Katapos han 40 ka adlaw ha kamingawan ngan antes bumalik ha Galilea, hi Jesus kumadto kan Juan nga nagbawtismo ha iya. Han hirani na hi Jesus, gintudlok hiya ni Juan ngan nagsiring: “Kitaa, an Kordero han Dios nga nagkukuha han sala han kalibotan! Hiya an akon ginsisiring, An usa nga makanhi sunod ha akon, nahiuna ha akon, kay nahiuna hiya pag-eksister kay ha akon.” (Juan 1:29, 30) Bisan kon magurang hi Juan kan Jesus, maaram hiya nga antes hiya matawo, buhi na hi Jesus ha langit sugad nga espiritu nga persona.

Han naglabay pa la nga mga semana, han kumadto hi Jesus kan Juan basi magpabawtismo, diri pa sigurado hi Juan nga hi Jesus an magigin Mesias. Hiya nagsiring: “Bisan ako waray makakilala ha iya. Pero kinanhi ako ha pagbawtismo ha tubig basi makilala hiya han Israel.”—Juan 1:31.

Iginsaysay ni Juan ha iya mga mamarati an nahitabo han ginbawtismohan niya hi Jesus: “Nakita ko an espiritu nga nalusad sugad hin sarapati tikang ha langit, ngan nagpabilin ito dida ha iya. Bisan ako waray makakilala ha iya, pero an Dios nga nagsugo ha akon nga magbawtismo ha tubig nagsiring ha akon, ‘Kon makita mo an espiritu nga nalusad ngan nagpapabilin ha iya, ini hiya an nagbabawtismo pinaagi han baraan nga espiritu.’ Nakita ko ito, ngan akon ginpamatud-an nga hiya an Anak han Dios.”—Juan 1:32-34.

Kinabuwasan, kaupod ni Juan an duha han iya mga disipulo han inabot utro hi Jesus. Hi Juan nagsiring: “Kitaa, an Kordero han Dios!” (Juan 1:36) Tungod hini, sinunod kan Jesus an duha nga disipulo ni Juan nga Parabaptis. An usa ha ira amo hi Andres ngan an usa pa posible nga amo an nagsurat mismo hini nga asoy, nga Juan liwat an ngaran. Baga hin ini nga Juan patod ni Jesus ngan anak ni Salome. Posible nga hi Salome bugto ni Maria, ngan bana niya hi Sebedeo.

Paglingi ni Jesus nakita niya nga hira Andres ngan Juan nagsisinunod ha iya. Nagpakiana hiya: “Ano an iyo tuyo?”

‘Rabbi, diin ka naukoy?’ nagpakiana liwat hira.

Binaton hiya: “Kadi, ipapakita ko ha iyo.”—Juan 1:37-39.

Mga alas-4 na adto han kulop, ngan hira Andres ngan Juan nagpabilin nga kaupod ni Jesus hito nga adlaw. Nalipay gud hi Andres salit nakigkita hiya ha iya bugto nga hi Simon, nga gintatawag liwat nga Pedro, ngan ginsumatan: “Hin-agian namon an Mesias.” (Juan 1:41) Gin-upod ni Andres hi Pedro ngadto kan Jesus. Iginpapakita han urhi nga mga panhitabo nga nakigkita liwat hi Juan ha iya bugto nga hi Santiago ngan igin-upod ngadto kan Jesus; kondi, waray ini isurat ni Juan ha iya ebanghelyo.

Kinabuwasan, nakita ni Jesus hi Felipe nga naukoy ha Betsaida. Hirani ito ha norte nga baybayon han Dagat han Galilea ngan ito an natawohan nga syudad nira Andres ngan Pedro. Gin-imbitar ni Jesus hi Felipe: “Sunod ha akon.”—Juan 1:43.

Katapos nakita ni Felipe hi Natanael, nga gintatawag liwat nga Bartolome, ngan nagsiring: “Hin-agian namon an gin-uunabi ha mga sinurat ni Moises, ha Balaud, ngan ha mga sinurat han mga Propeta, nga amo hi Jesus, an anak ni Jose nga taga-Nazaret.” Pero nagruhaduha hi Natanael ngan nagpakiana: “May maopay ba nga magtitikang ha Nazaret?”

“Kadi ngan imo makikita,” gin-aghat hiya ni Felipe. Nakita ni Jesus nga tidaop hi Natanael ngan nagsiring hiya: “Kitaa, an usa nga Israelita nga diri gud naglilimbong.”

“Paonan-o mo ako nakilala?” nagpakiana hi Natanael.

Hi Jesus binaton: “Antes ka tawagon ni Felipe, samtang nakadto ka ha ilarom han kahoy nga igera, nakita ko ikaw.”

Nahipausa hi Natanael ngan nagsiring: “Rabbi, ikaw an Anak han Dios, ikaw an Hadi han Israel.”

Hi Jesus nagpakiana: “Natoo ka ba ha akon tungod la kay nagsumat ako ha imo nga nakita ko ikaw ha ilarom han kahoy nga igera? Makakakita ka hin mga butang nga mas urusahon pa hini.” Katapos hiya nagsaad: “Ha pagkamatuod susumatan ko kamo, Makikita niyo nga abrido an langit ngan an mga anghel han Dios nasaka ngadto ngan nalusad ngada ha Anak han tawo.”—Juan 1:45-51.

Waray pag-iha katapos hini, hi Jesus ngan an iya bag-o nga mga disipulo binaya ha Walog han Jordan ngan nagbiyahe ngadto ha Galilea.