Han nakadto pa hi Jesus hirani ha Jerusalem, dinaop ha iya an iba-iba nga Judio. An pipira karuyag mahibaro tikang ha iya samtang an iba karuyag nga sarihan hiya. An usa ha ira nga eksperto ha Balaud, nagpakiana: “Magturutdo, ano an kinahanglan ko buhaton basi mapanunod an kinabuhi nga waray kataposan?”—Lucas 10:25.

Naobserbaran ni Jesus nga an lalaki diri la nangangaro hin impormasyon. Bangin karuyag niya nga bumaton hi Jesus ha paagi nga makakapasina ha mga Judio. Nasantop ni Jesus nga ini nga lalaki may-ada na marig-on nga gintotoohan. Salit maaramon nga binaton hi Jesus ha paagi nga maipapahayag han lalaki an iya ginhuhunahuna.

Hi Jesus nagpakiana: “Ano an nahisurat ha Balaud? Ano an imo pagsabot ha imo nabasa?” Ini nga lalaki nag-aram han Balaud han Dios, salit iya iginbasar dida hito an iya baton. Ginkotar niya an Deuteronomio 6:5 ngan Lebitiko 19:18, ha pagsiring: “‘Higugmaa hi Jehova nga imo Dios ha bug-os mo nga kasingkasing, ha bug-os mo nga kalag, ha bug-os mo nga kusog, ngan ha bug-os mo nga hunahuna,’ ngan ‘higugmaa an imo igkasi-tawo sugad ha imo kalugaringon.’” (Lucas 10:26, 27) Ito ba an baton?

Nagsiring hi Jesus ha lalaki: “Husto an imo baton; ‘padayon nga buhata ini ngan magkakaada ka kinabuhi.’” Pero tapos na ba an ira paghisgot? Ito nga lalaki diri la namimiling hin husto nga baton; karuyag niya ‘pamatud-an nga matadong hiya,’ ngan makompirma nga husto an iya panhunahuna ngan makatadunganon an iya pagtratar ha iba. Tungod hito, hiya nagpakiana: “Hin-o gud ba an akon igkasi-tawo?” (Lucas 10:28, 29) Ini nga pakiana baga hin simple la pero may hilarom nga kahulogan. Kay ano?

An mga Judio natoo nga an pulong nga “igkasi-tawo” aplikado la hadton nagbubuhat han tradisyon han mga Judio, ngan baga hin ginsusuportaran ito han Lebitiko 19:18. Ngani, bangin sumiring an usa nga Judio nga diri uyon ha Balaud an pakig-upod ha diri Judio. (Buhat 10:28) Salit ini nga lalaki ngan posible pati an pipira nga disipulo ni Jesus naghuhunahuna nga matadong hira kon gintatratar nira hin maopay an ira igkasi-Judio. Pero bangin diri maopay an ira pagtratar ha usa nga diri-Judio; kay diri man hiya “igkasi-tawo.”

Paonan-o tatadungon ni Jesus ini nga panhunahuna ha paagi nga diri maiinsulto ito nga tawo ngan an iba nga Judio? Nagsumat hiya hin usa nga istorya: “Usa nga lalaki tikang ha Jerusalem an tikadto ha Jerico. Ginburubligan hiya hin mga tulisan ngan ginhuboan, ginkastigo, ngan ginbayaan nga haros patay na.” Hi Jesus nagpadayon: “Nahituman nga may saserdote nga inagi hito nga dalan, pero han hinkit-an niya an lalaki, didto hiya agi ha luyo nga ligid han dalan. Inagi liwat didto an usa nga Lebihanon, ngan han nakita niya an lalaki, inagi hiya ha luyo nga ligid han dalan. Pero usa nga Samaritano an inagi hito nga dalan. Han nakita niya an lalaki, nalooy hiya.”—Lucas 10:30-33.

An lalaki nga gin-iistoryahan ni Jesus sigurado nga maaram nga damu nga saserdote ngan Lebihanon nga kabulig ha templo an naukoy ha Jerico. Basi makabalik ha templo, kinahanglan nira magbiyahe hin mga 23 ka kilometro. Peligroso ito nga ruta, tungod kay may mga tulisan nga nagtatago didto. Kon makita han saserdote ngan han Lebihanon an usa nga igkasi-Judio nga namimeligro, diri ba sadang nira hiya buligan? Ha istorya ni Jesus, waray hira bumulig. An bumulig usa nga Samaritano, tikang ha lahi nga ginmiminos han mga Judio.—Juan 8:48.

Paonan-o ginbuligan han Samaritano an Judio nga grabe an kahimtang? Hi Jesus nagpadayon: “Dinaop hiya ngan ginbendahan an mga samad han lalaki ngan ginbuboan ito hin lana ngan bino. Katapos, iya iginsakay an lalaki ha iya hayop ngan gindara ha balay nga pahuwayan ngan ginmangnoan. Kinabuwasan, kinuha hiya hin duha nga denaryo, iginhatag ito ha parabantay han balay nga pahuwayan, ngan nagsiring, ‘Mangnoi hiya, ngan anoman an imo magasto labot hini, babayaran ko ikaw pagbalik ko.’”—Lucas 10:34, 35.

Katapos mag-istorya an Maabtik nga Magturutdo nga hi Jesus, ginpakianhan niya an lalaki: “Ha imo hunahuna, hin-o hini nga tulo an igkasi-tawo han lalaki nga gintulis?” Bangin diri komportable an lalaki nga bumaton hin “an Samaritano,” salit hiya nagsiring: “An usa nga nagpakita hin kalooy ha iya.” Katapos iginpatin-aw ni Jesus an leksyon han iya istorya, hiya nagsagda: “Lakat, ngan buhata liwat ito.”—Lucas 10:36, 37.

Epektibo gud ini nga paagi han pagtutdo! Kon nagsiring la hi Jesus nga igkasi-tawo liwat an mga diri Judio, kakarawaton ba ito han lalaki ngan han iba nga Judio nga namamati? Posible nga diri. Pero pinaagi ha pagsumat hin simple nga istorya, gamit an mga detalye nga pamilyar ha mga mamarati, nagin matin-aw an baton ha pakiana nga, “Hin-o gud ba an akon igkasi-tawo?” An tinuod nga igkasi-tawo amo adton nagpapakita hin gugma ngan pagkabuotan nga iginsusugo ha aton han Kasuratan.