Ha sulod hin mauruiha nga panahon, iginpokus ni Jesus ha Galilea an iya buruhaton, diin mas damu an kinarawat ha iya kay ha Judea. Labot la hini, han nakadto hiya ha Jerusalem ngan nagtambal hin usa ka tawo durante ha Sabbath, “mas nangalimbasog an mga Judio nga patayon hiya.”—Juan 5:18; 7:1.

Katrakdag na han 32 C.E., ngan hirani na an Piyesta han mga Tabernakulo (o, mga Payag). Ini nga piyesta ginsiselebrar ha sulod hin pito ka adlaw, ngan ginsusundan hin sagrado nga katirok ha ikawalo ka adlaw. Nagtitigaman ini nga tapos na an tuig han pag-uma ngan panahon na han duro nga paglipay ngan pagpasalamat.

An kabugtoan ni Jesus ha nanay nga hira Santiago, Simon, Jose, ngan Judas, nagsagda ha iya: “Baya dinhi ngan kadto ha Judea.” An Jerusalem an sentro han buruhaton ha relihiyon ha nasud. Durante han tulo nga tinuig nga piyesta, damu gud an tawo ha syudad. An kabugtoan ni Jesus nagsiring: “An naruruyag makilala han publiko diri nagtatago han iya ginbubuhat. Tungod kay ginbubuhat mo ini, magpakita ka ha kalibotan.”—Juan 7:3, 4.

An tinuod, inin upat nga magburugto “diri natoo ha iya” sugad nga an Mesias. Pero, karuyag nira nga an mga nakadto ha piyesta makakita han iya mga milagro. Maaram hi Jesus han peligro, salit iya ginsidngan hira: “An kalibotan waray rason nga masina ha iyo, pero nasisina ito ha akon, kay nagpapamatuod ako nga maraot an mga buhat hito. Kadto kamo ha piyesta; diri pa ako makadto hini nga piyesta, kay an akon oras waray pa umabot.”—Juan 7:5-8.

Paglabay hin pipira ka adlaw katapos bumaya an kabugtoan ni Jesus kaupod an grupo hin mga nagbibiyahe, patago nga linakat hi Jesus ngan an iya mga disipulo, ngan waray ito hibaroi han mga tawo. Inagi hira ha Samaria, nga mas direkta nga ruta, imbes nga ha mas komon nga ruta hirani ha Salog Jordan. Kinahanglan ni Jesus ngan han iya mga disipulo hin mauukyan ha Samaria, salit nagsugo hiya hin mga mensahero basi mangandam. Ha usa nga lugar didto, waray hira karawata o abiabiha han mga tawo tungod kay hi Jesus tikadto ha Jerusalem para ha piyesta han mga Judio. Salit hira Santiago ngan Juan nasisina nga nagpakiana: “Ginoo, karuyag mo ba nga magpalusad kami hin kalayo tikang ha langit basi bungkagon hira?” (Lucas 9:54) Ginsaway hira ni Jesus bisan kon nagsuhestyon la hira, ngan nagpadayon hira pagbiyahe.

Samtang nagbabaktas, usa nga eskriba an nagsiring kan Jesus: “Magturutdo, maupod ako ha imo bisan diin ka kumadto.” Hi Jesus binaton: “An mga garong may mga lungib ngan an katamsihan may mga salag, kondi an Anak han tawo waray kalugaringon nga urukyan nga makakaturogan.” (Mateo 8:19, 20) Iginpapasabot niya nga an eskriba makakaeksperyensya hin kakurian kon magin sumurunod hiya ni Jesus. Ngan baga hin mapahitas-on gud ini nga eskriba kay waray niya karawata ini nga paagi han pagkinabuhi. Salit an tagsa ha aton mahimo magpakiana, ‘Andam gud ba ako nga sumunod kan Jesus?’

Katapos, may usa pa nga tawo nga ginsidngan ni Jesus: “Sunod ha akon.” An tawo binaton: “Tuguti anay ako pag-uli ngan paglubong ha akon tatay.” Maaram hi Jesus han kahimtang hito nga tawo, salit hiya nagsiring: “Pabay-i an mga patay nga maglubong han ira mga patay, kondi lakat lugod ngan ipasamwak ha bisan diin an Ginhadian han Dios.” (Lucas 9:59, 60) Matin-aw nga diri pa patay an tatay. Kay kon patay na hiya, waray unta didto an iya anak nga nakikiistorya kan Jesus. An anak diri andam nga unahon ha iya kinabuhi an Ginhadian han Dios.

Samtang nagbabaktas hira tipakadto ha Jerusalem, usa pa nga lalaki an nagsiring kan Jesus: “Ginoo, maupod ako ha imo, kondi tuguti anay ako pagsarit ha akon pamilya.” Hi Jesus binaton: “Waray tawo nga nakapot ha arado ngan nalingi an takos makasulod ha Ginhadian han Dios.”—Lucas 9:61, 62.

Adton naruruyag magin tinuod nga disipulo ni Jesus kinahanglan nakapokus ha buruhaton para ha Ginhadian. Kon an nag-aarado diri nakapukos ha unahan, posible nga mahiwi an iya gin-aarado. Kon ibubutang niya an arado basi lumingi, mauundang an trabaho. Sugad man, an bisan hin-o nga nalingi hinin daan nga sistema mahimo nga diri makapadayon ha dalan ngadto ha kinabuhi nga waray kataposan.