Ha este nga bakilid han Bukid han mga Olibo, mga tulo ka kilometro tikang ha Jerusalem, nahimumutang an baryo han Betania. (Juan 11:18) Hi Jesus binisita ha balay han magbugto nga hira Marta ngan Maria. Hira ngan an ira bugto nga hi Lasaro mga sangkay ni Jesus, ngan mahigugmaon nga gin-abiabi nira hiya.

Usa nga kadungganan nga magin bisita an Mesias. Karuyag gud ni Marta nga ihatag kan Jesus an pinakamaopay salit nangandam hiya hin damu nga pagkaon. Samtang nagtatrabaho hi Marta, an iya bugto nga hi Maria nalingkod ha tiilan ni Jesus ngan namamati. Ha urhi, hi Marta nagsiring kan Jesus: “Ginoo, diri ako ginbubuligan han akon bugto ha mga buruhaton, diri mo ba hiya sisidngan? Alayon sidnga hiya nga buligan ako.”—Lucas 10:40.

Imbes nga sawayon hi Maria, ginsagdonan ni Jesus hi Marta tungod han sobra nga kabaraka ha materyal nga pagkaon: “Marta, Marta, nababaraka ngan okupado ka ha damu nga butang. Pero pipira la nga butang an ginkikinahanglan, o usa la ngani. Ginpili ni Maria an maopay nga butang, ngan diri ito kukuhaon ha iya.” (Lucas 10:41, 42) Oo, ginpabug-atan ni Jesus nga diri angay maggahin hin daku nga panahon ha pagpangandam hin damu nga pagkaon. Igo na an simple la nga pagkaon.

Maopay an intensyon ni Marta. Karuyag niya magin maabiabihon. Pero tungod kay nakapokus hiya ha pagpangandam, waray hiya magpahimulos han pagtutdo han Anak mismo han Dios! Ginpabug-atan ni Jesus nga maaramon an desisyon ni Maria, may-ada ito nagpapadayon nga kapulsanan para ha iya ngan hin leksyon para ha aton ngatanan.

Ha iba nga higayon, naghatag hi Jesus hin usa pa nga importante nga leksyon. May disipulo nga naghangyo: “Ginoo, tutdui kami kon paonan-o mag-aampo, pariho han pagtutdo ni Juan ha iya mga disipulo.” (Lucas 11:1) Igintutdo na ito ni Jesus mga usa ngan tunga ka tuig na an naglabay ha iya Sermon ha Bukid. (Mateo 6:9-13) Pero bangin waray didto ini nga disipulo salit gin-utro ni Jesus an nangunguna nga mga punto. Katapos naghatag hiya hin ilustrasyon basi pabug-atan nga kinahanglan magin mapinadayunon ha pag-ampo.

“Pananglitan, usa ha iyo an may sangkay ngan kinadto ka ha iya ha katutnga han gab-i ngan nagsiring ha iya, ‘Sangkay, pautanga ako hin tulo nga tinapay kay may sangkay ako nga inabot pa la tikang ha biyahe ngan waray ako ipapakaon ha iya.’ Pero an tagbalay binaton: ‘Ayaw ako pagdisturboha. Nakatrangka na an purtahan, ngan nahigda na kami han akon gudtiay pa nga mga anak. Diri ako makakabuhát ngan makakahatag ha imo hin bisan ano.’ Susumatan ko kamo: Bisan kon diri hiya bumuhát ngan maghatag hin bisan ano tungod han ira pagin magsangkay, sigurado nga mabuhát hiya ngan mahatag han iya ginkikinahanglan tungod han iya padayon nga pagpirit.”—Lucas 11:5-8.

Diri iginpapasabot ni Jesus nga nadiri hi Jehova ha pagbaton hin mga pangamuyo, pariho ha ginbuhat han sangkay. Lugod, iginpakita niya nga kon an usa nga sangkay napiritan pagbaton ha pauroutro nga hangyo, sigurado nga an aton mahigugmaon nga Amay mabaton ha sinsero nga pangamuyo han iya magtinumanon nga surugoon! Hi Jesus nagpadayon: “Susumatan ko kamo: Padayon nga mangaro kay ihahatag ito ha iyo, padayon nga mamiling kay hiaagian ito niyo, padayon nga magtuktok kay aabrihan kamo. Kay an bisan hin-o nga nangangaro may nakakarawat, an bisan hin-o nga namimiling nakakaagi, ngan an bisan hin-o nga nagtutuktok inaabrihan.”—Lucas 11:9, 10.

Katapos, ginpabug-atan ni Jesus an iya punto pinaagi ha pagtanding ha tawhanon nga mga tatay: “Hin-o nga tatay an mahatag hin halas kon an iya anak mangaro hin isda? O kon mangaro liwat hiya hin bonay, mahatag ba hiya hin iskorpyon? Salit kon kamo nga magraot maaram humatag ha iyo mga anak hin mag-opay nga regalo, labi na gud nga mahatag an iyo Amay ha langit hin baraan nga espiritu ha mga nangangaro ha iya!” (Lucas 11:11-13) Maopay gud ini nga pasarig nga an aton Amay andam mamati ha aton ngan maghatag han aton mga panginahanglan!