Hi Jesus ngan an iya mga disipulo nagbiyahe tipanorte, ha Galilea. Katsaringsing na ngan may lugas na an mga uhay ha kaumhan. Gutom an mga disipulo salit nangutos hira hin mga uhay ngan nangaon. Pero Sabbath hadto, ngan nakita han mga Pariseo an ira ginbubuhat.

Hinumdumi nga diri pa la maiha, gin-ikaparatay hi Jesus han mga Judio ha Jerusalem ngan gin-akusaran nga nagtatalapas han Sabbath. Yana, gin-akusaran han mga Pariseo an mga disipulo tungod han ira ginbubuhat. “Kitaa! An imo mga disipulo nagbubuhat han igindidiri ha adlaw han Sabbath.”—Mateo 12:2.

Para ha mga Pariseo, an pangutos hin uhay ngan an pagkusokuso hito basi kaunon katugbang han pag-ani ngan paggiok. (Eksodo 34:21) Tungod han ira istrikto nga interpretasyon ha kon ano an masisiring nga trabaho, an Sabbath nakapabug-at imbes nga makapalipay ngan makaparig-on ha espirituwal. Ginbaton hira ni Jesus pinaagi hin mga ehemplo nga nagpapakita nga diri gud katuyoan ni Jehova nga Dios nga ipatuman an Iya balaud han Sabbath ha sugad nga paagi.

An siyahan nga ehemplo amo an mahitungod kan David ngan ha iya kaupod nga kalalakin-an. Han nagutom hira, kumadto hira ha tabernakulo ngan kumaon han halad nga mga tinapay. Ito nga mga tinapay ginkuha na ha atubangan ni Jehova ngan ginsaliwnan hin bag-o, ngan kasagaran nga iginreserba basi kaunon han mga saserdote. Pero tungod han kahimtang, hi David ngan an kalalakin-an waray kondenara ha pagkaon hito.—Lebitiko 24:5-9; 1 Samuel 21:1-6.

Ha ikaduha nga ehemplo, hi Jesus nagsiring: “Waray ba niyo mabasa ha Balaud nga an mga adlaw han Sabbath waray tagda sugad nga sagrado han mga saserdote ha templo, kondi waray hira makasala?” Karuyag niya sidngon nga bisan kon Sabbath, an mga saserdote nagpapatay hin mga hayop nga ihahalad ngan naghihimo hin iba nga buruhaton ha templo. Hiya nagdugang: “Pero nasiring ako ha iyo nga an usa nga aanhi mas importante kay ha templo.”—Mateo 12:5, 6; Numeros 28:9.

Ginamit utro ni Jesus an Kasuratan basi maipatin-aw ini: “Kon nasabtan niyo an kahulogan hini, ‘Karuyag ko an kalooy ngan diri an halad,’ waray unta niyo hukmi adton waray makasala.” Hiya nagtapos: “Kay an Anak han tawo amo an Ginoo han Sabbath.” Gin-uunabi ni Jesus an iya tiarabot nga mamurayawon nga pagmando ha Ginhadian ha sulod hin usa ka yukot ka tuig.—Mateo 12:7, 8; Hosea 6:6.

An katawohan maiha na nga nag-aantos han panguripon ni Satanas, nga puno hin kamadarahog ngan girra. Iba gud ito ha magigin kahimtang ilarom ha espesyal nga Sabbath han pagmando han Kristo, nga magtatagana hin panahon han pagpahuway nga aton ginpapamulat ngan ginkikinahanglan!