Damu ka beses nga nangalimbasog hi Jesus basi aghaton an mga tawo nga tagdon an ira relasyon ha Dios. Nagkaada na liwat hiya hin sugad nga higayon katapos niya makiistorya ha mga tawo ha gawas han balay han usa nga Pariseo.

Gin-unabi han pipira ha ira an usa nga trahedya. Nag-iristorya hira mahitungod ‘han mga taga-Galilea nga ginpatay [han Romano nga Gobernador nga hi Ponsio] Pilato samtang naghahalad hira.’ (Lucas 13:1) Ano an ira karuyag sidngon?

Posible nga ini an mga taga-Galilea nga namatay han nagprotesta an yinukot nga Judio tungod ha paggamit ni Pilato han kwarta han templo ha pagpahimo hin aragian han tubig tipakadto ha Jerusalem. Bangin nakuha ni Pilato an kwarta tungod ha pakigkooperar han mga awtoridad ha templo. Posible nga ginhunahuna han mga nag-istorya hini nga namatay ito nga mga taga-Galilea tungod kay may maraot hira nga nabuhat. Waray umuyon hito hi Jesus.

Hiya nagpakiana: “Naghuhunahuna ba kamo nga ha ngatanan nga taga-Galilea, hira an pinakasalaan kay nahitabo ito ha ira?” An iya baton, diri. Pero ginamit niya ito nga hitabo basi pahamangnoan an mga Judio: “Mahinunugad liwat kamo ngatanan ha ira kon diri kamo magbasol.” (Lucas 13:2, 3) Katapos gin-unabi ni Jesus an usa pa nga trahedya nga bangin diri pa la maiha nga nahitabo ngan posible may kalabotan ha paghimo hito nga aragian hin tubig, hiya nagpakiana:

“Naghuhunahuna ba kamo nga an 18 nga namatay tungod han karumpagi han torre ha Siloam mas makasasala kay ha iba nga mga tawo nga naukoy ha Jerusalem?” (Lucas 13:4) Bangin para ha mga tawo, ito nga mga indibiduwal namatay tungod han ira nabuhat nga sala. Waray na liwat umuyon hito hi Jesus. Maaram hiya nga may-ada diri ginlalaoman nga panhitabo ngan posible nga ini liwat an hinungdan hito nga trahedya. (Eklesiastes 9:11) Pero, kinahanglan may hibaroan an mga tawo tikang hito nga panhitabo. Hi Jesus nagsiring: “Susumatan ko kamo nga mamamatay liwat kamo ngatanan pariho ha ira kon diri kamo magbasol.” (Lucas 13:5) Pero kay ano nga ginpabug-atan niya yana ini nga leksyon?

May kalabotan ito ha nabibilin nga panahon han iya pagministeryo, ngan igin-ilustrar niya ini hini nga paagi: “May usa ka tawo nga may igera ha iya uma, ngan kinadto hiya basi kitaon kon may bunga ito, pero waray hiya nakita. Ngan ginsidngan niya an parauma, ‘Tulo ka tuig na nga nagkikinanhi ako basi kitaon kon may bunga na ini nga igera, kondi waray ako nakikita. Pudla ito! Kay ano nga kakaragan la hito an tuna?’ Binaton ha iya an parauma, ‘Agaron, pabay-i anay ito hini nga tuig tubtob nga maukaran ko an palibot hito ngan mabutangan hin abuno. Katapos, kon magbunga ito, maopay. Pero kon diri, pudla ito.’”—Lucas 13:6-9.

Ha sulod hin sobra tulo ka tuig, nangalimbasog hi Jesus nga makultibar an pagtoo han mga Judio. Pero pipira gud la an nagin iya mga disipulo ngan masisiring nga bunga han iya paningkamot. Ikaupat ka tuig na han iya pagministeryo, ngan mas naniniguro pa gud hiya. Sugad hin nag-ukad ngan nag-abuno hiya ha palibot han kahoy nga igera, nga amo an mga Judio, pinaagi ha pagsangyaw ngan pagtutdo ha Judea ngan Perea. Ano an resulta? Pipira gud la nga Judio an ginios. Ha kabug-osan, an nasud waray magbasol salit bubungkagon ito.

Waray pag-iha katapos han Sabbath, iginpakita na liwat han kadam-an han mga Judio an diri nira paggios. Hi Jesus nagtutdo ha sinagoga. Nakita niya an usa nga babaye nga ginpapakurian hin demonyo salit diri nakakatindog hin tadong ha sulod hin 18 ka tuig na. Nalooy hi Jesus salit hiya nagsiring: “Babaye, talwas ka na ha imo sakit.” (Lucas 13:12) Ginkaptan hiya ni Jesus ngan nakatindog dayon hiya hin tadong, ngan gindayaw niya an Dios.

Nasina hito an punoan nga opisyal han sinagoga ngan nagsiring: “May unom ka adlaw ha pagtrabaho, salit hito la nga mga adlaw kamo pagpatambal, diri ha adlaw han Sabbath.” (Lucas 13:14) Diri iginninigar hito nga opisyal an gahum ni Jesus ha pagtambal; lugod, iya ginsasaway an mga tawo nga nagpapatambal durante han Sabbath! Hi Jesus naghatag hin maopay nga pangatadongan: “Mga hipokrito, diri ba ginbabadbaran niyo an toro o an asno ha kwadra ngan gintutugwayan ngadto ha maiinuman? Diri ba angay liwat talwason ha adlaw han Sabbath ini nga babaye nga anak ni Abraham, nga gin-gapos ni Satanas hin 18 ka tuig na?”—Lucas 13:15, 16.

Naawod an mga parakontra, pero an mga tawo nalipay tungod han ira nakita nga urusahon nga mga ginbuhat ni Jesus. Katapos gin-utro ni Jesus ha Judea an duha nga matagnaon nga ilustrasyon may kalabotan han Ginhadian, nga iya na gin-unabi han nakadto hira ha baluto ha Dagat han Galilea.—Mateo 13:31-33; Lucas 13:18-21.