuna nga kinanhi ako pagdara hin kamurayawan ha tuna.” Oo, kinahanglan magin maisugon an usa nga membro han pamilya basi karawaton an kamatuoran tikang ha Biblia. Hi Jesus nagpadayon: “An mas nagpapalangga ha amay o iroy kay ha akon diri takos ha akon, ngan an mas nagpapalangga ha anak nga lalaki o anak nga babaye kay ha akon diri takos ha akon.”—Mateo 10:34, 37.

Pero may mga tawo nga makarawat ha iya mga disipulo. Hiya nagsiring: “An nahatag hin bisan usa la ka baso hin matugnaw nga tubig ha usa hini nga gudtiay tungod kay disipulo ko hiya, susumatan ko kamo: Diri gud hiya mawawad-an hin balos.”—Mateo 10:42.

Katapos makarawat an mga instruksyon, pahamangno, ngan pagdasig ni Jesus, an mga apostol kinadto “ha mga baryo basi ipasamwak an maopay nga sumat ngan manambal ha bisan diin.”—Lucas 9:6.