Nahibantog ha mga Judio nga naukoy ha norte-weste nga baybayon han Dagat han Galilea nga mauli na hi Jesus tikang ha Decapolis. Posible nga damu an nakabati nga han naglabay nga subasko, iya ginpakalma an hangin ngan an dagat. Bangin maaram liwat an iba nga gintambal niya an mga lalaki nga ginsaniban han mga demonyo. Salit “damu nga tawo” an nagtirirok hirani ha dagat, posible nga ha Capernaum, basi tapoon hi Jesus. (Marcos 5:21) Pag-abot niya ha baybayon, an mga tawo eksayted gud nga nagpipinamulat.

An usa hadton karuyag gud makigkita kan Jesus amo hi Jairo, nga punoan nga opisyal han sinagoga, bangin ha Capernaum. Yinukbo hiya ha tiilan ni Jesus ngan pauroutro nga nakimalooy: “An akon daragita grabe an sakit. Alayon upod ha akon ngan kapti hiya basi mag-opay ngan diri mamatay.” (Marcos 5:23) Ano an bubuhaton ni Jesus tungod han duro nga pakimalooy ni Jairo nga buligan an iya nag-uusahan nga anak, nga 12 anyos pa la ngan hinigugma gud niya?—Lucas 8:42.

Han tikadto na hi Jesus ha balay ni Jairo, inatubang hiya hin usa pa nga makapabantad gud nga sitwasyon. Eksayted an damu nga inupod kan Jesus tungod kay naghuhunahuna hira kon makakakita ba hira utro hin milagro. Pero, an usa nga babaye nga kaupod hito nga mga tawo waray iba nga ginhihinunahuna kondi an iya grabe nga sakit.

Ha sulod hin 12 ka tuig, ini nga Judio nga babaye nag-iinantos tungod ha pagdinugui. Nagpatambal hiya ha iba-iba nga doktor, ngan gin-gasto an ngatanan niya nga kwarta ha mga tambal nga ira iginrekomendar. Pero waray hiya mag-opay. Ngani, “nagtikagrabe la” an iya sakit.—Marcos 5:26.

Posible nga mahunahuna mo nga labot la nga nakakapaluya an iya sakit, makaarawod liwat ito ngan nakakawara hin dignidad. Kasagaran nga diri ito igin-iistorya ha dayag. Dugang pa, ha Mosaiko nga Balaud, an gindidinugoan nga babaye mahugaw. An bisan hin-o nga kumapot ha iya o ha iya may dugo nga mga bado kinahanglan kumarigo ngan magigin mahugaw tubtob ha gab-i.—Lebitiko 15:25-27.

Ini nga babaye ‘nakabati han mga sumat mahitungod kan Jesus,’ salit ginpinamiling niya hi Jesus. Tungod kay mahugaw an babaye, waray gud hiya magpaabat han sinuksok hiya ha mga tawo. Naghunahuna hiya: “Bisan makaptan ko la an iya pantungbaw nga panapton mag-oopay na ako.” Han nakaptan niya an sidsid han bado ni Jesus, inabat dayon niya nga waray na hiya pagdinugui! “Nag-opay na an iya grabe nga sakit.”—Marcos 5:27-29.

Katapos hi Jesus nagsiring: “Hin-o an kinapot ha akon?” Ano daw la an inabat han babaye han hinbatian niya ito? Hi Pedro waray umuyon ha pakiana ni Jesus, salit hiya nagsiring: “Ginpapalibotan ngan ginsusuok ka han mga tawo.” Kon sugad, kay ano nga nagpakiana hi Jesus, “Hin-o an kinapot ha akon?” Hiya nagsaysay: “May kinapot ha akon, kay inabat ko nga may gahum nga ginawas ha akon.” (Lucas 8:45, 46) Oo, an gahum nga ginawas kan Jesus nakatambal ha babaye.

Han nasantop han babaye nga hinbaroan an iya ginbuhat, nahahadlok ngan nangungurog nga yinukbo hiya kan Jesus. Iya iginsumat ha ngatanan nga nakadto an kamatuoran mahitungod han iya sakit ngan an katambal pa la niya. Ha buotan nga paagi ginliaw hiya ni Jesus: “Anak, tungod han imo pagtoo nag-opay ka. Lakat nga mamurayawon, ngan mag-opay ka ha imo grabe nga sakit.”—Marcos 5:34.

Matin-aw nga an Usa nga ginpili han Dios basi magmando ha tuna mahigugmaon ngan mapinairon. Diri la hiya nagtatagad ha mga tawo pero may gahum liwat ha pagbulig ha ira!