Kinadto hi Jesus ha Jerusalem para ha Piyesta han Pagdedikar (o, Hanukkah). Ini nga piyesta nagpapahinumdom han pagdedikar utro han templo. Sobra usa ka siglo na an naglabay, hi Hadi Antiochus IV Epiphanes han Sirya nagtindog hin halaran ha igbaw han daku nga halaran ha templo han Dios. Ha urhi, nabawi han mga anak han usa nga saserdote nga Judio an Jerusalem ngan igindedikar utro an templo kan Jehova. Tikang hadto, nagkaada na tinuig nga selebrasyon kada Kisleb 25, an bulan nga katugbang han urhi nga bahin han Nobyembre ngan temprano nga bahin han Disyembre.

Kathagkot na. Hi Jesus naglakat-lakat ha templo ha portiko ni Solomon. Didto, ginpalibotan hiya hin mga Judio ngan ginpakianhan: “San-o mo kami susumatan han kamatuoran? Kon ikaw an Kristo, prangka nga sumati kami.” (Juan 10:22-24) Ano an baton ni Jesus? Hiya nagsiring: “Ginsumatan ko na kamo, pero diri kamo natuod.” Hi Jesus waray direkta nga magsumat ha ira nga hiya an Kristo, sugad han iya iginsumat ha Samaritana ha may atabay. (Juan 4:25, 26) Pero, iginpahayag niya ha ira an iya pangirilal-an, ha pagsiring: “Antes matawo hi Abraham, buhi na ako.”—Juan 8:58.

Karuyag ni Jesus nga masantop han mga tawo nga hiya an Kristo pinaagi ha pagtanding han iya mga ginbubuhat ha igintagna nga pagbubuhaton han Kristo. Ito an rason nga usahay gintutugon niya an iya mga disipulo nga diri isumat ha bisan hin-o nga hiya an Mesias. Pero yana, prangka nga ginsidngan niya inin nakontra nga mga Judio: “An mga ginbubuhat ko ha ngaran han akon Amay nagpapamatuod mahitungod ha akon. Pero diri kamo natuod.”—Juan 10:25, 26.

Kay ano nga diri hira natuod nga hi Jesus an Kristo? Hiya nagsiring: “Diri kamo natuod kay diri ko kamo mga karnero. An akon mga karnero namamati han akon tingog. Kilala ko hira, ngan nasunod hira ha akon. Gintatagan ko hira hin kinabuhi nga waray kataposan. Diri gud hira mamamatay, ngan waray bisan hin-o nga mag-aagaw ha ira tikang ha akon kamot. An iginhahatag ha akon han Amay mas importante gud kay ha iba nga mga butang.” Katapos, iginsumat ha ira ni Jesus kon mationan-o hiya kaduok ha iya Amay, ha pagsiring: “Ako ngan an Amay uusa.” (Juan 10:26-30) Hi Jesus nakanhi ha tuna samtang an iya Amay nakadto ha langit, salit diri niya iginpapasabot nga hiya ngan an iya Amay literal nga uusa. Lugod, an ira katuyoan amo an uusa.

Nasina gud an mga Judio ha ginsiring ni Jesus, salit namurot na liwat hira hin bato basi patayon hiya. Waray hini mahadlok hi Jesus. Hiya nagsiring: “Nagpakita ako ha iyo hin damu nga mag-opay nga buhat tikang ha Amay. Hain hito nga mga buhat an hinungdan nga iyo ako babatuhon?” Hira binaton: “Babatuhon ka namon diri tungod ha maopay nga buhat, kondi tungod ha pagpasipara, kay nasiring ka nga usa ka nga dios.” (Juan 10:31-33) Waray gud magsiring hi Jesus nga dios hiya, pero kay ano nga igin-aakusar ito ha iya?

Aw, hi Jesus nagsiring nga may gahum hiya nga gintotoohan han mga Judio nga an Dios gud la an may-ada hito. Pananglitan, may kalabotan ha “mga karnero” hiya nagsiring: “Gintatagan ko hira hin kinabuhi nga waray kataposan,” nga diri maihahatag han tawo. (Juan 10:28) Pero, ginbalewaray han mga Judio an kamatuoran nga prangka nga ginsiring ni Jesus nga kinarawat hiya hin awtoridad tikang ha iya Amay.

Basi batunon an ira buwa nga akusasyon, hi Jesus nagpakiana: “Diri ba nahisurat ha iyo Balaud [ha Salmo 82:6], ‘Nagsiring ako: “Mga dios kamo”’? Kon gintawag niya nga ‘mga dios’ adton ginhukman han pulong han Dios . . . kay ano nga ako nga ginbaraan ngan ginsugo han Amay nganhi ha kalibotan ginsisidngan niyo, ‘Nagpapasipara ka,’ kay nagsiring ako nga Anak ako han Dios?”—Juan 10:34-36.

Oo, gintawag han Kasuratan nga “mga dios” bisan an mga tawo nga hukom nga diri matadong. Salit kay ano nga ginkukontra hini nga mga Judio an pagsiring ni Jesus hin “Anak ako han Dios”? May ginsiring hiya nga sadang makakombinse ha ira: “Kon diri ko ginbubuhat an buruhaton han akon Amay, ayaw kamo pagtuod ha akon. Pero kon ginbubuhat ko ito, bisan kon diri kamo natuod ha akon ginsisiring, tuod kamo tungod han akon mga buhat basi mahibaroan niyo ngan masabtan hin maopay nga an Amay kahiusa ko ngan ako kahiusa han Amay.”—Juan 10:37, 38.

Tungod hini, nangalimbasog an mga Judio pagdakop kan Jesus, pero nakapalagiw utro hiya. Binaya hiya ha Jerusalem ngan tinabok ha Salog Jordan ha dapit diin nagtikang panbawtismo hi Juan haros upat ka tuig na an naglabay. Posible nga diri ito hirayo ha durho nga bahin ha sur han Dagat han Galilea.

An mga tawo kinadto kan Jesus ngan nagsiring: “Hi Juan waray gud paghimo hin bisan usa nga milagro, pero totoo an ngatanan nga ginsiring ni Juan mahitungod hini nga tawo.” (Juan 10:41) Salit, damu nga Judio an tinoo kan Jesus.