Nakadto pa gihapon hi Jesus ha Jerusalem para ha Piyesta han mga Tabernakulo (o, mga Payag), ngan padayon hiya nga nagtutdo mahitungod han importante nga mga kamatuoran. An iba nga mga Judio nga nakadto nagsiring pa la ha iya: “Katulinan kami ni Abraham ngan waray pa kami magin uripon.” Hi Jesus binaton: “Maaram ako nga katulinan kamo ni Abraham; pero karuyag niyo ako patayon, kay diri niyo ginkakarawat an akon pulong. Iginsusumat ko an akon mga nakita samtang kaupod ko an akon Amay; salit buhata niyo an nababatian niyo ha iyo amay.”—Juan 8:33, 37, 38.

Matin-aw an punto ni Jesus: An iya Amay diri pariho han ira amay. Tungod kay diri hira maaram han karuyag sidngon ni Jesus, an mga Judio nagsiring utro: “Hi Abraham an amon amay.” (Juan 8:39; Isaias 41:8) Literal nga mga tulin hira ni Abraham. Salit para ha ira, an ira pagtoo pariho han kan Abraham nga sangkay han Dios.

Pero natigdaan hira han baton ni Jesus: “Kon mga anak kamo ni Abraham, buhata niyo an mga buhat ni Abraham.” Oo, an tinuod nga anak nagsusubad ha iya amay. Hi Jesus nagpadayon: “Pero karuyag niyo ako patayon, usa nga tawo nga nagsusumat ha iyo han kamatuoran nga akon nabatian ha Dios. Waray ini buhata ni Abraham.” Katapos, nakakagupong an iya sunod nga ginyakan: “Ginbubuhat niyo an mga buhat han iyo amay.”—Juan 8:39-41.

Waray la gihapon masabti han mga Judio kon hin-o an ginsisiring ni Jesus. Nag-angkon hira nga tinuod hira nga mga anak, ha pagsiring: “Waray kami ig-anak tungod ha imoralidad. May-ada kami usa nga Amay, an Dios.” Pero an Dios gud ba an ira Amay? Hi Jesus nagsiring: “Kon an Dios an iyo Amay, hihigugmaon unta ako niyo, kay tikang ako ha Dios ngan aanhi ako pinaagi ha iya. Kinanhi ako diri ha akon la karuyag, kondi ginsugo ako han Dios.” Nagbangon hi Jesus hin pakiana nga hiya mismo an nagbaton: “Kay ano nga diri niyo masabtan an akon ginyayakan? Tungod kay diri kamo namamati ha akon pulong.”—Juan 8:41-43.

Nangalimbasog hi Jesus nga ipakita an magigin resulta han ira pagsalikway ha iya. Pero hini nga higayon prangka nga nagsiring hiya: “Tikang kamo ha iyo amay nga Yawa, ngan karuyag niyo buhaton an mga hingyap han iyo amay.” Ano nga klase hin amay may-ada hira? Matin-aw nga iginpakilala ni Jesus an ira amay: “Tikang han nagbuwa hiya, nagin parapamatay hiya, ngan waray hiya magpadayon ha kamatuoran.” Hi Jesus nagdugang: “An tikang ha Dios namamati ha ginsisiring han Dios. Amo nga diri kamo namamati, kay diri kamo tikang ha Dios.”—Juan 8:44, 47.

Ito nga pagkondenar nakapasina ha mga Judio, salit nagsiring hira: “Diri ba tama an amon ginsiring nga Samaritano ka ngan may demonyo?” Ha pagtawag kan Jesus nga “Samaritano,” iginpahayag nira an ira pagtamay ha iya. Pero ginbalewaray ni Jesus an ira panginsulto ngan binaton: “Waray ako demonyo, ngan ginpapasidunggan ko an akon Amay, pero diri niyo ako ginpapasidunggan.” Seryoso ini nga butang sugad han makikita ha iginsaad ni Jesus: “An bisan hin-o nga nagtutuman han akon pulong, diri gud mamamatay.” Diri niya iginpapasabot nga an mga apostol ngan an iba pa niya nga mga sumurunod literal nga diri mamamatay. Lugod, diri gud nira maieksperyensyahan an dayon nga kabungkagan, an “ikaduha nga kamatayon,” diin waray paglaom nga mabanhaw.—Juan 8:48-51; Pahayag 21:8.

Pero literal an pagsabot han mga Judio ha ginyakan ni Jesus, hira nagsiring: “Maaram na kami yana nga may demonyo ka. Namatay hi Abraham ngan an mga propeta, pero nasiring ka, ‘An bisan hin-o nga nagtutuman han akon pulong, diri gud mamamatay.’ Mas importante ka ba kay ha amon amay nga hi Abraham? . . . Hin-o ka ba ha imo paghunahuna?”—Juan 8:52, 53.

Matin-aw nga iginpapasabot ni Jesus nga hiya an Mesias. Pero imbes nga direkta nga batunon an ira pakiana mahitungod han iya pangirilal-an, hiya nagsiring: “Kon ginhihimaya ko an akon kalugaringon, waray pulos an akon himaya. An akon Amay an naghihimaya ha akon, hiya nga iyo ginsisiring nga iyo Dios; pero diri kamo nakilala ha iya. Kondi kilala ko hiya. Ngan kon magsiring ako nga diri ko hiya kilala, magigin buwaon ako pariho ha iyo.”—Juan 8:54, 55.

Katapos, gin-unabi utro ni Jesus an susbaranan han ira matinumanon nga apoy: “An iyo amay nga hi Abraham nalipay gud ha paglaom nga makita an akon adlaw; nakita niya ito ngan nalipay hiya.” Oo, tungod kay natoo hi Abraham ha saad han Dios, ginpamulat niya an pag-abot han Mesias. Diri makatoo nga nagsiring an mga Judio: “Waray ka pa ngani mag-50 anyos, nakita mo na hi Abraham?” Hi Jesus binaton: “Ha pagkamatuod susumatan ko kamo, Antes matawo hi Abraham, buhi na ako.” An iya ginsisiring amo an iya pag-eksister ha langit sugad nga gamhanan nga anghel antes hiya magin tawo.—Juan 8:56-58.

An mga Judio nga nasina gud ha ginsiring ni Jesus nga nabuhi hiya antes pa kan Abraham, nag-andam pagbato ha iya. Pero talwas nga nakagawas hi Jesus.