Ha este han Dagat han Galilea, milagroso nga ginpakaon ni Jesus an yinukot nga tawo ngan katapos pinalagiw hiya han karuyag nira nga himoon hiya nga hadi. Hito nga gab-i, naglakat hiya ha bawbaw han mabalud nga dagat ngan gintalwas hi Pedro nga naglakat liwat ha bawbaw han tubig pero nagtikalunod han nagluya an pagtoo. Ginpakalma liwat ni Jesus an hangin, posible nga basi talwason an iya mga disipulo tikang ha kalunod.

Nakabalik na hi Jesus ha weste han dagat, ha Capernaum. Didto, nabilngan hiya han mga tawo nga iya milagroso nga ginpakaon, ngan nagpakiana hira: “Kakan-o ka inabot dinhi?” Ginsaway hira ni Jesus ngan nagsiring nga ginbiling la nira hiya kay karuyag nira makakaon utro. Iya ginsagda hira nga ‘mangalimbasog, diri para ha pagkaon nga nadudunot, kondi para ha pagkaon nga diri-nadudunot nga naghahatag hin kinabuhi nga waray kataposan.’ Salit hira nagpakiana: “Ano an amon bubuhaton basi mahimo an buruhaton nga nalilipayan han Dios?”—Juan 6:25-28.

Bangin ginhunahuna nira an mga buruhaton nga nakasurat ha Balaud, pero an ginsisiring ni Jesus amo an buruhaton nga pinakaimportante: “Ini an nalilipayan han Dios, nga magpakita kamo hin pagtoo ha Iya ginsugo.” Kondi, an mga tawo waray magpakita hin sugad nga pagtoo kan Jesus, bisan pa han ngatanan nga iya ginbuhat. Karuyag nira nga maghimo hiya hin milagro basi tumoo hira ha iya. Hira nagpakiana: “Ano nga milagro an imo bubuhaton? An amon kaapoy-apoyan nangaon hin manna ha kamingawan, sugad la han nahisurat, ‘Naghatag hiya ha ira hin tinapay tikang ha langit basi kaunon.’”—Juan 6:29-31; Salmo 78:24.

May kalabotan han ira hangyo para hin milagro, iginpokus ni Jesus an atensyon han mga tawo ngadto ha tinuod nga Surok han mga milagro: “Susumatan ko kamo, Diri hi Moises an naghatag ha iyo han tinapay tikang ha langit, kondi an akon Amay an naghahatag ha iyo han totoo nga tinapay tikang ha langit. Kay an tinapay nga ginhahatag han Dios amo an usa nga tikang ha langit ngan naghahatag hin kinabuhi ha kalibotan.” Han waray nira masabti an iya punto, nakimalooy hira: “Ginoo, tagi kami pirme hito nga tinapay.” (Juan 6:32-34) Pero ano nga “tinapay” an ginsisiring ni Jesus?

Hiya nagsaysay: “Ako an tinapay nga naghahatag hin kinabuhi. An napakanhi ha akon diri na gud magugutom, ngan an nagpapakita hin pagtoo ha akon diri na gud uuhawon. Kondi nagsiring na ako ha iyo nga bisan kon nakikita niyo ako, diri kamo natoo. . . . Linusad ako tikang ha langit diri ha pagbuhat han akon kaburut-on, kondi ha pagbuhat han kaburut-on han nagsugo ha akon. Ini an kaburut-on han nagsugo ha akon, nga diri ko mawara an bisan usa han ngatanan nga iginhatag ha akon, kondi sadang ko hira banhawon ha kataposan nga adlaw. Kay kaburut-on han akon Amay nga an tagsa nga nakilala ha Anak ngan nagpapakita hin pagtoo magkaada kinabuhi nga waray kataposan.”—Juan 6:35-40.

Tungod hini nasina an mga Judio, ngan nagreklamo hira mahitungod kan Jesus. Kay ano nga nakasiring hiya nga hiya “an tinapay tikang ha langit”? (Juan 6:41) Para ha ira, anak hiya han tawhanon la nga mga kag-anak nga tikang ha syudad han Nazaret, ha Galilea. An mga tawo nagpakiana: “Diri ba hiya hi Jesus nga anak ni Jose, nga an mga kag-anak kilala naton?”—Juan 6:42.

Hi Jesus binaton: “Ayaw na kamo pagreklamo. Waray tawo nga makakakanhi ha akon gawas la kon igpahirani hiya han Amay nga nagsugo ha akon, ngan babanhawon ko hiya ha kataposan nga adlaw. Sumala ha sinurat han mga Propeta, ‘Hira ngatanan tututdoan ni Jehova.’ An tagsa nga namamati ha Amay ngan nahibabaro napakanhi ha akon. Waray pa tawo nga nakakita ha Amay, labot la ha iya nga tikang ha Dios. Hiya la an nakakita ha Amay. Ha pagkamatuod susumatan ko kamo, An natoo may kinabuhi nga waray kataposan.”—Juan 6:43-47; Isaias 54:13.

Han nakiistorya hi Jesus kan Nicodemo ha naglabay, iya gin-unabi an kinabuhi nga waray kataposan ngan an koneksyon hito ha pagtoo ha Anak han tawo, ha pagsiring: “An tagsa nga nagpapakita hin pagtoo ha [bugtong nga Anak han Dios] diri mamatay kondi magkaada kinabuhi nga waray kataposan.” (Juan 3:15, 16) Pero yana nakikiistorya hiya ha mas damu nga tawo, ngan ginsumatan hira nga may-ada hiya papel basi makarawat nira an kinabuhi nga waray kataposan, nga diri maihahatag han mana o han tinapay ha Galilea. Kon sugad, paonan-o magkakaada kinabuhi nga waray kataposan? Gin-utro ni Jesus an iya ginsiring: “Ako amo an tinapay han kinabuhi.”—Juan 6:48.

Ini nga paghisgot mahitungod han tinapay tikang ha langit iginpadayon ni Jesus ngan gintapos niya ito han nagtutdo hiya ha usa nga sinagoga ha Capernaum.